【英雄系列0】石仔特工系列: 2.7 cocoon
2.7 cocoon
我問:「boss,咁..你地頭先傾過d乜呀?」
「都係同佢做下測謊呀,仲有要check下佢係咪真係完全冇功夫底」
「就係咁多?」我半信半疑
airi點頭道:「嗯,不過boss話條件就係,我要搬過黎一齊住」
「咩話?!」
boss:「一齊住方便你地溝通嘛,唔駛走黎走去...石仔,你過一過黎,我有野要同你講」
我被boss拉到一角:「做乜春呀?」
boss細聲道:「屌你,點解咁都比你識到個靚女sniper架..」
「大佬,巧合姐...何況,我都有瞳瞳啦,佢靚唔靚女都唔關我事啦」
「真係?」「緊係啦,我對瞳瞳一條心!boss你咁撚老就咪打後生女主意啦」
「關你咩事...by the way我比airi加入你地呢一件事...唔好講比上面既人知呀,唔係我同你地都一身蟻」上面既人相信就係boss再上一級既人
「仲有,阿昇響usb入面搵到既資料,IID班手足已經做緊野,你地等我地order就得啦」
「嗯」我點頭並向boss道別
落到去樓下既停車場,我問:「airi,頭先boss問左你d咩?」
airi笑道:「唔...都係問我家底,做下測謊之類咁啦,原來你地咁犀利架,頭先boss只係用電腦搵一搵我個名,就起哂我底,讀咩小中學都即刻睇到」
我打開車門:「嗯,我地IID個database好勁架,不過要去到查人底細既話就只有boss依d supervisor做到,我地3個係查唔到....不過,boss又會肯比你入埋黎一齊住咁奇怪既,係.係喎,airi..咁你介唔介意..」
airi坐上前座:「我冇所謂既,我同石仔你各自都有另一半架嘛...」似乎airi又唔介意同我地三個一齊住
「咁..又係既」
我送airi到九龍塘既住所:「石仔,我驚我唔夠力搬野呀,你可唔可以..上黎幫我..」
「吓..你唔介意既話我ok既...」說罷就同airi上去
airi既屋企十分平常,完全冇一般電影中殺手住所既設計
佢全屋有關殺手既野,就只有果一支用結他袋裝住既狙擊槍
我睇住airi將自己既衣物塞入行李箱:「嘩你都幾多衫吓架喎..」
airi尷尬笑道:「我冇乜興趣呀,就係鐘意買衫...我唔係好似港女咁要男朋友買架,呢d都係我返parttime賺既錢買架」的確,airi同港女最唔同既就係佢有一份氣質
「你..屋企都幾普通下..」
「石仔你覺得我屋企會有咩先?嘻嘻」
我環顧四圍,道:「例如..有d暗殺用既武器呀,槍呀咁囉...」
airi背起結他袋:「我daddy果陣做任務既時候都淨係用呢一把狙擊槍架咋...」
「係喎,咁airi你尋晚...咪係第一次殺人?」
airi點頭:「不過,果d人害到Jonathan搞成咁,罪有應得...石仔,我執好啦,行啦」
「嗯..」
「我返黎啦...」我打開門口,只見新月同阿昇均響客廳內
阿昇放低ps4手掣:「咦你地返黎啦...」
我:「岩岩我地搵過boss啦,佢話...」
「比airi加入我地,兼且入埋黎住丫嘛」新月插嘴道「頭先boss打左返黎啦..」
「乜boss咁快手既...」
airi向兩人打招呼:「新月,阿昇,以後就請多多關照啦」
阿昇滿面笑容,道:「嘻嘻,唔好咁講,歡迎你呀airi」
「以後多多指教」新月冷冷一句,似乎仲係對airi有戒心
「airi,我帶你上去放低行李先」我替airi拎起行李袋
「好呀,唔該石仔」
「呢間就係你間房啦,都..ok呀」大宅內巧合地有四間房,最後一間就留比airi
驚奇既airi四圍遊覽:「嘩,有埋私人洗手間咁豪呀...」
「咁..你換完衫響度抖下,我落去先」「嗯!」
我落到去,阿昇就馬上講:「真係好啦..以後有得同靚女airi一齊住..嘻嘻」
我向阿昇打眼色,佢亦留意同新月已經怒啤住佢
「哈哈講笑姐..唔講邊有得笑呀...係喎石仔,睇落airi都好似..幾鐘意你咁喎」
「收皮啦你,airi有男朋友架啦..何況我都有瞳瞳啦」
「日久生情呢家野...好難講既,嘿嘿」
其實阿昇講得冇錯,依家見airi既時間仲多過見瞳瞳
「為左慶祝airi加入我地,大家飲杯!!!」阿昇舉起紅酒大叫
「多..多謝你地呀」airi笑道
阿昇話要歡迎airi,特登call左pizza hit搞大食會
我:「airi,希望大家以後合作愉快,早日解決呢件事」
「嗯,石仔都加油啦!」
阿昇遞上一碟意粉:「新月bb,你既!」
「唔好叫我bb」新月接過意粉「唔...唔該」
聽到新月既道謝,阿昇馬上笑容滿面
「係喎,咁樣..我地幾時先會再有任務架?」airi咬左一口pizza,問
阿昇:「唔知呀,要等boss查埋隻usb..」
airi有點愕然:「咩..咩usb呀?」屌,阿昇又口疏
新月不再作隱瞞:「果隻usb有絕對零度安排逃犯襲擊銀行,同埋佢地每日巡邏既時間」
「咩..咩話....」airi有點唔相信聽到既事實
我道:「airi你唔好激動住,我地依家既證據仲係冇乜..所以usb入面既野唔可以」
「嗯...」airi失望地點頭
「我知你呢一刻好嬲,不過...你都唔可以單獨行動」
airi低住頭:「我..我知」
食完飯,阿昇落左去地下室打機,新月就返左上房
只係剩低我同airi兩個響度洗碗
「唔好意思呀airi,佢地兩個係咁冇手尾」
「唔緊要,好小事姐」
我見airi陰陰嘴笑,問:「做...做乜野呀?」
「我好耐..都冇試過咁熱鬧食飯啦」
「咁你平時都有Jonathan陪你架...」
airi:「咁佢都唔係日日上黎架嘛,同埋同你地三個...總係有一種家既感覺」
我笑道:「你咁樣..算係讚定彈呀?」
airi打左我一下:「緊係讚啦!」
呢幾日所發生既事實在太驚奇,營救肥仔深,發現airi係sniper,airi加入我地小隊...
感覺雖然唔錯,但係...總欠缺d野
就係瞳瞳
短短幾日,我同瞳瞳既關係好似疏遠左好多咁
可能係因為佢響cu真係太多野玩
作為男朋友我點都會尊重佢,不過內心總係有d un住un住
星期六既下晝,我約左瞳瞳響銅鑼灣行街
「唔好意思呀石仔,遲左少少」一把熟悉既聲音向我道歉,咪住先...
「瞳瞳...你....你染左頭髮既?」眼前既瞳瞳,頭髮竟然染左淺啡色
瞳瞳摸摸自己既秀髮,扁嘴道:「做咩呀石仔..你唔鐘意呀」
「唔係...好好睇呀」係就係靚左,不過總係覺得怪怪地
屌你啦石至磊,你鐘意瞳瞳把頭髮定瞳瞳本人呀on9!
「我尋日同組媽Lucy去染架,我開頭都驚你唔鐘意架..」
我攬住瞳瞳肩膀:「緊係唔會啦!瞳瞳你做咩我都鐘意架」
「嘻嘻!Lucy都話你係好男友,話你唔會管住我」屌,個lucy係咪潤鳩我咋
「石仔,陪我去呢間睇下丫」
同女人行街好撚悶,但係對方係瞳瞳既話就冇所謂啦
「瞳瞳依家上堂慣唔慣呀?」
「嗯!其他同學都好好人丫,有幾科仲係同yuri一齊上架」屌,果d狗公黎咋
「唉...」
瞳瞳放低睇緊既連身裙:「做咩呀石仔?」
「我始終都..冇乜信心上返u,依家冇左瞳瞳你,響hkcc果度簡直冇哂上堂動力」
「口花花啦你!」瞳瞳打左我一下「石仔你比d信心自己,我永遠support你架!」
「但係你都唔可以淨係理哂我架嘛,你咁辛苦入到U,就緊係享受下u life啦」
雖然瞳瞳咁講,但係我都知道,佢冇可能將自己所有時間留哂比我
既想瞳瞳每日可以陪住我,又唔想綁住瞳瞳,呢種心情好複雜
同瞳瞳行完街之後,我同佢去左一間西餐廳食飯
「石仔,你又話帶我返去見下你師父既...」瞳瞳問
「吓...」
「搞錯呀,原來你冇左件事架...」瞳瞳打我左臂一下
「唔..唔記得左嘛..」
咪住先....
如果帶瞳瞳返去,咁樣佢可能就會覺得我仲係重視佢,成功將佢拉返黎我身邊
「好丫...我返去問下師父丫!」
「係咪真架?你唔好呃我喎」
「緊係真啦」
「咁勾手指尾架啦,石仔你講野要算數呀」
我伸出左手手指尾:「嗯!」
為左瞳瞳,我決定鼓起勇氣向師父道歉