[食蕉啦你~早知唔抱你~~等你自己爬起身]
[你捨得,你敢]
.......
[係既,唔敢唔捨得,雖然我唔識游水!但係我頭先都想背住你游水返船呀!]
[係呀係呀~~你扮呀你~~]
之後佢係到用手指篤我條腰,我又痕到仆街,兩個咁玩下玩下就返到屋企~~
該日活動都完結啦

自從經過左咁多事,露露同我班同學朋友仔都熟哂
自然有活動都開始一起行動啦~~~


之前去完船河,過唔夠一星期又踩單車
但係我根本唔知露露識唔識踩
於是就問下佢去唔去,露露話無所謂
佢又話佢識踩單車,咁我咪應承班人囉
但係一收線先諗起,露露所講話識踩單車既意思唔會係4輪掛..
[露露呀,我岩岩咪問你識唔識踩單車既,我指兩輪果d喎]
[緊係啦~~唔係你會以為我誤會你問我四輪咩傻佬]
你性格會囉
[哦,咁就得啦~~可能要踩好耐同埋踩到好遠嫁喎,你頂唔頂得順嫁]
[放心啦~~]佢拍住心口講[我一定會唔會叫累嫁~~!]



第二朝一起身,住屯門既人都知,租得單車都係得果幾個地方~~~
經過上次教訓,今次我醒目啦
早一個鐘食完海皇粥早餐先慢慢行過去集合
唔係又好似上次咁空肚我就真係捱唔到落去
果朝準備去食早餐果陣時,我問露露想食咩
海皇粥係佢提議
我自己諗兩諗都成年無食過粥~~於是就去啦
去到露露唔食粥...
食左一碟炸兩,一碟煎蘿蔔糕,兩條油炸鬼,一碟炒米粉


你地無睇錯,上面果堆野都係佢自己食哂

我只係食左碟蘿蔔糕同埋艇仔粥己經飽
之後先諗起,露露有時候返學都係出街食早餐,我真係唔知佢原來要食咁多野
[點解你食得落咁多野又唔會肥既]
[一日之計在於晨麻朝早食飽d,下午先有力郁嫁!同埋我肯定今日用量大於吸收~~]
但係都唔洗食咁多呀麻,你對面個肥仔(我)先食咁少野..

食完野,去埋7仔買枝野飲,慢慢向單車鋪出發~~
去到,班人黎左幾個,同童子軍問老闆問左幾錢先,因為租一日,所以希望老闆平d
老闆好好人,重俾左批新車我地踩,而且有d重有得插水個位,好感動
當班人黎齊,上哂車準備出發果陣時
[喂呀喂呀唔好走住呀我掂唔到地]
望轉頭,原來露露唔夠高
老闆之後幫佢較返好,佢


終於掂到地,然後一行人就出發啦

但係大家踩唔夠兩下,又停低左
[其實我地依家去邊好咩都未傾就出發]
屈機佬提出左最大既問題
去邊好<--
[哎也唔好理啦,順住踩啦,經洪水橋入去天水圍先啦]
於是一行人再次出發,呼到去西鐵站果陣時...露露己經向我招手求救...

[你地行住先,洪水橋便利店等~~]
班人向後揮手示意ok,我就停低問露露有無事
露露塊面紅哂(係透出黎果種紅)
[嗚呀~~好熱呀~~無事呀我~~熱之麻~~你行住先,我一陣追上黎~~]
[傻婆,唔洗勉強喎]
[唔制~~人地想同你踩單車呀...時間無多啦...]


.................
哈哈...都係呀..
[呵呵~~大把時間啦~~啦~一係咁,我同你鬥快去便利店,輸左要請對方飲野~~好無]
露露聽到我咁講,之後係到傻笑
[都係你了解我好~~你讓我10秒先呀!我出發先喔~]
[好好~~我數十聲先開始~~]
露露聽到我數1,佢即刻踩,我重聽到d卡卡卡既轉波聲洗唔洗咁認真呀..
當佢身影愈黎愈遠...
我開始諗起佢岩岩所講既野..
嗯..的確時間無多啦...
諗下諗下,掛住望住露露背影,完全唔記得過左10秒
慢慢上返車...開始踩...
我同自己講..
唔可以係露露面前唔開心..
唔可以令佢擔心...


[喂~~露露等埋我呀~~]

本身都係玩玩下...但係我見到露露真係愈踩愈快
重要因為紅綠燈關係,我己經見唔到佢背影
於是開始爆seed踩,踩左一段路,終於見到班人,但係我唔見露露
[露露係再前面你地岩岩攪咩黎,佢突然充滿力量咁既好似]
...........
我反而驚佢炒車多過要請佢飲野
於是捉埋班人踩快d,睇下追唔追到佢~
點知我地去到都唔見佢.....
當擔心之際,見到佢就係對面馬路
佢過埋黎之後,佢第一句同我講
[岩岩過左童子軍佢地先發現自己唔識路岩岩唔知去左邊,好彩問個婆婆,個婆婆指俾我睇我先知咋嚇死我]
成班人聽到,一齊係到笑
[邊有人唔識路但係又踩咁快,重要事後先醒起嫁]


童子軍首先講野
其實我都好想笑但係又唔好意思
於是變成掩嘴偷笑
露露就嘟起個嘴
[哼~~唔俾咩重笑你班死人頭~~重有你呀~~你做咩個肩膀係到震嫁]
唔知你地有無試過,忍笑果陣時,忍到個肩膀係到郁
我果次都係第一次試

係間便利店休息左陣,大家抖夠又再次出發入天水圍~~~
條路我己經唔係太記得,
我只係記得要經過一個橋底,裡面勁黑
露露諗左陣先敢踩過去
佢重要尖叫住咁踩
成個橋底都係回音
之後班死仔又跟住扮佢係到尖叫
我都玩埋一份,一出橋底~~~咁岩就俾露露見到我重叫緊
佢即刻啤一啤我,好似想同我講
[你係唔係想死呀八輩子]
我心都寒埋

相信有去過天水圍/住天水圍既都知道~
銀座商場呢個地方
d野食我覺得又平又ok,有間車仔麵檔,之後又有機鋪
班人差d掛住打機唔記得踩單車
出返去,係ok飲埋野,就係果個公園坐左陣
順便決定一陣去邊~~~
[入大埔呀一係]
唔好玩我啦要踩公路過喎,我淆底....
當然,咁諗既唔止我一個,個提議好快俾人BAN左~~
[哎也唔好諗咁多住啦~~入元朗食個牛腩麵先啦]
班人好似唔識飽咁
[好呀好呀]
但係我估都估唔到,露露都會回應

我見露露出到成身汗,塊面又紅哂,d頭髮又亂哂,
有d頭髮重因為d汗所痴住左係面上面
當大家起身果陣時,
露露叫我扶佢起身,
佢話隻腳累到企唔到起身
一拉起佢,佢成個人捱左落我到
但係我只係聞到好香既體香
露露見到我聞,佢即刻推開我
[唔準呀,成身汗好臭]
唔知有無巴打覺得女仔d汗好少係臭

基本上其實今日係新界一日遊
去到元朗班人見野就食
我就飽到想嘔
但係露露都食得多野過我
究竟呢個女仔係咩野構造
佢好似除左甜品一個胃,正餐一個胃,零食一個胃之外....
重有一個胃for掃街用
去到元朗,基本上有間xx涼粉唔可以唔食班人話
但係我睇過一篇話咩食剩既倒埋一兜我就驚
結果班人本來滿心歡喜,俾我講一講都唔想食
本來打算打道回府,但係班人最後都話想去大埔林村(係唔係咁寫)食豆花
咁班人咁興奮,我都俾氣氛帶動埋
於是一行人向林村出發

咁我完全唔識路,
大埔我咁大個仔真係無去過好多次
好彩有位同學係踩開單車識路
咁當然係佢帶路啦,但係佢帶我地踩馬路
又教左d手勢俾我睇
姐係可能轉線要舉大母指示意
重有d我都唔記得左
基本上大家都求求其聽完就算
但係露露竟然好認真係到練習
[我要轉線啦~~~靠右~~~]
露露一個人係路邊做住動作係到叫
我同學又見到佢難得認真學
於是佢認真教
我地笑到死,因為果個同學平時教我地都求其應付下佢算
當佢教完,上返車果陣時
佢同我講
[你女朋友唔錯]

之後我同返露露講
[交通安全人讚你喎]
之後露露話
[緊係啦我呢d好學生可遇不可求呀,十年都唔知有無一個呀]

[係呀係呀~~~係呀係呀~~~咁一陣靠你幫我地手勢啦啵~~~]
[無問題]

人生第一次踩馬路,真係腳震震
旁邊有時候重有D貨櫃車經過
嚇到我仆街
但係露露好似唔識死咁
佢竟然追到交通安全人既速度
但係我地成班係後面淆底
又有同學左右不分打錯手勢嚇到我地仆街
當去到一個巴士站到(無人勁恐怖)
突然有同學抽筋
於是大家停低係到幫佢拉筋啦
條友好似生仔咁,叫到勁大聲
露露同交通安全人過到黎果陣時,交通安全人幫佢拉
我地係旁邊休息下咁
突然之間,露露走埋黎大叫
[起身起身,我地做熱身唔係一陣好似佢咁抽筋呀!]
我地成班呆左
[都踩左咁耐啦依家先黎熱身]
屈機佬講d野真係好中point
[一係你教我地啦]
我同露露講,本來想佢怕羞唔教咁就唔洗做
點知...
[好啦~~一陣跟住我做呀]
中伏啦呢派

露露做果d拉筋動作
唔係平時中學上堂做果,而係芭蕾舞果類形既熱身
班人見到佢唔知點拗後隻腳果陣時
勁恐怖
[喂露露你自己小心呀~~~一陣整親呀...]
當我擔心緊佢既時候,佢同我講
[唔拉筋一陣真係有事你地就唔好喊住口叫呀]

[好啦好啦~~大家拉下啦各自廢時真係抽筋~~~]
當我自己搵個地方拉果陣時,
岩岩抽筋果位同學己經抽完筋坐係到休息緊
我遠處望住露露,發現佢個樣唔多妥
當我慢慢走埋去問佢係唔係整親果陣時...
佢好堅決話
[你快d拉筋呀..如果唔係一陣抽...抽筋...呀!!!!!!!!!!!!!!!!!!!!!!!!!]
我聽到佢突然既大叫嚇左一嚇,我d同學都走埋黎問咩事

無錯啦就係到佢抽筋
有時候唔知大家有無試過做完運動本身無事
但係可能屈一屈,會突然抽筋黎料
我試過打完籃球,去同學屋企
急屎去大,去完一企起身,突然右腳抽筋...
成個即刻慢慢好辛苦咁坐返係到
當我坐左陣,右腳無事..
又企返起身,到左腳果下真係,嗚呀
結果我同學唔知入唔入黎幫我拉筋好
屎又未抆褲又未著

之後我扶住佢,慢慢放低佢,叫佢放鬆
但係佢一伸直少少就覺得痛..
[呀...呀...好..好痛呀八輩子]
明明見到佢個樣好辛苦...但係聽到佢咁叫我真係
我即刻集中望住佢個喊樣,先可以定到神
但係我見旁邊班仆街依家係到偷笑
佢一痛就攬住我條頸,我完全幫唔到佢拉筋
於是我叫交通安全人幫露露拉,我扶住佢..
每拉一次,露露就勁大力攬我一下
係我耳邊叫
哇我真係....
[乖啦露露,唔好叫啦~~~失禮死人啦]
[唔得呀,好痛呀]

交通安全人幫佢拉完之後,露露都係到休息下~~
於是基本上係成班人on99坐係路邊發呆
人地渣車唔知重以為我地咩事
過左陣,露露話ok了,我問佢重踩唔踩,佢話支持到...
[因為...我想食豆腐花]

[都估到你嫁啦為食妹~~~起身啦~~]
當我行返去自己部車果陣時..
我見到露露重坐左係地,雙手伸直嘟住嘴望住我
[扶我扶我人地起唔到身呀]
班人見到,係到講
[係啦八輩子,唔幫人既你]
我即刻紅哂面,走埋去露露身邊扶起佢

之後去到邊我真係唔知,
我只係認得好似去左一條村既物體,
之後踩左去d上山路到
當我地踩到去一個大斜波(向下)
一見到,個個都
我唔知果到係邊到,但係相信有巴打可能有坐巴士經過過
真係勁斜,佢重要落完斜重有一個上斜,連續兩個
我地基本上係落完斜唔識踩夠力上返個斜波
最好笑係落斜果下...隔離咁岩有架巴士一齊落
我地成班一齊係到玩過山車咁
[呀!!!!!!!!!!!!!!!!!!!!屌你老母啦仆街唔好炒呀]
成班係到講哂粗口
但係當過完斜波,大家都頂唔順了...
交通安全人話轉多過彎就係,但係頂唔順就call車走~~
於是大家決定call車走
但係問題係,點call呢..?

於是我地開始打去電話公司問
問左幾間,佢地問我地係邊,我地都唔識答
只係知前面有間大宅,後面有竹林...
旁邊重有個阿彌陀佛既石牌
好彩,有個巴士站,
於是我地報左巴士站位置,
問埋果個貨車公司價錢,佢地就出車啦
本身大家講下笑傾下計無咩野..
但係半個鐘,一個鐘咁過去...
天又開始黑...
又見到旁邊個石碑
最重要係!!呢到好少車經過,果到有巴士站,但係無巴士到!
對面個大宅重恐怖
門口有兩盞橙燈,但係望條路望唔到入面
同埋後面係竹林,阿媽成日話竹林好猛鬼
我同班同學講,連成日去露糖既童子軍都話唔好嚇佢

當淆底之際,終於見到架VAN仔啦
成班人好似係荒島見到有船咁,係咁揮手同大叫
個司機停好車一落車,我地就開始搬單車上去,執左勁耐先岩岩好放得哂
再來既問題...
d位..
大家迫到好似偷運人蛇咁
我同露露就坐前面果個位
我坐到勁近波棍,司機叔叔話介唔介意坐埋d
當我諗緊點算之際
露露突然講
[不如我坐你大脾呀]
.........

咁我無咩所謂...
於是就叫露露坐上黎
但係唔你你地所諗咁樣
佢係打橫咁坐我大脾,姐係佢塊面係對住司機叔叔
全程我抱住佢,因為佢無安全帶
露露好似好累咁,好快就訓著左,班人都訓著哂咁濟
諗起今日,真係幾累
但係我又偏偏唔想訓,因為難得可以望下露露訓覺個樣....
當我正看得入神果陣時
司機叔叔突然同我傾計
[你女朋友仔?幾可愛喎]
[係呀,佢係我未婚妻黎嫁~~]
[下?定左婚啦?你同你女朋友幾多歲呀?]
[哈哈,唔係啦,講笑咋...我地只係男女朋友...不過...遲d我就唔知啦...]
[點解咁講呀?對佢好d佢自然唔會走嫁啦~~]
[哈哈...唔係啦..算啦~無事,或者佢真係唔會走呢...不過機會都好低...]
[哦...]
我同叔叔傾完計..望住露露...
個感覺真係好難受...
明明我己經抱住左佢..
但係感覺好唔真實..
你..唔好走好無

沿途架車都好靜....
出左成身汗..架車既冷氣又開得大...
攪到我重覺得d凍..
望住車外風景...
諗起同露露發生過既事...
唔知突然好想喊..
雖然己經明白佢既感受,但係我都係好唔開心...
呢個時候,我抱住左露露個頭靠向自己心口...
佢真係好可愛..好溫暖..
唔知將來,重有無機會抱住佢呢...
唔知呢..?唔知呀。

返到去..俾左錢,當大家打算返屋企果陣時...

[喂喂,七點半啦!要還車呀!人地要關門啦,學生證重係佢果到!!]成班人先醒起原來架單車係借人地既
雖然返到屯門好熟路,
但係時間關係,
成班落哂馬路企哂起身踩
好似暴走族咁
露露岩岩訓醒唔知咩事
佢都只係一味跟住我地
中途重見到有警車係前面經過
嚇到仆街勁緊張

好啦,其實返去交埋車件事就完嫁啦
咁我就係到交代wii事件啦~~
有一次同學約打邊爐(夏天開住冷氣
咁夜晚先開始,見無野做,班
女仔開始打麻雀呀,班男仔又玩大富翁呀鋤Dee果d
咁我己經唔記得點打麻雀,dee又唔識鋤,
同學電腦又俾人用緊,我局住坐係沙發睇電視

係呢個時候,大天使屈機哥終於黎啦
事緣佢屋企有wii~~
佢每次都會帶埋黎~~~
咁我緊係幫手插線整野啦
之後同屈機哥係到玩wiisport..
有玩過都知呢隻game裡面有幾款遊戲
本身我地好和平玩哥爾夫球...
但係發現玩好耐...
班人都開始俾部wii吸引住..慢慢向我們伸出魔手

最先走埋黎既就係童子軍再來就係高佬同交通安全人
一開始我地玩緊哥爾夫,無奈被迫轉玩網球
班人玩到好投入,揮手制勁大力
有幾下重打到旁邊既無辜觀眾
佢地重玩到跳哂起身,叫埋出黎
[喝!!]

成班見到都係到笑..
但係我見到露露好入神望住我地玩
於是我問佢玩唔玩,露露起初扮哂野話唔玩
但係當我用手制係佢前面揮兩揮之後...
[哎也哎也~~你咁想我玩我就玩俾你睇啦]
之後班人話要玩拳擊...玩咩淘汰賽
前後加埋我,有6個人參加
一開始露露同交通人打
露露好緊張..
.我見住佢集中住咁打,
而且佢防守果陣時真係好似同人打緊交咁

當露露檔左好多下之後,佢突然黎個左勾拳
點知真係中企係佢左邊既交通人
交通人應聲倒地
班仆街重係到幫佢數10下
露露只係好擔心咁問佢有無事
好彩無事咋
但係我心知,露露平時同我玩下都咁大力
依家佢用無情力一揮其實我估幾痛下
但係交通人又話無事肯定係唔想露露擔心
之後到我同屈機佬
我就不停猛攻,屈機佬只係見機抽水
點知玩玩下,兩個開始投入係咁揮係咁揮
最尾點知俾屈機佬陰到初賽出局
再來果隊就係高佬同童子軍
童子軍訓練有素,快快趣打低左高佬
高佬重唔鋸係到大叫入廁所隻抽
最尾三人,露露,童子軍,屈機佬
佢地話讓露露,所以佢地兩個打先
可惜,機係屈機佬帶黎既,好明顯佢訓練有素啦
童子軍
最後露露VS童子軍
童子軍未開始就叫露露行開d先
,驚佢出拳真係打到佢本體
點知打到中途
,露露愈打愈前,後來完全遮埋電視
我地叫佢先行返後
但係果陣時己經打左人地好多血
之後露露大叫
[1,2,1,2,1,2,1,2!]
係到數節奏一拳一拳一拳就連打落去
最尾露露勝出

之後太無聊,係到玩年齡測試
(姐係wiisport裡面既功能黎,俾d測試你,之後你做哂測你體力係幾多歲)


結果玩出黎,我55歲,露露3x歲
其他人都係介乎50-60