中三一段不可能忘記的初戀: 4.

到星期日當然要補番琴日冇打嘅機，正當以為冇人發現琴日冇打機，恆仔係game入面msg我
 
「你琴日死咗去邊，琴日得我一個打好撚毒呀！」
 
「星期六日都打機就已經好毒，所以咪同啲friend出街。」
 
「等陣，你有啲咩friend我係唔識？你班friend同我個班一樣架啵，你又冇同我講你有去咩課外活動識咗新人。」恆仔，「你條粉腸係咪有咩瞞住我。」
 
佢又講得冇錯，平時我地兩個有咩秘密都會佢對方講，佢又冇出我點解無啦啦出。「冇，想出去呼吸下新鮮空氣呀嘛。」
 


「唔好傻啦你，星期六日啲刷經刷錢活動你寧願唔食晏都要打，有啲咩令你咁大犧牲？」
 
「吓，我平時咁毒架咩？連飯都唔食？定係你妒忌我有街出呢？」
 
「啱啱仲以為你同屋企人出街，睇你死都唔肯講又好似唔係啵。今日就打住機先，聽日你條仆街好同我講清楚。」
 
 
星期一入到課室，見到MING嫂容光煥發。
 
「哇你食春藥黎呀！」我


 
「你講野可唔可以文雅啲呢，抵你冇女。」MING嫂「我男朋友話今個星期會考曬mock paper，星期六帶我去迪迪尼呀！忍多幾日就有得同佢一齊玩啦。」
 
我聽完有少少心up「咁咪幾好，你條仔肯理番你。」
 
「你好似好唔開心啵？」MING嫂「做咩呀，鍾意咗我呀？」
 
「係呀，覺得你好與別不同，好有挑戰性呀。」我，「琴日打機打到點幾鐘好攰姐。」
 
「抵你死啦，番學都打到咁夜。」


 
「真係好攰，訓陣先。」
 
小息前，MING嫂「等陣你落唔落小食部。」
 
「咁遠點會…」突然諗起恆仔問話「呀，我應該會落去。」
 
「真係呀，可唔可以幫我買支茶字典？」
 
諗起小食部小息個時墟冚程度，「冇問題，但係小息完我先會番啵。」
 
「OK，我係唔想飲水姐。」
 
 
上完堂即刻跑落地下買野，小息完咗番課室。我見到恆仔個眼神好似想同我講「你死撚咗去邊。」


 
「你吹得我漲。」我眼神回應。
 
「我睇下你食晏點避我。」恆仔
 
「你支茶字典。」我同MING嫂講
 
「仲凍嘅？」MING嫂
 
「我小息完之前個一刻買嘅。」我
 
「多謝曬，幾多錢呀。」MING嫂
 
「好少錢姐冇所謂。」我
 


「錢還錢，路還路。」MING嫂
 
「得啦下次請我食飯。」我
 
「買支野比我就要我請我食飯，你都好著數姐。」MING嫂「定係又借啲想同我出街。」
 
「睇死你係唔想請我食飯姐，哎，心淡啦…」我
 
「我又冇話唔請…」MING嫂「星期六就唔得啦，星期日呢？」
 
「又出街！襯你條仔得閒你就陪佢多啲啦。」我
 
「校運會就到，佢話星期日約咗朋友練習唔得閒。」MING嫂「係喎，你參加咗咩。」
 
「我都冇體育細胞，參加咩都係陪跑架啦。」我「聽落去你好似好想請我食飯。」


 
「唔想食咪算囉。」MING嫂「陪跑仔。」
 
「我又冇話唔食啵，星期日呀嘛冇問題。」我
 
 
放lunch恆仔一路冇提個件事，佢唔提我就扮唔記得啦，點知一叫完野食。
 
「今日A同B有project同唔到我地食飯。所以係兄弟就好同我講你星期六死咗去邊。」恆仔
 
「一黎就放大絕，你玩曬啦！」我
 
「咁你肯唔肯講？」恆仔
 
我知道我唔講我地關係一定會惡化，「我同MING嫂出街姐…」


 
「MING嫂你都夠膽溝，你都好大膽啵。」恆仔
 
「普通朋友出街姐。」我
 
「你第一次同女仔出街就係同佢出啵！」恆仔
 
「咁人生總有第一次嘅，咪當練習下囉，我都學到野呀。」
 
「咁你小息買住支野飲唔好同我講比佢飲呀？」恆仔
 
「係比佢飲…」我
 
「咁出街邊個比錢食飯？定係AA？」恆仔
 
「點好意思叫女仔比錢呀？」我
 
「唔…」恆仔露出一個沉思嘅樣，「我覺得你好似做緊觀音兵。」
 
「吓，咩黎架。」認真講，六年前我真係聽都冇聽過有樣野叫做兵
 
「觀音兵係形容為了追求異性，願意為該異性做各種事情，極為順從，後來此詞引伸至互聯網論壇等虛擬社群，多用於男性。(引用香港網絡大典)，簡單啲黎講你比人呃緊。」(嗰陣仲未興收兵)
 
「但係佢唔似啲咁嘅女仔啵。」我
 
「咁就已經証明佢成功收咗你做兵，而兵仔永遠唔會覺得自己係兵。」恆仔「佢仲有冇約你出街？」
 
「星期日…」我
 
「我勸你推咗佢。」恆仔
 
「唔係咁架你聽我講…」我
 
「推咗佢啦，你而家尚早就好快啲脫離做兵行列。」恆仔
 
「仲有冇其他方法呀！」我
 
「推咗佢…」恆仔
 
「我諗到啦，不如咁咁咁咁咁咁…」我