我老母話我有未婚妻: 3
當我聽唔入耳望街邊d靚女既時候...佢突然靜左唔再出聲
原來佢係到發嬲..
好啦對唔住呀,我聽緊嫁
[唔洗啦,反正你都唔想聽...]
唔係呀,岩岩你講到果個露亞棋俾人捉返佢原本個世界呀麻
[露棋亞呀!露咩鬼亞棋呀~之後一護去救佢,幾感人]
見到佢因為漫畫情節灰個樣..真係笑左出黎
之後佢又問我,不如今年一齊去動漫節,反正到時都應該未走
我就話是但啦,你鍾意啦~反正我肯定你到時會唔記得
之後佢就問我點解咁講我只係淡淡講左句...無,習慣就好
然後苦笑左一下……其實係我諗返好唔開心既事...
佢見到我突然灰左
大慨估到我諗緊咩
之後就攬住我隻手~
[放心啦,應承你,一定會同你去好無呀未婚夫大人]
我見到佢咁樣...
只係覺得個心好安慰
摸摸佢個頭同佢講
[多謝你啦未婚妻大小姐~想食咩呀?]
佢諗左陣
[甜品!]
[正餐食甜品!?]
[唔得咩]
[得得~~去食甜品啦咁~~行~~]
生活真真正正開始起變化,成日無人既屋企,變左多左佢係到
煮飯會煮多一個人,買零食會買多一人份,睇戲會叫埋佢
有時候佢早放重會去我學校等埋我一齊返屋企
比起戀人,我地更似兄妹,我成日都咁諗
近日佢每朝起身都見到眼紅紅...大慨都係喊過黎
因為聽聞佢媽媽好似開始返去新加坡了
而且平時佢係我地面前都只係笑...都無聽過佢話唔開心之類...
佢偷偷地喊過都唔出奇..
我地一星期返五日學,有時候放學時間岩,就會一齊去超市買日常用品
唔知幾時開始,佢知道我買開咩洗面乳,潤膚膏,佢話佢自己都要用先留意我用咩牌子咋喎
但係我又好奇,佢好似無朋友咁,而且佢咁既樣,衰極都有男仔追呀麻?
於是我係超市無野做期間,口痕問佢點解無男朋友
佢呆左呆望望我,[因為我鍾意你]
之後佢就補充多句[既柚子蜜]
[關咩事on9你唔好扮路小雨啦,唔似呀低b婆,你零氣質呀,人地高貴過你幾多呀]
,隨手扔左包排包落車仔
[喂!唔好買排包啦,買提子包!]佢行過黎扔多左個提子包入車仔。
[你都未答我~點解無男朋友同埋唔識同朋友出去呀~~]
此時我地己經行到去生果部…佢都拎起左個蘋果望住我笑
[ok,無事啦,買完野走啦好無呀未婚妻小姐]
[好呀~未婚夫先生~~你真係乖既姐,買埋呢個蘋果啦咁]
我唔想成為第一個係超市俾人用蘋果扔到入院既人
回家途中,佢又突然問我,開放日果日去唔去佢學校,佢話佢會係家政室幫手整湯丸
我問佢下咩你整野食既咩?
佢話緊係識,只不過見我成日主動煮先唔煮喎
(信你一成呀低b露)
之後我就問佢時間地點啦~~然後就返屋企
我重記得果陣時2月中播緊學警狙擊
佢晚晚見到唔唱k都屌佢d戲屎,同埋話江若林公主病發作
但係又要屌又要睇,真係香港人風格
我問佢,如果唔唱k同基佬風俾佢揀做男朋友,你會揀邊個
佢諗左陣竟然答我謝天華
我真係輸俾佢既思維,我無好氣話係啦係你就拎個5蚊當係同佢既訂情信物啦咁
之後佢衝左入房,拎左兩個5蚊出黎
佢話一人一個,唔準用,當護身符
我問佢,你唔係打算下次拎5蚊銀扔我個頭呀麻?
一係我買多幾個蘋果俾你,你唔好再扔我好無
之後佢笑左下就無理我入房
之後佢又跑出房,同我講,開放日果日會等埋我先食野,所以叫我唔好偷偷地食左先
但係又奈何..........
佢開放日果朝其實有中學同學約左我唱klunch,旺角唱完去沙田好快姐我估
咁好快又過左一星期,果日星期六,唱完k食左個牛扒薯菜就扔低班仆街去左沙田搵露露~
去到沙田,人生路不熟除左博文館之外咩都唔識
於是打俾露露問下,又話坐咩8xm巴士會去到佢學校
結果我坐的士去
坐左我五十幾蚊.....屌你
去到學校門口我又打俾佢問佢係幾樓,然後去到家政室,見到佢著住校服帶住圍裙,紮起左個頭真係好可愛
一入到去佢就捏我面問我做咩咁遲黎,佢話佢煮左好多野食俾我...
之後我話係咩~
之後佢突然靜左...
檸轉身無講野
我都唔知做咩,無啦啦發嬲?
[好啦唔好嬲啦小姐,我下次準時ok?]
[都唔係嬲呢樣..無野啦...你重食唔食我整既野呀?我睇你都食唔落嫁啦]
佢又知既喂大佬?
[下?緊係食得落啦!我好肚餓呀,趕住出黎都未食野..]
要呃人先要呃到自己!
[哦..咁我餵你食好無?]
咁荀!?
[哦!緊係好啦~~~]
之後行到去個角落到,我一坐低,佢就開始餵我食佢炒既炒飯...
不停咁"不"俾我食....
我連吞都未吞....佢又餵一啖....
而且我真係食左野,飽飽地
之後我掩住口話俾我吞左先
佢放低匙根...係到攪盤炒飯果陣時係到問我
[你係唔係重要呃我?]
我心知大事不妙...
[好啦對唔住呀...我係食左少少野...]
[你知唔知我今朝係家政室幫手到依家等埋你黎先食野呀死人頭...你竟然自己去食野先..]
聽到呢到我都知自己衰...
[原諒我啦好無..?]
之後因為我口含住堆飯,所以口齒不清
但係因為咁佢又笑返...
呢個未婚妻真係低b
你點知我食左飯嫁?
[你呀,你睇下你呀大頭蝦,重有d蒜容汁係件衫到...等我幫你擦擦啦]
佢比起想像中溫柔,細心,體貼
雖然佢有d惡,粗魯
但係往往就會令我感到好溫暖
而且佢真係一啖沙糖一啖屎
傳說中既糖果與鞭子咩
當我幫佢手洗緊野兩個人第一次同一個洗手盤洗野既時候
突然校內果個廣播器話咩野禮堂有一個歌唱比賽睇
露露問我去唔去睇,我話無所謂
之後幫佢擺埋條圍裙入書包之後就陪佢落去,落到去禮堂
無任何座位,個個老師呀家長同學企哂係到,台上面有隊學生band,前面有條友唱歌咁啦
好似d小形音樂會,d氣氛都ok,d燈光效果都幾正
就係呢個時候,有5個個女仔走埋黎同露露sayhi
之後露露介紹俾我識
名我唔記得,只係知露露原來係學校都幾靚女
班女仔問露露我係邊個
露露諗左陣,我就搶答話係佢表哥咁樣
之後班女仔:哦~~~.之後就去左後台
我問露露你係學校係唔係好多人識,佢話算係
但係都係hibyefriend,佢話連我媽媽死左都係得老師知....
其他人都只可以算係酒肉朋友
而d男仔,都只會對佢千依百順...
佢話最睇唔起果d為左追女仔而扮哂死狗既男仔
聽到呢到我都寒左下
因為我就係佢睇唔起果種人
諗兩諗又係既...
露露樣又唔差,又識做人,又識拿捏人既心理
基本上佢受歡迎都係件正常既事..
台上面果隊band終於完左表演落左台,呢個時候個好似安德尊既主持(真係好撚似個學生哥)
就話歡迎所有人士上黎唱首歌,呢次活動完左之後,最高分果個參賽者可以拎一箱蘋果返屋企
啦,黎到呢到你地會話好假
但係我自己中學果陣時都試過比賽獎品係一箱水
我以為得我學校咁on9姐,估唔到其他學校都係咁
[又唔係橙同柚子茶,你放棄啦]
我小心翼翼咁勸露露
[我呀我呀我要比賽]
佢己經揮緊手走向舞臺....
我肯定佢,絕對100%reallyexactly係想我死係佢果箱蘋果之下.......
[唔得呀主持,我想參賽先...]
我咩都無諗走向舞臺...向住安德尊揮手...
[好啦咁,露露同學你就俾呢位外來既先生唱左先好無?]
[唉好啦咁]
你唔洗指意會拎到第一次之後將箱蘋果送返俾學校呀八輩子....
我上台同露露擦身經過果陣時,我聽到有一把好低沉既聲怨念咁講出呢句對白...
橫死點死...是撚但啦唉仆街
上到台,個腦空白一片,下面又學生又家長又老師....
安德尊問我唱咩歌問左幾次我都聽唔撚到
[我...我唱...]
呢個時候露露係台下面大叫快d啦
好好,咁就果首啦死妹釘
[如果我變成回憶..]
安德尊同我講,無呢首歌配樂點算好
我同佢講你唔識上youtube咩...
基於有伴唱,我心裡面真係放下心頭大石...
露露聽到我話要唱如果我要變成回憶,佢都下左下我見到佢
攪左陣...
我終於聽到音樂...
安德尊示意我可以開始唱...
唔知有無巴打係合唱團或者學校主持果類形
老師教過我地,如果一緊張就唔好望人,望住禮堂個大鐘
但係我發現呢間學校既禮堂無大鐘....
唉....咁...
我唯有揀我唯一識既人黎望啦
我望住露露,只係諗住快d唱完可以俾我落台...
但係我又諗,呢d機會可一不可再,或者以後無機會再唱歌俾露露聽
而且又諗起細個讀中學果陣時係合唱團既事..
唔知點解突然心情又好低落..
然後加埋d歌詞愈唱愈灰...
[如果我變成回憶...退出了這場生命...]
歌仔就唱完,場又靜哂,我心諗有伴唱難聽極有限掛....
當我鞠完躬行返落台果陣時,露露衝上台
我心諗你洗唔洗咁心急拎箱蘋果扔鳩我呀
點知佢抱住左我....[唔準呀,你唔準死呀,你再死就無人對我好嫁啦...]
下
[做咩鬼呀露露,我又無話要死.....你放手先啦好多人望住,同埋你喊咩姐..]
[我諗起我媽媽呀...]然後佢又抱住我喊多次
呢個時候安德尊就話咩野感人到令露露喊我心諗你on9啦...
結果我見露露重企係到喊,阻住條路,於是索性抱起佢,搬返佢落去...
之後我同佢平排,摸佢頭安慰佢,一邊聽其他人唱歌...
結果露露掛住喊,無上台唱歌
到最後,冠軍好彩唔係我
但係都有安慰獎
兩個蘋果.............
我拎住兩個蘋果望住露露,露露笑住叫我俾一個佢....
我都知我呢次死硬嫁啦...
就當我俾左佢之後...
我閉上雙眼,抱住哀莫大於心死既態度
準備接受佢扔鳩我
點知等左陣都無人扔我,於是張開一隻眼偷望
見到露露原來係到食緊個蘋果
[喂,未洗嫁低b妹!]我搶左佢個蘋果走
[唔緊要啦,無事嫁啵,我好肚餓呀,我頭先掛住餵你食,我自己都未食]
[咁不如你快快趣執埋野,我帶你落canteen食野啦傻婆]
[好啦好啦,邊有未婚夫咁鬼長氣嫁...]
我->->
[係係,未婚妻大人~~一陣食飽飽帶我遊校園好無?]
[你真係想遊咩~~?]
[想知道你平時既學習環境麻~~]
[好啦~~等我食飽再講!快d陪我落canteen]
食完野,露露帶我遊佢既校園,想當年自己係中學既生活都算開心
依家見到露露又好開心咁介紹返俾我聽
唔知點解覺得好得意
然後我地一齊合照左幾張相就返屋企啦~
一上巴士,露露己經訓到隻豬咁
落車都唔知,但係見到佢累到咁,唔忍心叫醒佢,於是就背住佢,
一起身果下差d將佢個頭撞車頂
於是用隻手護住佢個頭咁慢慢落車,而我就將佢個背包背係心口前面
一路行,一路諗究竟露露係堅強定扮堅強既人..?
自己唔開心既時候,都有望有個人陪係自己身邊
或者我係佢心目中只係果個傾訴者
又或者佢真係只當我係表哥
但係無所謂啦..
最緊要露露開開心心,過埋呢段時間,到時就返新加坡..
返到屋企...阿爸阿媽同家姐出左街食飯,話叫我地自己食自己
okok
放低左露露係床,我自己係廁所換好衫...
突然聽到有手機響
應該係露露的
出到去係佢個書包搵到部手機
一睇,原來係林姨姨
林姨姨話只係打黎問下露露近排點,夠唔夠錢洗(我終於明點解露露有錢用)
我話佢夠呀,今日佢先開放日咁
林姨姨又問我,點呀,覺得露露點呀,又問佢有無麻煩到我地
我就話無呀..當佢係妹妹咁囉..
之後林姨姨話遲d再傾..
咁就收左線,當我想蓋返好部機果陣時
見到手機桌面係我上次陪佢買手提電腦果陣時我係巴士訓著個樣,佢重靠左個頭埋黎同我合照
但係見到又覺得...幾開心..
然後就扮無事擺返好佢手機
然後開始進入功課週,一堆又一堆既功課同pj要交....玩既時候都少左..
而每日同露露見面既地方都係得返係屋企..而每次我掛住埋頭苦幹對住部電腦做功課既時候
佢都只會坐係沙發望住我...
而每次我一開夜車,佢都會沖一杯柚子茶俾我..然後同我講聲唔好太夜訓就入房訓...
而我有時候係功課上面遇到困難/挫折,都好想抱一抱佢,然後喊一陣...
我係果種遇到挫折會好想有人支持果種人...
但係奈何我又唔可以咁明目張膽抱住佢...
只能每次望住佢既背影行入房…
功課週既過去..
本來打算約露露出去玩一日輕鬆下...點知佢話約左班同學出去玩
咁我咪算囉~於是約返自己d朋友出去玩..
又係一大堆男仔,去打下邊爐又一日
然後怇地追問我同露露點,我話都係咁啦
然後去其中一位同學屋企玩…玩完,都凌晨兩三點...
唔知大家有無試過同我一樣...
每次一班人玩完,各自返屋企之後...個心都會覺得好寂寞好孤單
而且因為無車返屋企,好彩朋友屋企係同區,可以行返屋企
沿路一直哼住歌行...行下行下就返到屋企...一入去就見到露露係電梯大堂....
[露露?]
[咦?八輩子,重以為你係屋企tim,你今日出街咩?]
[係呀...]
其實心裡面己經灰到仆街
但係奈何又要對住佢笑...
一入到電梯…兩個人全程deadair....
突然露露開聲話
[呵呵,同我地第一次見面既畫面咁似既]
[係呀~~哈哈,你重俾我嚇到tim之後..]
[係喎!今次你要俾我嚇返呀]
[好好..一陣出去你行先,我跟你後面俾你嚇好無呀未婚妻?]
[緊係好啦未婚夫]
....................
一出去..露露好開心行係前面,但係我己經係後面望住佢背影..
覺得佢愈黎愈遠...我同佢大慨只係一對好朋友?好兄妹?
我個心好亂,我都唔知自己做咩..
我跟住佢行...當差唔多到當日我轉身果個位果陣時,露露問我準備好扮驚未
我無回應佢,佢一轉身~哇一叫,我無俾反應佢..望到佢既表情由->->
[八輩子?]佢側一側頭望住我..
我終於忍唔住...抱住左佢,
然後係屋外面條走廊係到大喊.......
露露無推開我...
我其實知自己諗咩...只係我唔敢去認
我驚,我驚佢會拒絕我,我驚,我驚佢會驚左我
我驚.....
我驚佢會離開我呀
心裡面既話有好多...好多好多,多到我都唔知講邊句先好...
露露一路無推開我仍都無講其他野....
但係當我有返意識既時候...
我反而親手推開左露露...
我同佢講,對唔住,我飲左d酒....無事,返屋企返屋企...
但係佢企係原地同我講
你飲得酒咩...你一飲酒就會敏感..而且我聞唔到你身上面有酒味...
我..
企左係到
又喊一次...
遇到一個了解自己既人難過遇到一過鍾意自己既人...
我收拾好心情...
笑住同露露講,無事呀,快d返屋企啦未婚妻...
之後佢........慢慢行近我...
....
[露露..?]
突然...佢一拳打落我個肚到
[哼...你再講大話我就拎蘋果扔你....同埋你唔向我坦白,我就唔理你...死人頭]
到屋企佢粒聲都唔出,就入左房無出黎,我訓係沙發,
諗返自己岩岩做過d咩同埋佢最尾果句說話係咩意思....
諗諗下就訓著左...
第二朝,我發現俾d野壓住隻腳...以為老母又放d咩係到,正當我燥底想屌過去果陣時,
原來係露露坐左係我隻腳
我踢左左兩腳之後就無理佢
點知佢又強行坐上黎壓住我隻腳...
我燥底問佢做咩撚野
佢又唔出聲...
過左陣,我頂唔順,問佢咩事
佢問返我,肯坦白未
我諗兩諗,你唔通想我晨早流流牙都未擦同你表白咩屌...
於是我又問佢,你想我坦白d咩?
[你琴晚其實咩事..我只係好擔心你..你可以唔同我講既,我無所謂..]
佢望住我雙眼講...
原來佢係擔心我關心我..而唔係想為難我...
係果刻知自己怪錯人真係好內疚...
於是我一五一十將自己做功課d事啦,學校發生過咩事,
同埋將呢十幾年二十年一直壓係心底既心事同經歷講哂俾佢聽....
講到最尾...我發現自己竟然將好多平時無講過俾人聽既事都講左俾佢聽..
露露聽完…dup低頭無講野…一直係到嗯............
當我想講算啦我講笑嫁咋既時候
佢突然同我講[不如我地今日去跳蚤市場行下?叫埋你d朋友]
下....?
露露出奇地第一次主動叫我叫埋d朋友出去玩,我都覺得出奇
但係佢咁講,我就乖乖地咁聽呢個未婚妻說話啦
call左俾幾個朋友,約好時間地點換埋衫就出發
去到跳蚤市場,個跳蚤市場係海邊有釣有bbq果種,但係我地一入到去就係掛住係到行果d小攤檔~
而且發現有好多有小遊戲玩果種攤檔
當我地行到去一間類似玩具攤檔既店鋪
有得玩用一個波仔扔跌d禮物既遊戲
當我地一班無為意行過左既時候,露露突然企定定望住個攤檔,我問佢係唔係想玩,佢都無俾反應我
佢只係望住禮物架果面
一把純白色既日本刀(?)
[喂,咩黎嫁露露?咁入神既你望得]
[咦,袖白雪喎?],一位朋友係後面大叫出黎
袖白雪
[咩黎嫁有無人可以解釋下俾我聽]
[露棋亞把刀呀....]
露露默默係咁講呢句野...
我就知係關於果套叫死神既動畫啦...
[露露,想要?]
佢聽到我咁講之後,佢個鼻哥隆同對眼張到勁大E起排牙對住我係咁點頭
[老闆,幾錢玩一次?一次有幾多個波?]
個老闆同我講40蚊10個波貴到喊...
但係露露又想要...
諗兩諗...[老闆,直接賣把刀俾我呀,開個價..]
[唔得喎後生仔,年中好多人都想要呢把刀,賣左俾你我咪無生意?一係我俾你40蚊11個波啦~]
我心諗你都唔知係唔係痴撚實左把刀係到呃錢
但係都無理,我扔低左40蚊,拎住11個波,慢慢係到扔
結果?
11個波,扔到4個公仔都扔唔到把刀落黎....
露露抱住4個公仔望住我好期待我再扔40蚊此時此刻真係啞子食黃蓮
但當我打算扔多次既時候...發現把刀柄原來岩岩己經俾我推左出黎
於是我再放40蚊,今次決定左戰術!
我係下面扔上去,連續用4個波向個刀柄扔
之後皇天不負有心人終於令把刀離開左塊木板,直立式跌落地下
Yeah!!!!!!!!!!!!!!!!!!!!!!!!!!
但係呢個時候露露佢9秒9衝入去接實左把刀
佢話驚跌落地整花把劍
我真係俾呢個未婚妻吹漲...
然後露露話俾佢扔埋其他波,叫我地行去小食亭搵位先...
於是我幫佢拎住4隻公仔同埋把刀行開左先…
當我同班死仔買好哂野飲同野食既時候,都見到露露由好遠咁跑過黎,
但係又唔知佢收埋左d咩係背後奇奇怪怪...
於是我走埋去,但係我一想行去佢後面,佢又轉返面向住我
之後我地轉左幾個彎,佢終於肯停,拎佢背後既野出黎俾我睇
............我見到真係呆撚左
一個蘋果咕順..
[你對蘋果有幾怨念呀小姐]
[咩喎,人地見你唔開心,想你帶埋班朋友同埋我出黎陪你散下心,點知岩岩你幫我扔刀,攪到好似今日為左陪我先出黎咁...岩岩呀,我見到有呢個蘋果咕順,咁我咪扔俾你囉....以後每當我想扔你蘋果,都只會用呢個扔你,我應承你好無呀,傻佬?]
佢面紅紅咁同我講...
我只係心裡面甜到笑左出黎
[好啦好啦,辛苦你啦~~傻婆~~啦~~請你飲啦~~柚子蜜呀~~]
此時我係背後拎左盒岩岩係小食亭買既柚子蜜俾佢
佢:->->
[死傻佬..我罰你今晚要俾我扔蘋果]
[係係~~未婚妻大人~~]
咁唔知大家有無去過類似既跳蚤市場啦
但係我地去果個真係好好風.....
所以順手放埋風箏
而我又唔知你地知唔知,有d放風箏既線為左無咁易斷,就用d有玻璃纖維既...
但係同時都好易介斷人地條線
人類做d野有時真係好撚矛盾.....
咁我地一行人一齊放...介下介下...得返我同露露果隻未斷
露露就話不如比賽!
邊個最先斷就要買一件禮物俾對方
咁我好就應承左佢啦
一開始我都無突登打算介斷佢,點知個衰妹突登走埋我身邊,想介斷我先,我立刻輕輕力推開個死妹丁,點知佢用大脾夾住個線軸,之後用隻手拎刀吉我
結果,係佢同我班朋友既騷擾之下...我終於俾佢整斷左
當我問佢想買咩既時候,佢拎住把刀指住我賴有型咁講
[哈哈哈哈哈,新一期死神~~~]
[漫畫呀漫畫呀蠢佬]
哦
[唔打算買衫買鞋買袋果類形]
[漫畫,我要新一期死神呀...]....
[ok,但係話時話,你幾時同班死仔咁fd?fd到佢地肯主動幫你你收左佢地做觀音兵?]
[咩呀?我地第一次見面己經有交換msn啦..一直都有chat所以我地都好熟嫁啦]
你班死仔唔聲唔聲原來己經出左手...
[喂,話時話我都未有你msn]
鬼咩~日對夜對,洗鬼用msn但係聽到班人有我又無攪到我都好想要
[呵~~你要我msn做咩?你有我日日陪住你咪夠囉傻佬]
...呢個女孩子真係好可愛...
[係啦係啦~~好啦,搵埋班死仔,就出返去市區食飯好無呀?]
[好~~我要食烏~~~冬!!手打手打烏冬!]
成個細路女咁...
當我搵埋班朋友,就行返出去坐車,沿路大家有講有笑~~
好耐無試過咁開心,可能有露露係到,氣氛都唔同d
而且班人都係到講笑叫佢做八嫂
心裡面真係sweetsweet...
食完烏冬,大家各自各返屋企,我同露露選擇慢慢行返去,順便消化下~~~
行返去期間露露一直只係望住我傻笑~
係到話多謝我
之後我問佢
[因為把刀?定係..??]
[因為你會買新一期死神漫畫俾我]
我車...重以為因為我
返到屋企,佢好激動咁衝入房之後隔左成個幾兩個鐘先出返黎
我問佢做咩,佢只係好興奮係到跳geed舞步之後同我講佢bid到啦~~~
[bid到咩?][不能說的秘密呀~~]
然後佢又跑返入房,拎左個蘋果咕順好似28座大王咁用腳踢咕順咁省鳩我
[你再省我我唔沖柚子蜜俾你呀仆街]
[係既對唔坐呀柚子蜜大人~~~我乖乖地係沙發等你呀~]
然後佢乖乖咁玩住把木刀係到等我沖
有時候咁樣睇,佢又真係幾可愛既如果佢係我女朋友就好啦....
當我望住佢沖柚子蜜既時候....d熱水倒左落自由隻手都唔撚知
大叫一聲,露露衝埋黎捉住我隻手問我有無事
見到佢個擔心樣...真係
之後我無事果隻手抱左佢入懷
有事果隻手放係佢面前同佢講
[當係回憶一種唔好咩老婆?]
佢呆住惡高個頭望住我
[幾時話要嫁俾你呀下!?信唔信我卍解(係唔係呢個名呀??)你呀啦!]
[萬咩解你將分解做一萬件呀想?]
[咦~你唔明就算啦,柚子蜜呀飲得未呀!!]
[你俾我茶埋湯火膏先啦無心肝]
[咦係啵!差d唔記得tim]
然後沖埋杯野俾佢飲,佢就入左房訓...
我夜晚晚開左條門隙仔偷望佢我見到佢抱住把刀訓
好彩我都唔會輸俾佢!我抱住個蘋果訓