2.8 Unknown Orchestra

星期一晚

「速遞呀,麻煩簽收丫」
「唔該!」
我從速遞仔手上拎過呢個印上amazon logo既包裹

新月睇住我手上拎住既速遞包裹,送:「石仔,你訂咩黎呀?」
我輕輕笑一下,道:「到時你就知啦..」




「哼...懶神秘..」新月繼續睇住小說


「係喎係喎!新月呀..」我放低包裹,坐上梳化
「做咩呀?」
我有點尷尬,道:「...呃...可唔可以...幫我約師父..」

新月似乎對於我呢一句感到奇怪:「平時叫你返去又推三推四,做咩冇啦啦主動話返去呀」
的而且確,新月每次叫我返去既時候,我都用唔同既理由推搪
肚痛,約左瞳瞳,開sem,屋企出面水浸等等既藉口我都用過




所以新月聽到我主動咁講,應該覺得我short撚左

「冇...我想...帶..」
「你想帶你女朋友瞳瞳返去?」我都未講完,新月一估就中
我笑道:「哈哈,真係生我者父母,知我者新月呀」
新月一臉茫然,問:「你激嬲佢咩?」
「唔係,只不過..呢期佢好似同我有d疏遠咁囉,所以我想帶佢見下家長,等佢知道我仲重視佢」我飲左一啖Calpus,道

「見家長?我就覺得唔work啦」阿昇同airi從地下室走上黎
「你收皮啦阿昇,你識鬼溝女咩..係喎你地兩個頭先響下面搞咩呀?」




「頭先阿昇佢幫我支槍裝左指摸認證,再比左呢部andphone我」airi搖搖手上既andphone
我:「喂講返正題先,新月,唔該你幫我打比師父丫」
新月冷冷道:「你自己想約咪你自己打囉」
我捉住佢右臂,不斷求佢:「唔好咁啦,話哂同你都青梅竹馬丫,如果冇埋瞳瞳,我就真係冇哂生存既意義架啦...」
新月望住我,道:「就幫埋你呢一次」
「多謝新月!!!多謝你呀!!!」為表謝意,我不斷跪拜新月

新月拎起手機
「喂,師父..我聽日下晝想返黎探你呀...嗯,好啦聽日見」

「嗱,幫你約左啦石仔」
「但係..你頭先冇話我都去既?」
「我驚我咁講佢會唔比我返去,你聽日下晝3點同我一齊返去啦」
「咁又係..哈哈」





airi不解,問:「係呢,你地果個師父係個點既人黎架?」
我:「阿叔一個囉,爛口又爛賭」
新月再為我補充:「但係我同石仔既功夫都係師父教我地...不過佢好少講自己以前既事」
「唉唔撚理啦,總之幫到我達成目的就得啦」我道



第二日既下晝,上完堂之後我就同新月各自揸車返去屯門
我響舊屋樓下等左一陣,新月先行到黎,仲要拎住袋隔黎街既洪記燒臘
「新月你搞咁耐先到既?」
新月指指手上既發泡膠盒道:「你唔記得左師父鐘意食洪記既燒鵝咩?」
「記得..不過佢一把年紀就咪鬼食呢d肥野啦.開門啦,我唔知密碼呀」

本身蛇王緊既看更堅叔見到我地都嚇左一跳
「咦你地咪係13樓E但曾生既...」




新月微笑道:「係呀,今日返黎探下佢」
我輕聲道:「堅叔都仲係咁懶喎」
「不過佢都幾好人丫」新月說

由地上搭升降機上去13樓E室,一路上都係熟悉既氣味
臨到門口,新月將袋燒鵝交比我,指示我:「你一陣要話『我仲記得師父你鐘意食洪記燒鵝』呀,我諗咁樣佢會易話為d」
我有點不耐煩:「知啦,唔該新月」

醉翁之意不在酒,唔係為左瞳瞳,我都唔會返黎探呢個仆街師父啦,J左佢本寫真集就趕我走

「叮噹」新月按下門鐘
「卡!」木門慢慢打開,但打開門既並唔係師父
「咦係新月呀,好耐冇見啦!!!仲有呢個......你係石仔?」呢個就係隔黎屋既陳太,普通一個師奶,係師父既其中一隻麻雀腳
我都話過,師父既最大興趣就係賭錢,麻雀,牌九,啤牌,睇波,跑馬仔,過大海乜都岩





新月笑道:「係呀,我見今日放假,咪同石仔返黎探下你地同師父囉」
我亦點頭示好:「陳太姨姨你好」
陳太馬上打開門,好似當左呢度係自己屋企咁:「入黎先啦!」

「砰砰砰」一入到去,只見一張綠色四方枱
我還顧四周,間房既格局依舊,只係有d傢私已經換左新

坐響兩邊既李太同張生見到我同新月都好似見到ufo咁,紛紛放低手上既麻雀起身迎接我地
「新月,石仔,大個仔大個女啦喎,特登返黎探我地呀」
面前三位舊鄰居既熱烈招待,我同新月都有點招架唔住
呢種人情味大概只有鄰居先會有
除左...冇起到身既一個人

「仆街仔,捨得返黎啦咩,我以為你死撚左呀」
佢染住mk式既金毛,樣貌十足十tvb既視帝祥




「對唔住呀師父,前排太忙冇時間返黎...」
呢個阿叔,正正就係養左我十幾年,教我功夫既師父,曾漢梓

「冇時間?你咪撚昆我啦」師父眼尾都冇望我
「唔好咁嬲啦師父,我仲特登買左你最鐘意食既洪記燒鵝呀」我舉起手上既膠袋
師父不屑,道:「挑,我冇錢買呀家陣,駛你買埋比我?」
張生大感無奈:「曾生唔好咁啦...石仔話哂都係一個乖仔丫,係讀書差d姐,你到底因乜解究咁嬲佢呀?」
「條仆街仔做過乜,佢自己心知肚明啦!」我已經感覺到師父既怒火開始湧現

「我知我做乜都補償唔到架啦..」我拎出背囊內既深田恭子寫真集「呢本肥恭寫真集係我好耐之前買架啦,我一直都想同你道歉」其實我尋日收返黎果個amazon包裹,正正就係呢一本寫真
「道歉?」師父從圓凳上企起身「你覺得咁樣補償得到咩?!你試下睇住自己條女比人屌丫,你唔嬲我叫你做契爺呀!」係咪痴線架,拎個架妹同女朋友比?
陳太見勢色唔對路,道:「呃...咁你地一家人慢慢聊啦,我都要過返去煮飯啦」
「係呀,我夠膽接b女呀」李太亦拎起手袋準備走人
「唔夠腳呀,咁第日再打過啦曾生」張生見四缺二,只好離開
一瞬間,成間屋就只有我,新月,師父

新月對剛才師父既指控感到疑惑:「師父,其實果陣..咩事?」
「條仆街仔呀,拎我本簽名肥恭寫真集去打飛機呀,仲要射落去,你話抵唔抵屌丫!!」
面對住師父柴九式既怒罵,我只能不斷認低威:「對唔住呀師父..我都知補救唔到,但係你都冇理由嬲我一世架嘛,我真係好有誠意向你道歉架..」
「你老母有誠意大哂呀,有誠意就一早返黎道歉啦!你今日咁樣返黎,睇死你咪又係有野求我!」仆街,師父幾時變到咁醒架
被師父識穿,我只好點頭講出自己既目的:「我..我想帶我女朋友返黎食餐飯..但我冇理由帶佢去IID果d大屋架嘛」
「哦..平時就住大屋,依家條女叫到就借我過橋,你當我係乜呀...」
我不斷求情:「唔好啦師父,我再唔帶佢返黎,我同佢段感情就變淡架啦..你都唔想見到我呢個徒弟仔拍拖一年都未夠就散架嘛」呢d關頭,我唯有講到有咁誇張得咁誇張
新月亦幫口:「係囉,都過左咁耐啦,你都應該原諒石仔啦...」

師父望一望我:「你真係咁想帶條女返黎?」
我堅定地點頭:「嗯」
師父望望電視機旁既相架:「唔係唔得既,不過...」
聽到呢句,我激動得捉住師父:「係咪真架師父,你原諒我嗱..」
師父甩開我對手:「屌你呀,我唔想你條仆街仔失戀果陣又賴我咋,肥恭寫真集既事都未同你計呀」
「嘻嘻,幾時都冇師父最好人架啦...」眼見成功求和,我嬉皮笑臉道

師父既臉色忽然變得沉重:「不過...你地要幫我一個忙」
「咩事呀?我咩都幫師父你搞掂佢丫」

師父拎起果一個相架,相入面係師父抱住個bb女
「你地,要幫我搵返我個女」

聽到呢一句,我同新月都唔識反應
我地一直冇聽師父講過自己既事,甚至我問過佢呢幅相入面個bb女係咪佢個女,佢都只係話果個係佢姪女
「你..你唔係話過呢個係你姪女黎咋咩...」我問
「挑!我呃你咋嘛!」
新月單刀直入,問:「咁...點解師父你同你個女失散左既?」
師父嘆一口氣:「19年前,我係一個社團既雙花紅棍黎..」雙花紅棍係指金牌打手
「本來響我個女出世之後我都想收山架啦,不過...」
我繼續問落去:「之後點呀?」

「點知有次,阿公叫我去殺另一個社團既坐館,但係我失左手,比對家落左江湖追殺令」
師父吞吞口水:「阿公比左筆錢我過去荷蘭避一避風頭,一避..就避左四年」
「果一筆錢我每日都拎哂黎買彩票,入賭場...本來我應該一早就響果邊輸哂d錢,不過又比我響山窮水盡果陣又中彩票又連中兩鋪老虎機,真係講你都唔信,果度d錢,如果我省d洗既話都夠我食成世」
我恍然大悟:「唔怪之得你唔返工都有錢啦」

「直到有一日,阿公過黎搵我,話果個社團個坐館已經金盤洗手,叫我返黎香港...但係,當我返到黎既時候先知道,原來我老婆當年以為我死左,傷心到自殺」師父講到呢度,雙眼都濕濕地
「而我個女呢,就完全冇哂消息...但聽果陣d鄰居講,我老婆係掉低佢去孤兒院先自殺」
新月不禁問:「咁樣..你收養我地...」
師父望望天花版「唔多唔少,都係為左贖罪,係我欠左佢地兩母子」

我:「咁講,你個女的確仲有機會在生既,不過要搵既話的確有難度...佢叫咩名?」
「曾慧玲,智慧個慧,玲瓏個玲...計返既話,佢同你地一樣都係19歲」

我拍拍心口:「師父放心啦,我..一定會搵返佢」
師父輕輕一笑:「嘿..係就最好啦」

為左維繫同瞳瞳既關係,就算師父叫我食屎我都制
已有 0 人追稿