那些年，當香港仲係百鬼夜行既時代 II: 49. 運頭塘村XX — 旱魃

我比呢個突如其來既劇變嚇到，一方面諗唔通一個死人地方何來黎幾條頭髮，另一方面，連鉛屍強如火車般攻勢既都比來人一擊擊潰，咁佢要對付我豈不是有如卒死隻螞蟻咁簡單!?
 
一想到呢到，我腦中空白一片，一道寒氣不由自主地從背脊直衝上腦!就係我思緒極度混亂既期間，突然有一隻手搭係我係膞頭到!我都未黎得切大叫，個個人既另一隻手已經捂住我個口，耳邊響起一把楚楚動人既女聲焦急地道: 「唔好驚動到何三娘!呢隻鉛屍就等我黎，我既頭髮可以剋制到佢，你快啲同你師父封左個福伯條新屍先，個條屍有啲唔尋常，應該唔係普通野，由佢身上散發出黎既陰氣多到連我家既掘土靈屍都怕左佢，如果我估錯，個隻野應該係變左做旱魃既郭璞!」
 
我轉頭一望，果然，來人係Elaine!聽完佢講，我都覺不妙，但係我又點可以掉低一個女仔係到姐!雖然我已經見識過佢既實力，但係頭先佢在暗時人在明，上次得手可能係純熟好彩，人地已經有左防備，今次再同佢正面交鋒就未必可以佔到上風!
 
Elaine見我猶豫起上黎，帶點怒意開口急道:「快啲啦你!係咪想我地一次過死哂係到呀!?」
 
我意味深長地望一望佢，佢亦向我報以一個堅定既眼神，我知道，錢家長女要認真了。我心中既憂慮被Elaine既眼神攻破，點點頭示意明白，隨即腳底運力，轉頭就繞過鉛屍，直奔去個何三娘到!師父係頭先為左避開鉛屍雷霆萬鈞既一擊時同我分開左，依家唔知去左邊，單單依靠墓室中個幾盞微弱既墓燈，我根本見唔到佢，佢同何三娘就好似完全人間蒸發左咁。忽然間，一道唔知係邊吹黎既陰風，竟然吹熄左墓室中比人點光左既墓燈，而且更係詭異地一盞一盞咁接住熄滅!唔單止何三娘，師父，連鉛屍，Elaine都隱沒係濃重既黑暗中。
 




我強壓心中既不安感，打起精神，向住墓室另一端快步跑去。墓室大約有六個火車卡咁長，同時亦可以比七架馬車並排行走咁闊，所以由墓室既一頭跑到去另一邊都需要啲時間。我踏住地上既屍體，殘肢，血肉，係呢一刻，我就好似處身於地獄一般，我愈跑就愈快，因為我怕自己留多一秒，我就會多一分機會比呢種無助，絕望既黑暗逼到癲。跑出唔夠廿步，我忽然聽到一連串既道家法語係前方轟然爆出，我心中不由得一驚，竟然連師父都要接連祭出多道符黎抵擋，敵人實力高強到咩程度!?
 
果然，當我循聲而至，見到師父時，佢正同一隻殭屍戰鬥緊，殭屍木無表情，眼中就只有鮮血，而我一直唔想見到既何三娘竟然暈左訓埋係屍堆中，未知是生是死。苦戰緊既師父係眼角餘光見到我，立即向我大吼: 「郭璞比福伯喚醒左，佢依家係旱魃兼夾係半完成既掘土靈屍黎，小心!」我點點頭，緊接先甩出三道早已握係手心既神雷火符，打算再配合土崩咒，以零死角戰術封殺郭璞既退路!
 
「九九輪轉，凶者必滅，天地合我，暫借天上天下雷火!離!」
 
「大地為身，物依人附，人間樂土，括盡所有!崩葬!」