第二十八章 愛你
 
大概訓到5點。
「起身啦﹐肥仔。」啊婷一野扯開張被。
嘩﹐好凍呀。
我唔想醒呀…
「起身幫我手整肉眼同薯蓉啦。」我慢慢爬起身。
行到去廚房。
「娘娘﹐奴才有咩幫到你?」
「煮熟啲薯仔壓蓉再加牛油撈埋。」佢指住枱面啲薯仔。


「放心交比我。」我行左去啲薯仔到。
 
之後將薯仔慢慢放落煲熱水到…
煮多陣就拎出黎﹐
用筷子篤一篤﹐
確保佢煮好。
 
你認為我會咁做咩?
NoNoNo
 


我一野將啲薯仔扔落啲熱水到﹐
之後啲水就緊係彈曬出黎﹐
RIP
只能說﹐
真係好撚熱呀!
 
小小苦楚等於激勵。
繼續啦。
 
我煮多六七分鐘﹐


你地班濕鳩薯仔一定熟啦﹐
筷子都省返。
 
通常啲人會等佢凍啲先搣皮既就…
可惜我個腦唔知做乜鳩,
一野拎起舊薯仔「仲熱熱地﹐快啲搣埋皮先。」
正常人都知下一秒會發生咩事啦…
 
屌!我隻手熟啦!
我諗都冇諗就扔返舊薯仔落個碗到。
 
Holy Shit.
凹左喎佢﹐
好似有少少煮過龍。
 


算﹐橫掂等等都要壓。
當壓少一下囉。
 
辛辛苦苦終於搣好。
另一邊啊婷已經準備開始煎肉眼。
我都唔執輸﹐
開始壓薯蓉。
 
「搞掂。」我同啊婷同時講。
 
不過啊婷已經整好肉眼同準備好白飯。
而我只係壓好薯蓉…
連牛油都未落。
都係拿拿臨加埋落去﹐
是但撈兩撈算。


收工。
 
時間啱啱好。
當我同啊婷擺好啲野食上枱。
老媽子就返到黎…
 
一打開門,佢就見到啊婷。
鞋都未除就望住我講…
「死仔﹐捨得帶女朋友返黎啦咩。」
佢眼神彷彿同我講「有眼光喎啊仔﹐同你老豆眼光一樣。」
 
「食得啦﹐快的埋位啦。」我學佢平時既語氣。
 
其實我啊媽同我就好似friend咁﹐
仲好open。


所以呢餐根本冇可能dead air。
 
佢勁快手放好曬所有野﹐
坐左響啊婷對面。
起筷~
 
「估唔到啊仔你都會識到女朋友。」嘩﹐你呢句野有骨既。
「你個仔咁靚仔又點會識唔到?」哥可是長得像洪永城。
「咁你都講得出口既。」嗱﹐我唔準你咁講呀吓﹐
講下講下﹐
佢已經食曬個薯蓉﹐
開始食緊肉眼。
 
「啊婷你煮野食好叻架﹐邊個教你架?」佢放左一舊入口。
個樣已經睇得出佢好滿意。


「我爸爸媽媽成日唔響屋企﹐所以自己學煮野食。」啊婷塊面有小小紅。
「啊仔﹐呢個女仔娶得過。」佢向我打左一個眼色。
再另轉頭同啊婷繼續講「多得你﹐個死仔包先開始肯溫書咋。」
「其實我都冇乜點幫佢。」啊婷塊面變得更紅。
結果成餐飯﹐
佢地就響到傾我細個啲瘀野。
 
而我就響側邊得個聽字。
 
終於食完餐飯。
啊婷就執曬啲野去廚房。
我同啊媽就坐響梳化傾左陣。
「你點追到新抱仔返黎架?」佢等食花生咁望住我﹐
但…佢叫啊婷做新抱仔?
有冇咁快呀?
「想知?」我開始自豪咁同佢講「全靠我第一日返學遲到咋,如果唔係我都唔會遇到啊婷。」
「你個衰仔又遲到?不過見你搵到女朋友就算啦﹐咁之後呢?」佢開始追問。
「之後?咪變左依家咁囉。」雖然我同啊媽好friend﹐
不過將件事既來龍去脈講曬﹐
我會唔好意思。
「懶神秘咁。」好彩佢冇追問咋。
 
咁就8:00架喇…
係時候喇!
我去左廚房搵啊婷。
「啊婷﹐啲野我陣間返黎洗啦。我帶你去一個地方。」我拉住佢隻手。
「去邊呀。」佢放低塊百潔巾。
「陣間你咪知。」我同啊媽交代左句﹐
就一手拖住佢離開左屋企﹐
搭我一早call定既的士。
「到底去邊啫?」佢一直問我。
「好快你就知架啦。」
 
話咁快就到左目的地。
屯門市中心。
我拖住佢行去聖誕樹果邊。
「都未着燈…」佢望住仲未着燈嘅聖誕樹嘟嘴。
「我表演一個魔術俾你睇﹐你望住聖誕樹啦喎。」我噠一噠手指﹐
聖誕樹既燈慢慢開始着。
「嘩!着左啦!着左啦!」佢好似個小朋友跳下跳下咁講﹐
再另轉頭望我。
呢個時候﹐
我單膝跪響地下。
拎出我買好左既頸鏈。
講我練左成個月既台詞。
 
「鍾凱婷﹐遇到你係我成世仔最幸福既事﹐我讀書唔叻﹐你會教我。成日做埋啲傻仔野﹐你會包容我。做左幾多對你唔好既事﹐你都相信我。我希望你一直信我落去﹐認住我依家攞住既呢一條普普通通﹐行出街十個有九個人都戴住既頸鏈﹐我終有一日會攞住一隻獨一無二既戒指跪響到親手為你帶上﹐從你爸爸手上接過你﹐同你並肩行入教堂。」我好認真咁講。
 
「好老土呀你﹐唔收貨呀。」雖然佢表面上咁講﹐但係佢已經忍唔住喊。
 
講真…
呢招又真係老土左既。
不過work喎!
我噠手指果個位練左好耐架。
 
我幫佢戴好條頸鏈﹐
再好深錫左佢一下。
 
我真係愈黎愈愛你啦。
愛到唔想同你分離。