樓奴: (16)

“Gennie!”
 
呢個時候一把男聲係黑暗既轉角位傳出黎, 一個男人身影急步向永發同Gennie走過黎
 
“女呀, 咁夜呀, Daddy擔心你, 落黎接你呀, 有手足話我知近來呢邊多風化案呀, 多左一D憤青黎呢D區攪事, 其實又係既, 將憤怒同不滿發洩係我地中產身上有咩用, 根本問題唔係我地度, 唔通你考第尾又去打考第一果個呀? 去強姦非禮俾你唔合格既老師咩?.....”
 
個男人係咁不停講, 我覺得佢講既野冇錯, 不過心裡認同都唔好講到出口, 咁會好hurt D人, 何況呢種思維就算係幾咁對都好, 你都要去解決社會上既矛盾, 你唔去做, 你難保有D人真係會做出唔理智既事…
 
“呀…Sorry, 掛住講, 哈哈, 女呀, 呢位係…你朋友…?” 個男人講
 




“世伯, 我係Gennie 男…男…藍田光華苑個盤既買家, 同Gennie傾野傾晏左, 咪送佢返屋企囉…”永發差D答人係Gennie男友, 真係好險呀衰仔
 
“噢, 唔該晒呀, 我粒女咁靚, 真係要人護送架, 個Eric 又係既, 明知都就娶我粒女啦, 都唔睇緊D既…” 呢位阿叔似乎睇得出永發同Gennie關係唔簡單, 講起野黎句句有骨.
 
“Daddy呀, 唔好亂講野啦, 人地始終係客…”
 
“怕咩呀, 講清楚好D呀, 費事亂啦, 我份人就最唔鐘意立立亂, 因為我係當差既, 而家雖然退左休, 都仲係最鐘意維持秩序, 係秩序呀,秩   序   呀!” 佢真係句句有骨
 
“世伯, 打攪晒, 我都係走先喇, Gennie!我對個盤有咩唔明再Call你…再見再見”永發想閃人
 




“咪住! 你個單位係光華苑…?邊層咩室呀?” 個男人問
 
“52樓G!”
 
“咩話! 咪十幾廿年前有單墮樓案果間?! 女! 你點會做D咁既盤架….”
 
我睇真D, 原來呢位阿叔係當年貌似林雪既老差骨!