「火似其勢,風似其刃,水似其靈,土似其體,金似其力!五行無上,天地縛禁,固封!」我再一次運出五彩繽紛既靈牢,因為我既憤怒,五彩光芒顯得更為靈動,照得場中光如白晝!阿明佢其實已經接近跑到落下一層,係我視線中,就只係見到佢個頭上下晃動,大家之間距離甚遠。但係靈牢既範圍都唔細!唔使三兩下手腳,阿明已經陷入靈牢既勢力之中,走投無路,避無可避。 「唔好…唔好…唔好呀!!!」阿明驚得好似熱鍋上既螞蟻咁,不斷亂跑亂撞,甚至唸咒想破開我既靈牢。可惜,通通都係徒勞無功。到最後,佢只能夠頹廢地坐返係地下,面向住我,一邊叫罵,一邊對住空氣亂揮拳,彷彿我就好似係存在係無處不在既空氣中。「我同你講丫仆街!我大日本帝國唔單止人多,鬼都多!你夠膽郁我,我就一定用詛咒十倍奉還! 」「我一死,你都無可能走得出呢到,我盡得陰陽全書既真傳架! 」「百鬼!快啲出黎護主呀!!」 睇黎佢已經驚到連大腦都運作唔到。我個陣收鬼架嘛!男人老狗係到叫乜!?我決定收走佢既百鬼同埋佢身上帶住既鬼氣,因為咁樣,佢就無得再害人。思緒淨空,心明如鏡,靈牢,靈動。 阿明係呢時候成個人已經處於一個半崩潰狀態,所以佢既思維,精神上既防禦特弱,好輕易地,我就侵入左佢既心靈,先行將佢同十部首既連繫切斷,配合埋剩餘一張既火紅符,好快就收死埋佢地,相信現今存在於香港既百鬼陣宣佈正式瓦解。 但係當我收完一眾惡鬼之後,我發覺阿明既表現竟然冷靜左落黎,仲拎起一把小刀不停係空中揮動!我心中一澟,佢唔通仲有殺手鐧!? 突然,阿明忽然又開始大叫:「山地風卜,百鬼夜行,三鬼唯瞻,界限無彊,永纏於身! 」一講完個一下,佢仲將手中既刀插入自己右邊肚上,向左邊狠狠地一拉!唔單止,佢仲係自己個肚中用小刀畫多個半圓出黎!須臾間,內臟無左肚皮既阻隔自然傾瀉而出,跌滿一地,而阿明既身軀同時轟一聲向前傾倒,倒臥係血泊之中,死了。 屋中係阿明死左之後頓時陰風大作,吹得我打左個冷震。正當我心中疑惑到底阿明做左啲咩黎時,我身上既大哥大忽然就響起黎!係靜得要命既鬼屋中,呢種鈴鈴鈴既聆聲就好似冤鬼索命咁。 我按下通話鍵,但係都未講喂,我就聽到師父急促而倉猝既聲音。「你個邊做左啲咩黎!?阿瑤突然比隻不知名既惡鬼上左身,仲不停咳血呀!」