中三一段不可能忘記的初戀: 16.
之後啲日子都係咁樣偷偷摸摸，有時都真係幾攰，不過阿晴都會安慰我好快會考完我地就可以光明正大咁係埋一齊。不過有啲野邊會冇人知就邊會咁順利，我識咗恆仔咁耐，有啲咩我係真係可以瞞住佢，而家個個禮拜六日都唔知死咗去邊，同阿晴講野都幾實幾曖昧，恆仔都開始都覺得我地唔係娘娘同兵o既關係咁簡單，佢有一次仲好直接問我係咪真係勾大嫂，我真係有諗過同佢講，不過我真係仲未有心理準備同佢講，加上同佢講咗一定比佢屌到仆街，雖然好對唔住呢個兄弟，但係真係仲未可以同佢講住
冇幾耐就係第二次計分o既大測，由於我放太多時間係同阿晴一齊，今次成績可以話係慘不忍睹，阿晴雖然都退咗唔少，不過佢個底本身就唔錯，加上佢一定簡文科，對佢黎講夠分升班就得架啦。
「屌，今次仆街了。」我
「你今次又真係差咗啲，連名次都冇出…」阿晴「不如之後個月我同你出少啲去等你多啲時間溫書啦…」
「真心個句，你叫我而家開始日日都係屋企溫書以我資質我都冇信心升到班，就算負碌比我升到，我都讀唔到自己想讀o既科，不如我都係留一年下年先簡啦…」
「唔好咁灰啦，你上次都一百三十幾架，你試下比啲心機啦，仲有我可以幫你呀嗎…」之後阿晴細細聲「我想你同我一齊升班呀…」
「你啲成績都唔好得去邊姐。唉，咁我只可以博一博啦…」我「係呢，MING幾時考完會考。」
「好似5月12日考埋bio，之後啲oral佢話唔洗點溫…」
「咁咪姐係仲有兩個星期都冇！」
「係呀，佢有個friend都連絡緊我話MING想考完試就見到我。」阿晴「講真我都係有啲驚，話曬考完試就同佢分手，加上佢咁大男人，我唔知會唔會…」
「仲有時間，你唔想面對面講面咁咪用其他途逕同佢講囉。」
「分手呢啲野都係面對面講有交代好似好啲。」阿晴「加上佢而都知我住係邊，以佢性格佢一定要講得清清楚楚先肯放我走。」
「咁又係，佢仲要係校草，比女飛呢啲野比人知真係幾冇面o既。」我「話時話，啱啱你話佢啲friend同你講，咩人黎架？」
「佢有啲好似手下之類o既人，今次呢個同form，有時佢唔得閒咪搵佢地傳話囉。」
「吓，打個電話或者msn唔係真係咁有難度呀嗎？」
「佢話咩聽到我把聲或者同我msn會停唔到手喎。」阿晴「算啦，佢有時係有啲奇怪，不過佢係呢間學校咁受歡迎，有人死心塌地跟佢一啲都唔出奇。」
「話時話，以前都有諗過跟佢搵食，話曬佢身邊搵女都容易啲。」我細細聲「但係好彩冇跟佢，唔係o既話冇可能同你一齊。」
「咁又係呀，之前你MING嫂前MING嫂後我以為你係佢啲o靚，你知啦，佢啲人個個都咁叫我，唔知係咪MING同佢講過，唔準同我講野之類，搞到同你坐我冇曬心情！」
番到屋企比咗張成績表比老豆老母，好出奇地冇鬧我，雖然我呢幾個月出多咗街，不過我啲成績一直都好一般，加上我個通識對上三次都肥咗，佢地都知今年升到班下年都未必升到，所以就問我想唔想去外國讀書，加上有親戚係外國所以有個照應。(仲未end唔好同我講一定係sad end 呀！)我個一刻真係唔識答，係有啲感動，始終我阿爸阿媽都唔係啲咩有錢人，供我出國用佢地好多積蓄，不過香港我有阿晴。最後佢地就話睇吓最尾成績係點，如果OK就係香港讀，如果真係唔掂就出國，而家佢地就開始搵學校，話曬有啲野唔係話走就走得。
終於到咗5月12日，個朝我見到有條友同阿晴講野，而阿晴冇野點答佢，唔通佢就係個啲所謂轉話o既人？
「個個男仔就係轉話？」
「算係掛，今日佢話放學等我，死啦，我而家真係好驚呀！」
「咁要發生o既野點都會發生o既，遲早都要講架啦，長痛不如短痛。」
「話就咁話姐，比著你都未必夠膽講啦！」
「咁又係，咁你試我從我個角度出發…」
「咁不如你試下我個角度出發，我知你唔想做第三者，不過你覺得講咗我地就可以即刻一齊，咁全世界都知我地有野啦！到時候我地就變全學校嘅公敵，你唔好咁自私淨係諗你先得架！」
「我唔只係諗自己咁簡單，如果你真係唔鍾意佢，做咩仲要拖呢？」
「你唔好講到分手咁簡單好唔好！我同佢一齊咁耐，就算我唔再鍾意佢，我同佢仲有感情架嘛！你話分手好似講兩句野跟住我地兩個就可以好平淡咁分開，好容易放得低，我地之後好大機會係學校見到面，加上我地同社可能會一齊做野，加上我同佢分手我可能又比人話同校草分手我又比人孤立…」阿晴又開始有少少想喊
我個一刻呆咗，我地靜咗，我見到老師都入咗課室，我先開口「對唔住，你知我毒撚冇拍過拖，冇諗過有咁多野。對唔住啦，唔好嬲啦…」
阿晴輕輕捉住我隻手對我笑一笑，見佢冇嬲我先放鬆咗啲，咁又係今日分咗手唔代表聽日就可以一齊到，唯有比啲時間對方啦。
到小息，有個人黎搵我
「你係咪五仔？」
「係，不過你係邊個呢？」
「呢樣野你唔冇需要知，我只係想講MING哥而家有時間同阿嫂出街，所以希望你之後可以盡量可以少啲同阿嫂接觸，唔好再影響佢地嘅關係。」
我當堂嚇一嚇，佢講完野就走咗啦，成個機械人咁，睇黎佢就係個啲轉話人，但係點解我聽落去佢啲說話好似話中有話咁嘅，問阿晴佢話個個都係咁唔洗理佢地，不過我都係小心啲，聽落去有一種要永遠都唔可以再接觸阿晴咁嘅語氣…
話咁快就放學
「MING係樓下等我，所以…」
「得啦今日唔洗陪你呀嗎，比啲勇氣，今晚等你好消息…」
「嗯，我會盡量做到最好架啦！」