望住阿晴離開,恆仔就走咗過
 
「做咩今日你個眼神咁悲哀嘅…」
 
「悲你老母!」
 
「做咩仲唔行,等運到?」
 
「你走先啦唔洗等我啦。」
 


「仲好講,呢排你一放學人都唔見。話時話今日門口做咩咁多人嘅?」恆仔「個個咪阿MING,佢今日接你女神放學啵。」
 
「係咩?男朋友接女朋友放學有幾出奇」
 
「點解你個語氣好似咁SAD?不過話時話,點解你好似晨早就知佢今日會黎?」
 
「SAD你老母,你唔係走架咩,仲留係到做咩?」
 
「你好想我走咩而家?等啲散曬先走啦,而家走同人迫餐死…」恆仔「講真呀,你呢排同MING嫂好似好熟咁嘅?」
 


「有咩?咪都係咁。」
 
「你唔好再hea答我好唔好!你認真覺得冇同MING嫂近咗咩?」睇黎恆仔都覺得我地有啲唔妥
 
「咁唔多唔少我地又真係講多咗野嘅…」我諗好唔好同恆仔講。「點講佢條仔呢兩個月考會考都唔得閒陪佢,佢咪搵多咗我囉?」
 
「真係得咁多?我地兩個兄弟有咩唔怕講啵!」
 
「咪就係咁,而家佢條仔得閒可能佢之後都唔會搵我…」我都係驚同佢講
 


「屌你唔好迫我打柒你!今朝你地兩個鬧文係度講咩分手又咩,我而家問你你係咪勾大嫂!?」
 
我今次真係嚇一嚇,事到如今,再瞞佢只係會破壞我地之間嘅友情,之後我就將我地成件事講曬比恆仔聽,除咗一齊訓個部份
 
「哇屌你你真係唔識死架啵,人地MING哥條女你都夠膽溝。唔怪得呢排放學人影都唔見,一齊踢波班友成日問你死咗去邊我都唔撚識答佢地。」恆仔「好啦,而家點收科先,你覺得佢地分咗手就咩事都冇?」
 
「最好就咁樣,唔係我都唔知點算…」
 
「你拆散全公認嘅校花校草,你覺得件事咁就完?」
 
「只要冇人知係我咪得囉…」
 
「唔好咁天真啦,就算真係唔關你事,你同佢行咁埋,啲人唔多唔少都會覺得同你有關。」
 
「咁都冇計架,唔係可以點姐…」


 
「就算比你地一齊咗,你襯得起人咩?就算你覺得唔係問題,到時全校都話鮮花牛糞,你頂唔頂得住個種壓力?」
 
我唔識答佢,「咁比著你會點做?」
 
「比著我兵都唔會做啦,搞到呢一步實在太遲…」恆仔「嚇吓你姐,可能分咗手咩事都冇之後happy ending 呢,做兄弟嘅我一定支持你嘅。
 
畢竟佢講個啲野唔係完全冇道理,我諗我只可以見步行步。
 
 
夜晚同阿晴MSN
 
「有冇好消息?」
 
「對唔住呀,我…唔夠膽講…」


 
「慢慢黎啦我唔會迫你。」
 
「知唔知今日佢帶咗花係學校門口等我,跟住佢啲朋友仲一人一枝花送比我…」
 
「哇!玩咁大,求婚呀?」
 
「不會佢咩要求都冇,我見佢搞咁大壇野,我都唔好意思同佢講分手。」
 
「比著我係MING做到咁條你竟然話分手我可能直接跳樓算…」
 
「咁佢又唔會咁嘅,不過我都唔想落佢面。我再過多幾日等件事淡少少先試下同佢講。」
 
「好啦,加油!」
 


之後幾日MING都會接阿晴放學,雖然冇日日送花,不過阿晴同我講佢日日都整唔同嘅野令到佢感動,佢見MING咁有心機就冇辦法講得出分手之類嘅說話。
 
MSN(星期五)
「其實我之前唔記得同你講啲野。」我「我今次考試考得差我好大機會去外國讀書…」
 
「吓!!你唔走得架,你走咗我點算!」
 
「其實如果MING真係對你咁好,我又可能會走,不如順其自然啦,比佢繼續做你男朋友,我只係你生命中嘅過客…」
 
「我之前咪講過無論如何我都會同MING分手,因為我已經唔鍾意佢,我只係想留係你身邊…」
 
「我知道你地之間有好多感情,你又容易心軟,令你好難講得出分手。」
 
「我聽日就講,我知分手要狠呀嗎,我只要你繼續係我身邊就得啦…」
 


「其實佢而家咪對你幾好,要我考得好已經接近冇可能,不如由佢繼續陪你…」
 
「我呢幾日都好想好想好想同你一齊,不過MING用曬我所有時間。我知道咁樣落去同你地兩個都好唔公平。信我,我聽日就同佢講!」
 
「你同佢分咗手唔代表我可以繼續陪你…」
 
「我已經同佢冇感覺,就算你走,我都要同你過埋淨低嘅,比一個開心嘅回憶比我地兩個…」
 
 
MSN(星期六)
「今日同佢講咗,唔知佢明唔明?」
 
「吓,點解會明唔明…」
 
「我同佢講其實我以後想自己一個,以後唔洗再黎陪我。」
 
「就係咁??跟住佢講咩?」
 
「佢話咁聽日就唔黎陪你,咁你就有時間自己一個。不過你想搵人陪記得搵我!」
 
「冇啦!?」
 
「係呀,就係咁多。」
 
「屌,你唔講分手係我都唔知你講咩啦!」
 
「唔好嬲啦,聽日MING唔陪我咪姐係你可以黎陪我囉!」
 
「拿,而家佢係你男朋友,唔係我,總之你一人未同佢分手,我都唔會陪你架。」
 
「我以前有男朋友你又陪我出街?」
 
「咁以前我係以朋友或者兵嘅身份,不過而家我出去就會變咗做地下情人嘅身份,呢樣野我講過我唔想做第三者。」
 
「咁你聽日以朋友嘅身份陪我咪得囉。」
 
「話轉就轉,邊有咁著數!」
 
「我地好耐冇出過街啦…」
 
「總之你未同佢講分手我都唔會出黎!」