我老母話我有未婚妻: 14
-------------------------------------------------------動漫節篇---------------------------------------------------------------
相信大家都記得,我同露露好早己經約定要去動漫節
而且露露都會8月走
所以我決定,要係佢走之前,做d事佢感動
如無意外,露露會係去動漫展果日Cos露棋亞~~~
露露有出聲要求我,想我cos一護陪佢
雖則我心裡面應承左,但係我口裡拒絕左
露露不停勸我啦~求我我都無應承
攪到露露曾經一度發脾氣~~~
但係露露你要明白我呀
我係想你受傷果陣時唔帶你去睇醫生,而係直接買間醫院俾你呀
08年既動漫展具體日期我都唔記得左
我只係記得我地係約實左8月2號去~~
老實講,8月2前10日左右先開始準備,有d擔心
啦~~我估你地都估到幾成我要做咩嫁啦...
計劃係咁既..
露露果日cosplay住咁同我行動漫展
之後扮哂好煩悶唔想行...
一出到去,打俾班朋友,放我套衫係男廁
之後走出去,俾露露驚喜
首先...我要搵一個我認為感人既場面去扮
因為事緣係我諗起露露某朝扮露棋亞果件事...
所以我希望學佢,扮返d劇情...
又要逃避露露既法眼,又要去睇漫畫,又要去準備
最後我索性出左旺角一個有任飲野既漫畫鋪睇
而果派我都成日出去,露露問我點解咁忙,我就話功課週
其實實則每日都聯絡緊d好朋友,傾計劃
好多謝d朋友,每位都好盡力,而且好用心幫我去諗
我好感動呀
當我地諗到衫果陣時,有個同學話有相熟既,可以平d
於是我地就叫佢拎d版黎睇下,睇過ok,價錢又ok,就大家分工去做
刀,衫,wig真係大家可以去留意下,d價錢真係唔平..
不過最後決定~~我唔戴wig
老實講...d衫d道具又唔戴得返屋企..
唯有放哂係同學屋企...
露露佢又開始懷疑我..
最好笑係..
[八輩子你講呀係唔係因為我就黎要走,所以你去識第二個]
[這是不能說的秘密呀~~~]
[唔係同你講笑呀!你認真同我講,望住我對眼講你愛我!]
之後我張大隻眼望住佢,同佢講
[我愛你呀..............露棋亞]
[哎也重玩~~俾你呢個男朋友激死我~~罰你呀~今晚俾我攬住訓]
[係係~~~老婆大人今晚你可唔可以講下你鍾意死神邊d情節呀~~我有興趣知呀]
[咦咦!?呵呵~~成功影響到你啦~~好啦~~見你求我,我就講俾你聽啦]
其實我一早決定左邊個場面...
但係都想聽下佢認為感人既場面,
希望我決定果個場面係佢都認為感人啦
沖好哂涼,兩個人訓係張床上面~~~
我用手拓住頭~~
呆望住露露
[講啦我等緊你講~~]
露露見到我個呆樣,佢突然之間係到爆笑
[噗,你個樣做咩呆成咁~~好傻呀你~~]之後佢捏左我一下,佢自攬住枕頭再問我~~
[啦~~我講嫁啦,唔準訓著呀]
[係~~你講啦~~~]
老實講,上面果段就係計劃做既劇情
果晚聽到露露講,呢幕都係其中一幕
但係我估唔到佢連雨龍車衫俾織姬都覺感動
露露講講下就自己訓著左先
我幫佢蓋返好張披..偷望佢訓覺...
佢感覺好可愛...
我用隻手指係到把玩佢D頭髮...真係好軟~~
見到佢訓覺個樣,真係忍唔住偷錫佢面豬dum一啖
當我錫完落去好滿足果陣時...
[哦!你偷錫我!]
[哇頂你!你未訓既喂!]
[呵~~緊係啦~~俾個陷阱你~~點知你真係自己上當你個色狼~~]
[咁你想點呀~~~]
[我...我想你扮一護陪我出cos呀]
我見到佢個期待樣真係好想同佢講其實我一早準備好
但係為左俾驚喜佢我真係唔敢講狠心d都要
[唔制呀..要著住套衫就圍走會好累]
[唔會嫁~~信我信我最多我地拎套衫去換呀]
[唔呀又要拎多套衫好煩嫁會...我想去行下咋~~~乖啦~~~]
[唉...算啦算啦~唔理你啦..我都係想留低d回憶之麻...]
我都係呀我希望你遲d會明我啦
心裡面所講既佢聽唔到..
我只係對佢講...
[好啦好啦~~我考慮下啦...]
其實老實講,暑期邊q到黎功課週呀
雖然我話係暑期習作
但係露露疑心真係太大
當我第二朝,準備出去搵埋班人試衫果陣時
露露話要跟埋去
我就話唔得呀學校唔俾陌生人入
一係你我今日早d訓啦好無?
露露好無氣無力咁話好啦
我出門口果陣時,見到佢嘟嘴唔開心
真係好唔忍心呀~~
露露,其實我真係準備俾驚喜你咋
出到去,同班人講露露件事..
班人叫我要忍住唔好講
但係我真係好想死
真係手背又係肉,手掌又係肉
但係目前就係好好準備...
希望果日會令露露開心返啦
入到去試完,出叔黎,大家見到都笑左好耐
話哂咁大個仔第一次玩cosplay
唔係話無諗過,但係始終都係唔敢
今次唔係為左露露,我估一世都係得個諗字~~
之後又要走去一間代理店,睇刀...
老實講,有好多款都無...好彩一護果把斬月有
老實講...好彩有班朋友肯出錢...如果唔係真係
班人都話~~反正都係,就做到最好
我真你好感動
之後因為人力問題~~我搵得既都搵哂啦
人情牌真係打盡
不過仍都因為呢件事,我明白到我既朋友有幾好
為左唔令露露懷疑,就特突係動漫節前幾日同露露出下街玩下~~~
希望佢唔會真係懷疑我有第二個啦
諗返起..露露真係好傻...
點解會懷疑我嫁
我重記得,露露係果短短10日裡面,不停暗示想我陪佢Cos~
但係我都表明唔想~~咁露露最後都放棄
[唔緊要啦咁你肯陪我去動漫節就夠啦~~]
其實我聽得出,佢心裡面好失望
時間愈黎愈接近8月中...
露露要走既時間愈黎愈近
依家只係希望...
露露可以係香港最後留低一個美好既回憶...
露露無咩朋友
但係我班朋友早己經同佢玩到好熟...
老實講,我覺得佢地一早己經係朋友
我仍都希望,俾佢知道,香港係有佢既朋友,愛人
所以我地決定當日順道攪埋歡送會
呢d野都係露露唔知~~~
所以我相信到時肯定會令佢會有大大驚喜
去到8月2前一晚,我同班人約出黎傾好哂
請埋班人食糖水就散水
不過都不忘買甜品俾露露食
返到屋企,見到露露整堅佢套衫,準備聽日著
佢問我做咩咁夜返....
[無呀..班人做完功課話食埋飯順便食埋糖水,我買左野俾你食呀,睇下岩唔岩?]
[唔洗啦...我執埋套衫都訓...你都早d訓啦..聽朝一齊開開心心去動漫節啦]
[露露...你岩岩做咩苦笑呀....?]
[下..無呀我見累累地之麻...]
我見到佢唔對路..
即刻走埋去抱住佢...
[做咩呀露露...?]
[無呀...真係見累咋傻佬..]
..................
[我聽日應承你,我Cos一護好無?]
[唔洗啦...傻佬,我知你唔鍾意~~]
[呵呵~~~~~你睇下係咩黎既~~~]
我拎左個代理死神既牌仔出黎~~~~
露露:
[咦~~點解你會有嫁衰佬~~唔通真係打算cos一護?]
[唔知呢呵呵~~~聽日咪知囉]
[喂呀~~唔制呀快d講~~~~~]
[呵呵~~聽日咪知囉~~~快d食埋糖水訓啦你~~~]
[咦~~夜晚晚先食~~肥死我咩~~~]
[是但啦~~反正你肥唔肥我都咁愛嫁啦]
[嘻~~你又岩喎]
第二朝一起身...關埋度門爆爆石咁打俾班人,班人重早過我起身
童子軍講左句野令我幾感動
[今日八哥大日子喎~~同結婚無咩分別啦,我地實支持你嫁啵!]
之後屈機佬原來己經同童子軍集合左食緊早餐,佢重搶左電話黎講
[放心啦~~~你就等佢感動到喊啦]
呢班朋友真係...[好啦,麻煩哂你地啦~~今日靠哂大家啦~~記住拎埋我套衫呀]
[好啦長氣~~一陣見啦~~]
收左線,出返去,叫醒露露,之後等佢整埋頭,換好衫,背返把刀就出發
拖住露露感覺好攪笑
露露又好開心,彈彈下係到行~~~
沿途路人見到都有係到指指點點....
有時我覺得香港人真係大驚小怪
不過我見到d幾攪笑既現像
一上到巴士,962(?)
見到有個動畫人物(憑衣服判斷~~)
係車到訓覺
可!因為實在太早起身,一上到車,我地都係到訓
我肯定其他人一上車其到露露同果位人兄著住cosplay服係到訓覺一定會好好奇
露露重係抱住把刀訓
但係露露其實果朝都有係咁問我
[你套衫呢?]
[咩衫]
[一護套衫囉你唔係要cos嫁咩]
[噗...去到先算啦...好似有得借嫁麻...]
[車...重以為你有預備到tim]
[呵呵~~~乖啦我應承你,我今日一定會著一次死霸裝你睇好無~~]
佢隻眼張到幾大,係咁用手指指住我
[啦啦啦啦啦!你講嫁!!唔準講大話呀~~~~]
[係係~~勾手指尾]
去到會展..入去期間己經見到有好多動畫人物
我重見到好多好正
結果俾露露扭耳仔
[哼~~我依家唔好睇咩]
[唔係唔係~~只係佢地cos果d人物好睇姐老婆最可愛~~]
[呵呵你都知呢~~]
[細細粒緊係可愛啦]
[你話我矮!]
[咁樣先似露棋亞呀麻~~~]
[呵呵~~算你啦~~去買飛先啦]
你地有無試過係金紫荊果邊行返過去入口果到
遠到hihi
好彩果到有ok買飛咋
重要得返勁少,下次真係記住要買定先好去
但係我聽聞cosplayer唔洗錢可以入
於是我問露露,露露話佢都唔知~~~
於是就無理~~買飛入場~~
入到去,人山人海
問露露想去邊,佢話想去d地攤睇下先~~~
去到見到有好多精品買
露露好似癲左咁~
佢買左兩個死神咕順,一d書簽,同埋一d小飾物~~~
我記得露露買左d人仔手機繩,姐係扭飛機5蚊粒果d
佢買左一粒紅色果陣時,個老闆送左粒灰色俾佢~~
話送俾我呢個男朋友
我多謝完老闆,露露好開心咁拉走左我
[嘻嘻~~你睇下我地幾有夫妻相,老闆話我地有夫妻相,先知你係我男朋友~~所以送多粒俾你]
[呵呵~~緊係啦傻婆~~之後去邊好呀~~]
[去~~~~~去~~~~去~~~~去cosplayd鋪頭睇下先啦]
大獲!
去到佢己經開始係到找尋死霸裝
我己經感覺到佢想迫我租一套著
但係其實我早準備好嫁啦~~未係時機咋
[呀露露呀...一係行多幾個圈先?我驚唔係太方便....]
[咩姐你依家唔租你想幾租黎著呀你應承左我嫁~~~]
[啦~~乖乖地~~行哂成個動漫節先好無~~?我想睇果邊dgame呀]
[唉...好啦好啦...]
沿路拖住露露...見到佢dup低頭嘟嘴,行路踢到勁高成個小朋友咁
我就知佢發緊脾氣
[露露雖然唔知你點諗...但係你可唔可以信我一次,我今日一定會著死霸裝你睇..我同你勾過手指尾嫁麻~~]
[嗯......啦~~我信哂你嫁啦~~咁我地行哂個動漫展先啦]
呢個女朋友,都唔知話佢易哄定難哄
果年我記得有個叫咩monkey既攤位
個攤當門口有隻隻勁大既人扮馬嬲勁可愛
露露見到即刻走去攬住佢隻手叫我影相
隻馬嬲重係到摸佢個頭
當整亂左露露條劉海果陣時
[馬嬲仔先生~~~你唔好再整亂我個頭啦~~~你係唔係想死呀]
[唔好意思呀我地影完相嫁啦~拜拜]
之後拉住露露走,露露講野真係好有爆點
嚇親我
之後我重記得佢買左好多漫畫
之後佢有d係18禁~~~
要我幫佢買
俾完錢之後
個職員重係收銀櫃同我講
[喂~~露棋亞個男朋友過黎幫手拎野呀~~~]
[係係~~唔該哂你~~]
幫露露拎哂d野之麻,露露兩手空空如也~~佢攬住我隻手係到行,好似好滿足咁
但係突然之間,露露放手行開左去睇野
但係人又多我追唔到佢...
當我想行埋一邊打俾佢果陣時,突然有人捉住我隻手
[呵呵~~捉到你啦~~你睇我幾犀利~~估到你係邊~~~]
[你做咩無啦啦走開擔心死人啦~~~]
[咁人地岩岩見到好似疑似死神既cos呀麻]
[下次拉埋我一齊去睇好無?]
[係既老公大人]
行完一個round,見到showgril都唔敢望
一陣俾人當場卍解我咪仆街
但係行行下~~有d人搵露露影相
咁佢就好開心咁去影啦~~~
但係有d毒撚我真係
真係想打爆佢地個頭
但係奈何露露又樂在其中
我葡萄都無用
不過我又見到有其他cosplayer會一齊影~~~
我記得有個佐為(女扮)同我講
[露棋亞男朋友過埋黎一齊影呀]
我真係估唔到,後面一堆cosplayer,我自己係前面著普通衫,攪到我想出去拎衫換完再影
相都影完~~露露問我依家點,係呢個時候
[露露呀..不如我地走啦...?我地落旺角行下好無?]
[下,咁你套死霸裝呢]
[出去先啦.....呢到好迫好焗,我唔係太舒服呀]
[咁...算啦出去先算啦~~~]
拉住露露,搵出口...出到去,望一望露露...見到佢個樣己經好失望...
重要眼濕濕...但係我見到佢重苦笑緊....
[露露....我想入一入廁所嘔...你...你係到等一等我呀...]
露露企係原地,拎住把刀,望住我遠離..
我一入到廁所,問班人係邊...
班人報完位置我聽,我就同佢講係2/f近買飛果邊個廁所...
之後單聲小心俾露露見到
過左唔夠一陣,童子軍拎住2個紙袋衝入黎
[喂~快呀~~我地準備好嫁啦~~]
[okok,樓下ok隔離出停車場個位等]
[okok,你就到果陣時sms過黎呀記住~~~你快d換完我幫你套衫落去]
朋友...多謝你地...
我換好套衫...執執個樣同髮形,拎埋班刀就行出去
而童子軍都拎埋我套便服走左
第一次cos,好緊張呀
我重要無戴wig重要戴住副眼鏡,根本就唔似
但係奈何我又覺得要保持返少少本人既風格
我慢慢潛伏去到露露背面...
但係我見到佢己經偷偷喊緊...
我忍唔住啦....露露,我要你喊,但係我係想你因為感動而喊,而唔係失望而喊呀
[喂~~~~~~露棋亞,我黎救你啦!!!]
我由勁遠叫過去
露露見到,佢就圍望,然後佢搵左陣,先見到我,然後佢再確認下
先知道係我
佢係遠處,掩住個嘴...成個人好激動...
之後企係原地喊..
我見到佢咁,好緊張,即刻跑過去
[露露..你無事呀麻?對唔住呀...其實我一早準備好...我唔係有心暪你嫁...我想俾驚喜你,所以先一拖再拖]
露露聽到我對唔住之後,係到笑住寧頭
[唔係呀..傻佬...我岩岩本來真係好失望...但係...我依家喊係因為太感動啦]
[咳咳...感動還感動...但係要走啦!如果唔係就會有人追上黎嫁啦!露棋亞!Go!!]
[一護邊到會無啦啦講英文嫁]
[車~露棋亞夠唔會講中文啦]
之後露露又係到大笑
佢又要擦眼淚,又要大笑真係見到都辛苦~~~
佢笑完,擦完眼淚~~整理好件衫之後就同我講~~
[嗯!行啦一護!]
兩個傻人,係到跑
而我都將sms發左出去~~
係呢個時候
突然多左兩條友陪跑
睇真d原來係童子軍同埋屈機佬
佢地著左隊長衫同埋戴左wig真係認唔到
無錯,你地無睇錯,我地一行15個人(部份隊長+部份副隊~~)
係到重演緊果段逃走劇情
[喂!露棋亞,一護,好快d走啦]
我見到佢地咁講野真係笑到我仆街
佢地真係為左我地好落力,佢地雖然都有睇漫畫,但係一定唔係會去cosplay果d人
落完電梯,果條大直路沿路好多人望住我地4個係到跑
點知去到ok附近,發現有d人影緊相,我就知道咩事了
[喂!露棋亞同一護同我企係到!!!]
我見到交通安全人扮十一番隊個隊長
重有阿鬼(女仔),係到扮副隊
之後佢地身邊重有海草頭,巫婆藍,重有好多未提過名但係成日一齊玩既朋友
露露本身見到屈機同童軍己經好感動,因為cosplay陪佢玩
點知黎到呢到
成堆人都cosplay住佢最鍾意既動漫...而且呢班人重係只係識左短短幾個月
露露佢今次真係失控,企左係原地望住我同班朋友係到喊,笑住喊
[大家好多謝你地呀..............]
海草頭同阿鬼班女仔其實己經都有D忍唔住眼濕濕
呢個時候,童子軍大叫
[我幫你地頂住!走啦]
[喂走啦露棋亞!!再唔走我地走唔甩嫁啦!]
[嗯]
沿路有好多人係到問咩事又影相
我地無理,樂在其中
之後跑到出金紫荊~~~
[呼~~~~~~走甩啦我地~~~]
我拎住把刀舉高雙手係到大叫~~~
露露見到都笑住講
[係呀逃脫大成功~~]
係呢個時候,班人都追到出黎,我重見到班人死下死下,太耐無做運動啦九成九
出到黎,露露問班人
[係你地主意定係八輩子呀]
點知班仆街
[1,2,3!這是個不能說的秘密呀]
之後成班係到大笑我都笑左
因為我同班人講過露露成日講呢句野
露露聽到直情係大笑左出黎,勁低能
之後我叫班人換衫落旺角啦~~
之後露露問我做咩
[一陣你咪知囉]
但係班人話是但,咁樣著住坐地鐵落旺角啦人一世物一世
行去坐地鐵期間~~~
好多人望住
但係露露好開心
而班人都無咩所謂~~~
個個好自然咁行~~~
而阿巫婆藍重食住煙係到行
順帶一提佢扮亂菊,好型棍
落到去地鐵站~~~我地將d刀收返好
向旺角出發~~~
唔知有無巴打去過旺角金雞大廈既25樓果間咖啡店
果間野d玻璃好大塊,可以望到旺角全景(其實無咩好睇
果到又有好多漫畫,又有電腦
又有好多集體遊戲,而且飲杯野可以坐成日
之前成日去果到打PSP
果日我地都係去果到~~~
果到我地己經叫老地方
但係近年好似轉左手,都唔同哂咁....
一去到,我地套衫己經好吸引裡面班人望
一入到去~~~
班人就搵左角落坐~~我地成班隊長同副隊係到傾計飲野真係好怪異
之後班人話唔記得合照
於是係咖啡店裡面影
一班人好耐無影過大合照,唔係露露~~都真係唔會有d咁既經歷
[露露~~多謝你]
童子軍突然出聲
之後其他人都跟住講多謝~~
我同露露都俾佢地感動到
露露抱住我
[嗚..八輩子...你班朋友真係好呀]
[傻啦~~係我地既朋友呀!係唔係呀?]
[緊係啦~~我地一早係好朋友啦~~~八輩子既朋友姐係我既朋友呀麻~~]
海草頭出聲講先
[多謝你地無你地我無咁美好既回憶~~~]
露露好開心咁講
[我地多謝你先真,無你我地呢幾個月d活動點會咁開心同埋我地今日所經歷~~都係你帶俾我地嫁]
我聽到真係好開心
[喂喂~~我都未聽過你地話要講呢d對白既]
[唔係呀麻八輩子~~人喊你又喊]
屈機佬係到抽我水