墓道中突然陰氣逼人,陰氣帶黎既壓力不下於好似同時有上百雙眼望住你出醜咁既感覺!福伯既身影漸漸比濃重既黑氣所掩沒,就好似同空氣融合左,消失得無影無蹤。「你條仆街丫,跣我地!?」係發泄既同時,我都不忘拿拿臨心唸清心咒穩定心神,以消壓力,同時拎出符咒準備。我同師父背靠背,各自守住一邊,呢種感覺真係好溫暖,但係同時又好陌生,可能我真係太耐無同師父一齊戰鬥過,對上個次已經係鎖羅盤村個時啦...就係我沉醉係回憶既呢個時候,忽然一聲巨響!一個白色身影竟然從墓道頂破牆而出!靈屍挾住一股黑風威勢,雙手成爪,同時左右開弓,目標直指我地兩師徒! 「賤!」師父面色一變,當下立即抖一抖道袍,變出兩把糯米,隨意地往天空一拋!漫天米雨,形成左一個極佳既保護層保護住我地,我立即咬破中指,以鮮血替朱砂,輕輕畫出天火符,以鬼魅般既手法貼上靈屍既身上!符咒係離手一刻立即自燃起上黎,靈屍先比糯米吸走先天妖氣,賴以保護自己既金鐘罩已破,再繼而受我一符,試問又點可能全身而退?靈屍去勢頓時被阻,就好似斷線紙鷂咁重重轟入地面。我抬頭同師父打個眼色,準備以早已預準好既師承封屍符將其封起,豈料就係呢個電光石火之間,靈屍竟然唔見左!原本靈屍所訓既地方竟然赫然變成左一個深不見底既小洞! 「唉,果然早有準備。」師父收起抽左一半出黎既封屍符,搖頭輕嘆。「錢家既靈屍點解可以往往快人一步搵到墓中既屍同墓道,就係因為佢地係地底往往可以來去自如,手指被刻意煉成就好似北佬發明既旋風鏟咁,比起現代既炸藥更可以有效率地同原本地搵出主墓道,墓室既位置。唉,失策,仲以為佢地沒落得咁快係因為呢條靈屍已不復當年勇...掘土靈屍果然名不虛傳。走,我地只要比佢地快一步搵到郭璞既棺材同屍首,就可以拎黎同地交換陰陽全書!」 「但係...但係有可能咩師父?個死老野有掘土靈屍幫手,佢一定快過我地兩個盲人搵到副棺啦!」我不明所以,實在唔明師父到底有咩法寶可以打敗福伯呢對一人一屍既組合。 「哼,呢度唔係得我地兩股...嘿,數埋郭璞墓中既機關幻術啦,其實呢度唔係得我地三股勢力係到互相抗衡架,錢家過到我地,過到郭璞,都未必過到”佢地”個關。」 佢地?我心中打左突。邊個佢地?數得既都數哂啦,仲有邊個會係個墓到!? 「不過都幾大鑊。比個老坑帶左入黎,點行返出去好?」師父席地而坐,睇黎無打算解比我知邊個叫”佢地”,反而係望住地下既小洞沉思不語。 【蜘蛛墓既主墓道數目一般依奇數而建,最基本既七主墓道為生墓,十一,十三主墓道為死墓。生墓係墓構學上係被泛指為可循環。咩叫可循環呢?就係墓道同墓道之間係有秘道互通,死墓就無既。唔少既墓都係以呢個方法而建成,利弊各佔一半啦,死墓可以用多啲機關黎鎖死盗墓者,生墓就可以佈唔少既既陣法黎迷惑入侵者。】 七條墓道,姐係話郭璞墓係生墓啦?既然係咁...「師父,你快啲睇下附近有無空心磚!」語畢,我自己亦隨即左敲右敲。但係我地兩個成個傻仔咁敲左幾炷香既時間依然係一無所獲。我頹然靠牆而坐。唉,唔通我地就咁就困死係呢到? 「咯咯咯...」 「咯咯咯...」 「咯咯咯...」突然,寧靜既墓道中傳黎幾聲微弱既咯咯聲。 「一!」「我都聽到呀師父!」 但係係邊到黎既呢?我專注細聽,「地下!」我同師父都不約而同大叫起上黎!又岩喎,邊有人話過祕道入口一定要係墓牆中!?我用手猛力去挖地下發出咯咯聲既地磚,果然,比我搵到一個小小既凹位,等我可以借力,將地板一揭而反! 我心中欣喜若狂,因為除左搵到可以貫穿整個墓穴既秘道之外,我竟然見到Elaine!!