那些年，當香港仲係百鬼夜行既時代 II: 21. 詛咒II

聽到雨瑤個情況，我當然當堂嚇得手足無措啦，但係同時都好疑惑到底點解會咁。但係當務之急唔係諗點解，而係返去睇下雨瑤到底發生咩事先! 我由高街一直跑，一直跑，穿過水街，穿過德輔道西，一路上我橫衝直撞，一路跑一路諗，如果雨瑤出左大事咁點?咁以後咪得返我一個囉?到最後，心中十五十六既我停係卑路乍街一棟唐樓前。而個五位遠洋而黎既家將當然就無跟住我黎，因為我知道佢地要開始佢地黎香港既真正任務，就係超渡高街鬼屋死去既冤靈。 我踏上樓梯，每踏出一步，心中既不安感又擴大一分。終於，我黎到師父屋企既門前。我深呼吸左一下，令自己盡量冷靜落黎。 咯咯!我輕輕力敲門。我唔敢禁門鐘，因為我怕雨瑤既狀態會突然之間因為呢下突如其來既驚嚇而有變。不過奇怪地，開門既唔係師父，竟然係一個貌似十四，五歲既少女黎開!開門迎接我既個位少女皮膚幾白下，高高瘦瘦，頭髮及肩，唔似得我戴住副死人眼鏡，呢個時候，佢正瞪大佢個雙水汪汪既眼望住我。我下意識望一望個門牌。班駁甩色既老舊門牌刻寫住六樓一室。岩喎，係師父屋企，但係眼前呢個有啲似封神榜入邊既仙女係…? 「快啲入黎先啦阿一!唔使眼甘甘咁望住人，個女仔係我請返黎既靈童黎!」師父焦急既聲音從屋中兀起，我連忙連走帶跑，一枝離弦既箭咁衝左入去屋中。 一入到屋，只見雨瑤呢個時正正坐係師父精心擺設既神壇前，而圍住雨瑤既地下附近就有師父為左鎮壓某啲野而畫既咒符。 「由頭講一次比我聽到底發生咩事!簡而精呀!」師父右手不停寫寫寫，而左手呢就不停幫符結限。 我好少見師父竟然會咁急，睇黎今次呢鑊真係唔講得少。我拿拿臨由頭到尾講左一次成個經過咁師父聽，師父時而點頭，時而皺眉，又時而歎氣，到我講比佢知阿明係臨自殺前講過既野既時候，坐係地下寫字畫符既師父，竟然忽然間成個人彈起再怪叫左一聲!我比師父呢下突如其來既動作嚇倒，唔單止係張櫈到跌左落黎，仲撞到坐係後邊聽得津津有味既個位靈童。 但係個位女靈童好似早有預備咁，佢輕輕托住我，再協助我企返好。係佢觸碰到我既個一刻，我心入邊有一種好奇怪既感覺，呢種感覺就好似我見到師父既個種熟悉感。佢扶起我之後嫣然一笑，但係無開口出聲。我突然諗起一個人，但係另一邊廂既師父，卻不停咁重複唸唸有詞: 「陰陽全書…陰陽全書…陰陽全書…」我決定先睇下師父做咩先，反正個女仔都未咁快走架啦。我走近，並輕拍師父膊頭，但係師父好似一啲都唔為意咁，仲逕自衝左入去佢放法器，古書，鬼仔既個間神秘既房仔中。到底發生左咩事?點解師父一聽到呢本咩陰陽全書個反應會咁大?我咁大個仔都未聽過呢本野喎… 與此同時，一把幽幽既女聲自我背後緩緩而起…「其實陰陽全書係由東晉術數奇人郭璞所撰，分為陰卷同陽卷，呢本書同葬書齊名，同樣成為郭璞既陪葬品，但係只係因為陰卷係打仗時被人所盜，咁多年都搵唔返，所以無論係術數界定係考古界都幾乎唔承認有呢一卷書既存在…呢個姐姐所中既詛咒應該就係黎自陰卷中既詛咒術，施術者以自己既性命去換取另一個人既性命…要破呢種既詛咒係當今黎講應該已經係無可能既事黎…」