[刺客教條][長篇故] 果晚玩完刺客教條，家姐同我講……: 第131章：斧底抽薪

第131章：
 
在丁sir和谷守糾纏過後，另一名聖殿騎士高層，保安局局長黎棟國在這個時候來到。其間，陸源良把丁sir困在結界內，豈料黎棟國從陸源良接過手中的結界終端機，隨手把他摔成碎片，意味著丁sir將會永遠被困於結界之內，同時表示著悲憤的游也多也指示大家必需反擊。
 
回到眼前煙霧彌漫的情景，大家已經帶上耳塞，游也多亦已經吹起魔笛。
阮桐貴見狀，水平的張開雙手，做出蜘蛛俠吐絲的動作，蜘蛛絲就從他手中，網狀的發射出來。
 
就在這千鈞一髮之際，一陣大風從我們面前吹來，一下子就將蜘蛛絲吹走；幸好左又近在風吹來的方向放置了一道電子牆，把大風擋住了，雖然這大風不會把我們吹走，但至少會讓大家失去平衡而跌倒。
 
「游也多你枝笛唔係可以麻痺人咖咩﹖點解佢地好似一啲事都冇咖﹖」露比問。




 
「哼，你地唔知風可以吹走音嘅攻擊咩﹖」谷守拿著大扇說。
 
「就係呢個賤女人，仲估唔到把扇仲可以吹走我嘅笛聲。」游也多說。
 
原來這個就是游也多較早前對著谷守會輸掉的主要原因，就像很多遊戲中所謂的屬性相剋，一種屬性攻擊另一種比自己優勝的屬性時，效果好多時都會減半甚至無效。
 
「嘿，呢啲就係你地嘅不足之處喇。宜家我命令你地全部人……拉曬佢地返去，捉唔到就殺曬佢地。咦﹖好似都差唔多天光喇，訓返陣起身去飲早茶先。」黎棟國雙手放在腰後，轉身就走。
 
「局長慢慢行啊。」旁邊的手下就像一個參扶老佛爺的小太監般。




 
「唔好講到咁輕鬆啊﹗我地係唔會比你也文也武咖﹗」我正想強行上前攻擊，可是包圍我們的聖殿騎士已經回復狀態，立刻舉槍指著我們。
 
「你聽唔到局長講咩咖咩﹖唔想死就乖乖投降﹗」谷守用大扇指著我們，同時陸源良和其他聖殿騎士手下都沒有鬆懈過。
 
「我點解要聽你地講啊﹖局長局長……局長又唔係我阿頭。」我說。
 
「局長的確唔係你地阿頭，亦都唔再關《聖音騎士》事……」
 
在我和谷守的演著文戲時，背後的露比細聲問：「咁宜家點算啊﹖」




 
「宜家我地條橋失敗左……大家有冇咩idea﹖」家姐問。
 
「有就有嘅，不過對成橦樓可能有危險，大家要有心理準備……」阮桐貴說。
 
大家都得悉了阮桐貴的心思，一同看著方次郎。
 
「既然係咁，好啦，陣間大家小心啲。」方次郎摸著頭說。
 
「唔使驚喎，呢啲咁嘅野我地一早慣曬啦。」阿純指著自己說。
 
「不過你地會唔會唔捨得呢個地方咖﹖」露比問。
 
「我諗你地都好清楚……地方冇左梗會唔捨得，但係都身不由己。」左又近說。
 




游也多也難得的平靜地接下去說：「地方冇左就話可以起過，人冇左……」
 
在他們相討新對策時，我一邊在留心聆聽，一邊繼續跟谷守和陸源良對話。
 
「……你估風繼續吹咩﹖唔好幫聖殿騎士啦，夏天熱屎辣辣，你企出去幫全香港人撥涼仲好啦﹗」我說。
 
「你地班刺客個個都中二病上身，暗殺人點知次次都比人發現，正式最出名嘅刺客就係最失敗嘅刺客啊﹗」陸源良回敬。
 
對話已經變成了對罵，而且內容亦越來越沒有質素，完全是幾個小學雞在討論誰是BL、GL和H般，期待著誰會以「你阿媽個波罩你啊」來終結罵戰。可是如非為了拖延時間，好讓大家想好對策，我才不會跟對面這樣瘋下去。
 
「好喇，講埋曬啲廢話，你地去拉佢地啦﹗」糾纏了一段時間，他們終於有所行動，而我們也想好了對策，現在只好靜待對手進入我們的預計之內。