《讓我重新遇見你》·緣圓系列·: 第三十一章 在那？
第三十一章 在那？
我跑左去學校門口。
但學校呢個鐘數已經閂左﹐
邪惡既內心竟然軀使我去爬閘﹐
唔得唔得唔得﹐
俾人記小過唔係問題﹐
但俾警察拉先係問題﹐
到時搞到我見唔返啊婷咪PK。
都係返屋企諗清楚﹐
聽日先返學校搵。
返到屋企﹐
沖完涼攤上張床到﹐
碌左成個鐘都眼光光﹐
明明個人好攰﹐
但始終都係瞓唔著﹐
摸住空無一人既床鋪﹐
不久之前﹐
充滿薰衣草既女孩子先瞓過響我隔離﹐
依家卻消失得不見蹤影。
俾我見返你啦...
我好掛住你呀﹐凱婷...
枕頭套俾我整濕左大半﹐
唔係流口水係流馬尿。
你當我感性乜都好啦...
我只係好想見返啊婷。
最後我啲眼水俾我喊到冇曬﹐
隻眼痛痛地﹐
所以就合埋眼瞓左。
第二朝拖住疲倦既身軀返學﹐
身攰心攰﹐
眼腫鼻腫﹐
真係有啲似俾人打過﹐
戴個口罩扮下病﹐
好彩本來有眼鏡可以遮下眼腫啫。
呢日係我中學生涯最靜既一日﹐
啲同學一見到我黑曬面﹐
已經感覺到個氣場唔係幾掂﹐
啊雄又受傷冇返學﹐
吉仔又淆我﹐
所以今日係我果班根本冇人夠膽嘈。
去到小息﹐
我問都冇問就入左啊婷個班房﹐
搵下佢櫃桶。
搵極都冇。
「封信到底響邊呀？」搵唔到封信既我開始急起上黎。
開始横衝直撞。
堂都唔上﹐淨係顧住封信。
行曬成間學校。
女廁都叫人望過。
差天台未搵咋。
正當我準備跨過鐵鏈上天台既時候…
「痴撚左線咩陸添羽。上天台要記小過架。」吉仔響我前面擋住我。
「走開。」吉仔唔肯走「走開呀。」我一野推跌左佢。
開始上去天台。
「天台根本冇你要搵既野！」吉仔響後面叫停我。
我完全冇理佢﹐
直衝入天台。
吉仔到最後都係冇阻止我﹐
因為佢知道佢嗌唔停我﹐
索性坐左響鐵鏈果個位睇水。
「點解搵左咁耐都搵唔到…」我響天台搵左好耐都搵唔到﹐
我開始覺得頹。
我慢慢由天台一級一級落返六樓。
坐左梯級。
呢一刻世界就好似停左。
我諗起我啱先太過激動﹐
仲要推跌吉仔。
「喂﹐你痛唔痛呀？」我撩吉仔講野。
「小事啦。」佢搭住我膊頭﹐
「sor9呀。」
「屌你講呢啲。」佢笑下﹐
相比著道歉﹐
我更加想同你講多謝。
「其實你要搵乜？」佢鬆開我﹐
企響身咁講。
「吓？你唔知？但你啱啱話搵唔到我要搵既野架喎。」我抬頭望下佢。
「咁冇人入到去﹐又點會有你要搵既野啫。」佢又講得有道理喎。
「其實我搵緊信﹐依家我只係搵到一封﹐仲有四封加一本筆記呀。」我好灰咁講。
遠在天邊﹐近在眼前
會唔會係其他地方呢？
「你有冇試過上佢屋企搵呀？」係喎！
我有送過佢返屋企架喎。
----------------------------
「走啦我。」佢揹起掛住熊仔既書包。
「我送你啦。」我笑一笑。
「好近啫嘛。」佢講。
「近就更加應該比我送。」
「真係冇你辦法呀。」佢轉身就走「你係咪送我架？仲呆左響到？」佢微微轉頭,甜美笑左出黎。
「黎啦。」
-------------------------------
好！
我決定放學去佢屋企搵。
「吉仔！我愛你！」我一野攬住佢。
「妖！咪咁Gay啦！」吉仔推開我「上數學堂就放學﹐撐住呀兄弟！」我同佢一齊行返班房。
「今日又小測啦？」我顧住搵信都冇溫書。
唔通又要好似上次突擊小測咁？
「淡定啦﹐我有溫呀。等等比你抄啦。」吉仔好有信心咁講。
我挑！
結果咪又係交白卷。
明明測第六課﹐佢走去溫第七課。
正一弱智仔﹐
等補測啦。
話咁快就放學。
我拿拿臨衝去啊婷屋企。
去到佢住果層﹐
後樓梯冇啦啦閂門﹐
有個女仔既身影...
啊婷？
我打開度門﹐
周圍望都冇人﹐
行上行落都唔見。
唔通我有幻覺？
我充滿疑問行返啊婷屋企門口﹐
去到先發現原來佢地搬左屋。
門口仲有個地產佬響到睇樓。
唔理啦﹐我衝入去。
「先生先生﹐你唔係業主唔入得架。」個地產佬打算擋住我。
求其諗個藉口打發佢先。
「收皮啦你﹐我依家要拎返啲野﹐你就借過啦﹐阻埞。」我一野撞開佢。
我推人真係有一手。
「喂！先生。」佢想扯住我。
「你同我收嗲。」我一邊指住佢一邊行入啊婷房搵。
愛情既力量真係大到咩人都夠膽兇。
入左佢間房﹐
見到佢枱面既相架﹐
係我同佢睇流星雨果日千紙幫我地影既果張相﹐
忍唔住攞著睇下﹐
「啪—」係封信呀！
洗唔洗收到咁密呀？
算。
「走得。」我帶埋封信再睥左個地產佬兩眼﹐
之後就離開左啊婷屋企。
響返屋企既途中打開封信。
---------------------------
手多多！
攞我個相架黎睇！
不過算你啦﹐
搵到封信。
成日冇啦啦大叫問人野既傻仔。
記得你果日第一次送我返屋企﹐
你個傻仔竟然又大大聲問我電話號碼﹐
除左大聲冇野叻架啦？
但
係
我
鍾
意
。
驚喜
TU
---------------------------
咩驚喜呀？
TU又點解？
啲題目愈黎愈難。
TU
TU
TU
究竟是咩呀？