第三十七章 失約

相隔一年,
終於到呢一日。
我行到約定既地點。
我攞住本筆記企響之前聖誕樹果個位一直等一直等。

同一個地點,
同一個時間。
燈依然仲未着。



-------------------------------
「都未着燈..」佢望住仲未着燈既聖誕樹嘟嘴。
「我表演一個魔術俾你睇呀﹐你望住聖誕樹啦喎。」我噠一噠手指﹐
聖誕樹既燈慢慢開始着。
「嘩!着左啦!着左啦!」佢好似個小朋友咁跳下跳下咁講,
再另轉頭望我。

呢個時候﹐
我單膝跪響地下。


拎出我買好左既頸鏈。

---------------------------------

我望住慢慢着緊既燈,
諗起上一次我對佢既承諾。

---------------------------------

「鍾凱婷﹐遇到你係我成世仔最幸福既事﹐我讀書唔叻﹐你會教我。成日做埋啲傻仔野﹐你會包容我。做左幾多對你唔好既事﹐你都相信我。我希望你一直信我落去﹐認住我依家攞住既呢一條普普通通﹐行出街十個有九個人都戴住既頸鏈﹐我終有一日會攞住一隻獨一無二既戒指跪響到親手為你帶上﹐從你爸爸手上接過你﹐同你並肩行入教堂。」我好認真咁講。



--------------------------------

鍾凱婷﹐
我講過要帶你入教堂架。
你再唔出現我就守唔到我既承諾架啦。

等左好耐,
啊婷都係冇出現。

講好左不見不散…
我響聖誕樹前等左一晚。
途中有唔少既目光望住我。

佢地既眼神彷彿同我講,


「果個男仔一個人企響聖誕樹前面做乜?」
「佢等緊邊個?」
「企左咁耐都唔走既…」
咁又係既。
平安夜一個人企響聖誕樹前面一晚。
咁諗好正常。

行行企企﹐
食飯?食空氣就有份。

攰得濟坐響長凳﹐
咁就過一晚。
到左25號聖誕節啦。
正當我又想企響聖誕樹等既時候。
熟悉既人樣企響我面前。



「陸添羽?你一個人響到做乜。」吉仔同陳希曈一齊開口問我。
「冇呀…出黎散下心啫嘛﹐ 你兩個又會黎屯門拍拖既?」我生硬咁笑出黎。
「無聊呀嘛。係呢﹐你見返啊婷未?」吉仔問我。
「…」我唔知點答佢﹐
沉默左陣。
「…你又話想食分子雪糕!行啦!」陳希曈好似已經知道答案﹐
所以佢打算拉吉仔走。
「我邊有講…」吉仔未講完﹐
啊曈已經拉住佢走。

我望住佢兩個手拖手走既背影。
我曾經都有一個女孩子﹐
俾我牽住手黎走。



心一早已經有答案。
但我總唔肯去面對啊婷佢唔會出現呢個事實。

我唔相信啊婷會離開我。

我開始好似啊婷咁寫日記﹐
亦開始依賴本日記。

我開始明白﹐
筆記對啊婷黎講幾重要。

有時睇返本筆記﹐
原來自己果日做過白痴野﹐
見到自己寫幾咁掛住啊婷﹐
真係會苦澀咁笑左出黎。



如果有一日可以見返啊婷。
就算佢唔記得曬啲野﹐
我都會將所有事由頭到尾講返曬俾佢聽。

無依無靠咁就過多左半年﹐
我同以前一樣有一班兄弟﹐
得閒去睇下星﹐
有時間就返工﹐
有力就打波﹐
冇力就瞓覺。

但唯一唔同既係﹐
我冇啊婷響身邊﹐
開始寫日記﹐
帶日記響身。

「叮—」門口傳黎門鈴聲。
「請簽收。」又係一份包裹。
我攞左之後﹐
箱入面有一大堆物件。
入面仲有封信。

--------------------------------

啊添...
你好﹐我係凱婷既爸爸﹐
凱婷做左手術已經有一半年﹐
但佢依然未醒返﹐
我既希望都好微﹐
心電圖都好微弱。
我諗佢都撐唔到好耐。

啊婷同我講過﹐
如果佢一年都醒唔返﹐
就要我執返啲野俾你﹐
特別佢果本筆記。
同埋叫你唔好等一個唔會醒返既人。
之後佢都冇叫我交代啲乜野﹐
但我諗同你講會比較好。
希望你黎緊既日子﹐
可以搵到一個更加健康更加快樂既小女孩﹐
陪你渡過之後既日子﹐
我亦好多謝你曾經俾我既凱婷有一段咁幸福既時間。
保重。

--------------------------------

「唔會係真既。」我彊硬咁笑住睇下包裹入面既物件。
有屬於我同啊婷既情侶褸﹐
我曾經響啊婷屋企見過既相架﹐
響流星雨果日畫既人像畫,
仲有啊婷本筆記。

打開最後一頁﹐
佢有記低我同佢約定既時間﹐
佢一直都記得﹐
但佢黎唔到...
佢...醒唔返...

我個心好痛。
欲哭無淚既感覺更加痛苦﹐
回憶一個又一個重現響我眼前﹐
一個活潑開朗﹐
鍾意笑既小女孩﹐
本來我仍然有一絲希望會見返佢。
但佢醒唔返。
我唔介意你俾返啲記憶我﹐
最多我地重新認識。
只要﹐
讓我重新遇見你﹐
就足夠。