係旺角打打下邊爐，有兩條友成身血咁衝入黎...: 05

此際，我與白衫男等人都暫時放下搬動雪櫃的任務，讓「啊叔隊伍」先行離開後才繼續。免得在搬運過程中出現阻塞他們的情況，因而再引發口角。

我們倚著剛搬動了只有一米遠的雪櫃，雙手交叉在胸前，與選擇離開的人四目交接，卻一語不發，再沒有爭論。當然，大家本來就是素不相識，跟本沒需要去為對方的選擇而去憂心。

店內氣氛再一次變得沉寂。不知何解，此刻眼前的一切就像開了慢鏡模式，所以事物移動得很慢。「啊叔隊伍」在我面前緩緩步過時，腦裏更不禁奏起了電影無間道配樂「再見！警察」那悲哀的旋律。或可能是因為我堅信大馬路所存在的危機，我知道啊叔等人所乘答的升降機，通往的 ... 將會是冥府。所以很有可能是我最後一次看到他們的身影，才突然地感觸起來。

當啊叔走過鍾哥身旁時，他舉起了小米手機錄影，對著鏡頭說「拿！大家認住呢個懞撚經理！ 冇啦啦話要封門唔俾我地走啊！ 」。他單手拿著手機，另一隻手則翻了一翻鍾哥掛在胸前的名牌「叫鍾國立啊佢，認實佢啦！大家唔好幫襯佢啊，呢間野叫至尊雷力火銅店，係旺角架！小心啲啊大家。」

鍾哥縱使當眾受盡屈辱，但仍然不斷向啊叔道歉「影響到你地，真係唔好意思，我係到同大家講多次對唔住 ... 我冇話過唔俾你地走，我都係建議你地留低姐，始終我覺得樓下發生緊啲令人難以相信既事 ...」





「你傻既你，有咩咁令人難以相信啊，呢到係香港黎啊！」啊叔回答。

「 ... 行啦啊叔你，冇人留你啊，你再講樓下就冇車答，你走啦！」看見口水戰的導火線有點著的危機，我趕快中斷他們的對話。

「走！我緊係走啦！話左走架嘛我！唔洗你提！」啊叔總是嚕囌個沒完。

「啊叔隊伍」十多人步出了大堂等候升降機。店內剩下的「衛兵」也要開始工作。白衫男大聲叫到「多謝你地選擇信相，好！依家冇晒啲無為人，係時候要開工，有丁既出黎幫手搬雪櫃。」

「一，二，三！但成間店得都係得三個呢隻款既雪櫃，全部都咁窄身，用兩個黎封一道門會比較安全，但就會唔夠封 ...」我數著店內的雪櫃數目然後跟白衫男報告。





「放心！呢棟大廈既lift門唔太闊，將個雪櫃泊埋去正中間都應該正係漏少少喇位，lift入面既人應該走唔到出黎。三個雪櫃封晒三部lift，岩岩好！」白衫男向我提議。

「鍾哥，麻煩你可唔可以叫人去廚房拎晒所有利器出黎，因為啊叔佢地撳左lift，我驚等間上黎戈部lift係有暴徒 ，所以有刀係到有咩事可以即刻自衛 。但盡量搵野包住拎出黎，同埋由你保管。廢事等間俾啲人見到真係以為我想封門再大屠殺。」白衫男走到鍾哥旁細聲說道。

「Okay！交俾我！入面啲師傅未知呢件事，我順便通知佢地！」鍾哥回答，並向廚房走去。

此時，數名男士都走上前來，當中包括大隻男及年輕男子。「希望我冇信錯你地 ... 有啲咩可以幫到你地？」大隻男問。

「唔該晒！有你係到，幫到好大忙。你地人多，不如你地幾個去搬戈邊個雪櫃過黎。近呢個就我地搬啦。」白衫男指示大隻男等人搬動放左卡位座旁的雪櫃。較近正門的雪櫃則由我、啊正、白衫男及他的同伴來搬。





剩下的一個雪櫃就是放左圓桌附近。「喂！紋身佬，你同埋你啲搬埋個雪櫃過黎啦。」白衫男大聲喝令紋身男。

「你點尻我做野，你老幾啊？」紋身氣憤回答。

「唔係啊嘛，咁多人都搬唔起一個雪櫃？算啦，你地唔洗搬啦，我搬完呢個再搬埋你戈個。」白衫男使用激脹法。

「搬囉，你撚好野！」紋身男無奈與手下照做「搬啦！望！ 有丁架我地！ 」

「你地移開少少啲櫈啦，俾個位我地拉個雪櫃出黎。」大隻男吩咐其他人。眾壯男施展渾身解數和分工合作，務求把雪櫃搬到大堂去，作為我們的城牆。

「睇下，真係拆緊檔 ... 死人lift上黎都咁鬼耐。」啊叔再次發嚕囌。

不需一回，我與白衫男已把雪櫃搬到第一道升降機門則。 「唔該借借！小心啊！有重野！」我善意提醒。

「咪封住啊，我地都味入lift。」啊叔太太說。





「唔洗驚，點都等你地落左去先封門！但要記住啊，道門封左就唔會打番開。你地好自為之啦。」這番說話是白衫男對他們的最後忠告。

「我番上黎做乜？我發誓我以後都唔黎呢到食！得味？啊叔嚇大架！屌你老母！」啊叔的怒火再次燃起。

「好好好！啊叔最勁，唔好嬲！冷靜！冷靜！」那名女生男友安撫啊叔；我也拍拍白衫男肩膊說「算啦！唔好激佢啦！轉頭大家都各行各路，好頭好尾，不如和和氣氣咁講句拜拜就算啦。」

「挑！拜拜佢條尾就有份！」白衫男答。

「啊叔，不如留個電話，轉頭你地落到去冇事發生，咪打番上黎講聲嚕，至少可以證明你係岩啊嘛。」我突然提議。

「你都忽架你！咩啊，姐係當我探子咁話嚕？我負責去探路咁啊？咪當我lulu先得架。要知下面係點，自己落去睇！」啊叔識穿我用意，我不禁在心裏說了聲「屌！依家又咁撚醒既！」。始終確實存在大馬路是安全的可能性，所以我也希望有勇者到地下探路，再告訴我們下方的情況，至少不用在火鍋店眼光光待到白天。

「我都係講下姐 ... 祝你地好運啦！一切順風！」不愛與陌生人鬥嘴的我，以最友善的祝福歡送他們最後一程 ...





「叮」升降機到達樓層，啊叔等人馬上往升降機內走去。由於人數太多，他們要分開乘答升降機。最後啊叔夫婦，那對情侶等人先下樓去；其餘的，包括那五位女生則等候下一部升降機。

啊叔站在升降機內往外揮手「拜拜啦，你班死廢青，慢慢建造你地既基地啦！」

「啊叔，我.地.地.獄.見！」白衫男瞪大眼睛，向啊叔舉起中指逐字吐出。

「我屌你個老母個臭閪，你咒 ...」升降機門緩緩關上，隔絕了啊叔的爆炸聲音。門關上的那刻，我們也隨即把雪櫃移至升降機門中央。

與此同時，大隻男及紋身男等人所搬的雪櫃都已放置在大堂圓櫈旁，等待剩下的人走到升降機裏，才正正式式把門封上。

剎那間，大堂回復平靜，平靜得讓各人都有點尷尬，大家的眼神也閃縮回避，很有可能是因為那五位女生的關係所致吧。我敢以子孫根作賭注，在場的男士們必定被她們吸引著，但又怕被她們發現，然後送上一句「夠未啊，死變態佬！」，才不敢看得那麼明顯。