[刺客教條][長篇故] 果晚玩完刺客教條，家姐同我講……: 第54章：治療

第54章：

在這個走投無路的情況下，我們訂購了的武器終於到達了。

「阿隼，大家有冇事啊﹖你地啲武器提早左到喇﹗」駕著直升機的是小丑本人。

他派人進來，把我們各人鬆綁，再把其餘的解放軍通通殺掉。

小丑把直升機交給其他人，然後就一跳，跳進來。





「多謝陞下，呢個時間啱啱好。」我感謝。

「哎，乜說話啊，你地快啲落下面天台點算下啲武器啦。仲有我果萬幾個手下已經黎到幫手……咁我宜家就走先喇，祝你好運。」說罷，小丑就再跳上直升機，很快就走了。

既然武器能夠安全運到，亦即是說家姐防守成功了。
於是，我們安排了幾個全副武裝的小丑國士兵，在天台戒備。
由於我的手臂剛才被解放軍扭傷了，所以我現在應該立刻去到醫療室。

這時候，我探頭一看，解放軍的陣營節節敗退，他們已經退後到在中環解放軍軍營。暫時型成休戰的狀態。
似乎小丑國的支援來得及時，甚至梁天琦他們早前購買了的裝甲車已經一一到場。





「原來其餘果幾架裝甲車比佢地買左。」其中一個小丑國士兵說。

「好啦，各位，我地落返去先啦，咁果邊幾個拜託你地守住呢度喇喎。」我說。

「係﹗」

搭過升降機，來到下面的天台。
兩個大貨櫃就坐落於天台的這個花園，家姐和其他成員一起在點算這些武器。





「家姐﹗」

「細佬豬你冇事啊嘛﹖」

「冇啊，係扭親隻手姐……」

「下﹖﹗比家姐睇下……」

「家姐啊，呢度多人啊……」與其說是害羞，不如說是對失而復得的家姐有點不習慣。

「哎，唔玩你喇，呢度有我地搞掂得咖喇，快啲落醫療室啦，順便睇下阿純點喎。」

「好啦。」

戰事暫告一段落，一走到議事廳旁的臨時醫療室，門口已經排滿了人。




有的站著，有的被背著，還有的是被抬進來的。
所以我只好跟著人龍排隊。

「你咩事啊﹖」醫療室內的護士不是我們醫療組的人，只是平時在醫院工作的。

「我扭親隻手。」

「扭親手啊，攞住張飛仔去等叫啦。」

「喂姑娘，但係我好痛喎，我仲要幫手咖。」

「呢度個個都痛咖啦，話知你係邊個啦，我地都係跟程序做野姐。」不是自己醫療組的人果然比較囂張。

等了大概十多分鐘，終於叫了我的號碼。
幸好幫我治理的是聰明豆和幾個醫療組成員，她在休戰後到醫療室支援大家，所以我可以安心的把手臂交給他們。





「豆豆，見到你就好喇。出面班姑娘幾咁串。」我說。

「姑娘係咁咖啦。佢地又唔係我地嘅人，都冇咩權去命令佢地啲咩，佢地肯幫手已經好好咖喇。」她們一邊幫我療傷一邊說。

「係呢，女神啊，阿純啊佢地點啊，無咩啊嘛﹖」我問。

「你第一樣唔問下我點先嘅﹖」聰明豆叉著腰氣著說。

「咁……哎啊，豆豆啊，唔好嬲啦，因為我知你咁叻，一定會冇事嘅。」

「嗯嗯嗯好喇好喇，要快手啲喇，唔係阻住其他人。女神佢頭先拗柴，宜家阿健陪緊佢啦。阿純膊頭粒子彈呢就已經攞返出黎喇，不過我地冇麻醉藥，頭先佢就嚇暈左。你搞掂去後面睇下佢啦，可能醒左咖喇。」聰明豆說。

包扎好後，我走到後面傷者休息的地方。這時候，阿純剛剛醒來。





「喂阿純你點啊﹖都話左你唔死得咖啦。」

他望一下我說：「喂你知唔知啊，頭先攞返粒子彈出黎痛到我死啊﹗」

「咁冇麻醉藥係咁咖啦，宜家冇事咪好。」

「咪就係因為你囉，原本我知道，應該避得開果條狙擊友咖，就係比你推一推，搞到比之後果條友打中咋。」

「喂，你咁係咩意思啊﹖我幫左你你仲講啲咁嘅野﹖」

在另一邊的阿健和女神發現了，阿健走過來安慰著：「算啦阿健，宜家冇事咪好囉，阿隼都係擔心大家咋嘛。」

「我宜家隻手好似痺痺到唔係好郁到啊，唔知會唔會郁唔到添咖。」

「咁你都唔可以賴落我度咖﹗」





「我知，你地一直覺得我廢啊嘛﹗一直都幫唔到手啊嘛﹗我知咖﹗」

「喂，你邊可以咁樣無理取鬧咖﹗」

「喂，呢度好多病人咖，要嘈出去嘈﹗」阿健調停失敗，護士來到說。

在場的各個成員都幫忙說：「係囉，一人少句啦。」

「冇事咪好囉。」

阿純就站起來，帶著煙盒一步一步走出醫療室。