樓奴: (1)

佢係陳永發, 典型八十後, 咩都要好, 咩都要威, 係facebook見到人地去日本東京飲飲食食就流晒口水, click一click refresh button, 又見又有人upload去完歐洲既相, 佢條品味人生走去流浪搵自我既筋又俾人挑起埋…死! 原來佢呢位唔多熟既同事周仔今次去歐洲係同埋女朋友去. 唉…想點呀, 小背心熱褲…樣靚身材正再加上5D3配埋支大光圈鏡, 張張相好似睇緊林宜芝咁, 永發睇相睇到扯晒…

永發睇相睇到扯晒火, 就黎酸到Ph值去到1, 一邊睇住周仔攬實老番林宜芝, 一邊口中念念有詞鬧 “PK PK”…鬧到係房瞓緊既阿爸都嘈醒埋.
 
“喂, 阿發, 成兩點喇, 你仲唔瞓做咩呀, 仲係咁講粗口鬧邊L個呀, 你幾時學到咁L爛口架?!.... 喂! 原來你係度睇甜網! 唔怪得仲唔瞓啦! 你睇咁多呢D囡囡因住睇壞腦呀你, 你估呢個現實世界有呢D囡囡俾你呀, 你咪發夢啦仔, 係發都而家上床先放啦…
 
永發俾阿爸哦幾哦, 頂唔順熄機, 爬上佢係廳既碌架床瞓覺…對眼係合埋, 但係永發死唔眼閉咁諗
 
“咩現實世界冇呢D囡囡…周仔條PK咪有囉! 佢條PK一定係歐洲同林宜芝晚晚都…妖…點解我咩都冇, 冇女食, 冇得去歐洲品味人生, 又冇得去東京潮聖…其他人就咩都有,咩都萬事如意, 我就住係呢間公屋, 瞓碌架床, 為既就係聽日有精神返去打份狗工!”
 




唉, 永發就係咁, 份人比較negative, 咁事實佢係比較唔好彩, 至少…佢唔似佢D朋友咁好彩, 不過佢都唔係只識怨天尤人, 唔似好多人咩事都鬧政府鬧地產霸權,佢之前決定左買樓, 決定離開呢間公屋, 去建立佢自己既小天地, 希望第日更加可以憑層樓升值賺第一桶金, 買第一架車, 媾第一個屬於自己既林宜芝.