「呵呵,我呢個老野跟你地去唔係問題,但係隻靈屍就唔可以咁輕易借出。你明架啦,呼,我地就得返呢一千零一隻既靈屍架咋。」福伯坐係堆積如山既棺材陣上,拎住煙袋,隔空拒絕左師父。濃霧中,福伯悠然自地食住煙,UN住腳,鬼咁梳乎。有時我諗,到底福伯會唔會先係錢家打骰個個。 「唔緊要。只要你地幫我拎到玉棺出黎,陰陽全書同靈屍我都可以借出! 」錢老爺思索左一陣,抬頭答應我地。從佢堅定而帶點忿恨既眼神睇得出,玉棺佢係勢在必得,即使要犧牲靈屍,犧牲福伯, 甚至賭上自己既生命!「福伯係我地錢家控屍堂既唯一堂主,有佢操縱靈屍搜墓唔會有咩大問題,你地只係需要負責拎玉棺出黎就可以。不過,個墓係邊我地無從搵起,只係知係香港,其他詳細既資料要靠你地從御鬼門既古籍中搵下啲蛛絲馬跡啦。嗯…三日夠唔夠你地搵?」【大勢力,並且以屍盜墓既一族多數會將投身呢一行既族人或者手下編入唔同既堂。以往錢家就有五個堂,分別係伏屍,煉屍,凝屍,控屍同埋趕屍。伏屍堂就係由一班外功了得既高手黎組成。佢地主要對付墓中殭屍,或者其他派系既既靈屍。 煉屍堂主要職責就係要將一啲屍體精煉成為比控屍堂所用既靈屍,當中要經過嚴格既挑選同埋配藥,配符,所以涉獵到既範圍係最多。凝屍就係負責將新鮮煉好既屍配比控屍同趕屍堂中適合既控屍人用,幫助佢地鎮定心神同埋超渡怨魂。控屍堂中既成員主要以盜墓維生,操控唔同既靈屍,係墓中穿牆入地,幫助佢地將主墓定位。而最後一個趕屍堂,故明思義,咪就係趕屍囉。大眾都聽過既湘西趕屍,基本上就係由呢班人去執行,佢地走哂全中國,人脈網極大,道上有咩風吹草動都一定唔會走漏佢地既耳仔。而係明清時代,風光一時既錢家同埋其他唔少盜墓一族都係走呢條路黎起家。】 「夠。三日後我返黎向你要人要屍。」師父屈指略算,心中有個底,就答應左錢老爺。 三日黎,師父都一直埋首係古書書海當中,而我就一直維持保護雨瑤既個個陣。Elaine係呢段時間黎過一次,想睇下有咩幫到手,不過我心情唔好,大家傾唔夠幾句我就落逐客令,打發左佢走。 三日前,我地黎討書;三日後,我地黎討人討屍。離遠我已經見到福伯背住一個同佢差唔多高既袋,抽住煙袋,晃頭晃腦咁等我地黎。而企係佢隔離既,係一個楚楚動人既少女。 「福伯,Elaine。」師父含笑打聲招呼,而我就衝佢地兩人揮一揮手。 「啊,宇文師父終於到啦。我地上車,你黎帶路。」福伯用眼神示意我地坐上架藍色既靈車。靈車係空既但係個車頭仍然寫住王家出殯四隻大字,明顯係臨時籌旗搵返黎既。唉,不過算啦,有得坐仲要要求咁多咩。 福伯坐上司機位,而Elaine打開車門坐係副駕位。自然,我同師父就坐係平時放棺木既個個長位到啦。其實我有啲驚訝,因為我無諗過Elaine都會跟埋黎。唔係我歧視女性,而係本身佢學過法,知道女性特別吸陰,入到墓只會令我地更易撞鬼,唉,就好似嘉賢臺,達德個幾次咁,如果無女性在場,可能都唔會發生咁多事!但係既然人地都跟得上車,我又唔係主人家,咁又無理由趕人落車既…唉,既來之,則安之啦! 「福伯,運頭塘村。」