【英雄系列0】石仔特工系列: 2.17 Wherever You Are
「咔咔咔咔咔咔咔咔咔」病床移動既聲音,響遍整個走廊
「airi,醒下呀,醒下呀!!」我同新月跟住病床,捉住airi雙手
病床被推到手術室內
護士阻住我倆:「唔好意思,病人依家要進行急救,唔可以入去..」
我望住手術室門上既燈,一言不發
「如果我果陣察覺到果個槍手...airi就唔駛搞成咁」我抱住頭,不停埋怨自己
「石仔...」新月拍拍我既膊頭「都唔係淨係你既錯既,我..都有責任」
「唉..如果airi有咩三長兩短....」
「石仔!!!新月!!!airi呢?!!!!」
一人跑進走廊,係阿昇
「醫生依家同佢做緊手術..」我低住頭
阿昇一拳打向牆壁:「唉!!點解我果陣唔繼續用無人機睇水呀,真係冇用呀我!!!」
我地三人都非常自責
依家只能祈求airi得夠大步躐過
大約一個鐘後,boss都黎左
「boss...」一般黎講我都唔會響中環果個office以外既地方見到boss,所以我地都感到意外
滿頭大汗既boss問:「airi呢?佢冇野丫嘛?」
「佢仲響入面」新月指指手術室
「唉..希望佢冇事啦」boss雙手合十:「絕對零度果邊你地唔駛擔心,佢地既司令已經比我地押左返總部,一陣會盤問佢」
「嗯..」
我冇諗到,原來boss真係會咁關心我地
「噠!」手術室既燈終於熄左
醫生一走出黎,我地四人就衝埋去
「醫生,airi佢..點呀?」
「今次好好彩,病人只係受到中度既腦震盪,不過病人仲係處於昏迷狀態」醫生冷靜道
「咁就好啦,咁佢幾時先醒返呀?」我問
「呢層仲未知...」
我低住頭,心裡面非常擔心airi
幾時先會醒?會唔會呢世都醒唔返?
boss繼續鼓勵住我:「放心啦石仔,呢種情況多數好快醒返既..」
唉..希望啦
呢段時間,我地三個就響醫院照顧airi
因為我,真係冇乜心機上堂
我每日都會去cu搵瞳瞳,不過..佢依然都係唔理我
一星期後
我,新月,阿昇如常咁去醫院
正當我地上到病房果一層時
一個醫生剛剛從airi既房間行出黎
「醫生!」我馬上跑過去
醫生都已經認得我地:「係你地呀,病人佢..」
聽到呢句我忽然緊張起黎,我緊緊捉住醫生膊頭:「醫生,airi佢唔係有咩事丫嘛?!」
「哈哈..石仔,你做咩呀?」
我轉頭一望
係一個久違既笑容
「駛唔駛擔心到咁呀?你嚇親醫生啦!」
「airi!」我馬上跑入病房:「你醒返啦..」
「嗯..頭先醒左啦」airi摸摸頭:「不過個頭仲有少少痛咁囉..」
門外既醫生道:「呢d頭痛係暫時性既姐,黎緊你仲需要留院觀察架..」
「嗯,知啦醫生!」
「嘩,好生猛喎airi」阿昇同新月都已經入左黎,放低果籃
airi:「嘿嘿,駛乜講!」
「果陣真係多得你咋airi,如果唔係你,我同石仔都分分鐘..」新月亦少有咁多謝airi
airi搖搖手:「咁..我地..係朋友黎架嘛..係呢,絕對零度既事搞成點呀?」
「我地已經成功瓦解左佢地啦,個司令依家比IID夾左返總部」我答
airi低頭微笑:「總算..幫Jonathan...」
「airi!!!!!!!」
呢一把聲,同時吸引左我地四人既目光
門外既,係一個身穿病人衫,高大既型棍青年,我覺得佢比起大文豪仲要型..
「Jonathan??!!!你醒返啦?」airi大叫
原來,佢就係airi既男朋友Jonathan
「嗯,我前日先岩岩醒返」Jonathan馬上緊握住airi既玉手:「頭先都係聽姑娘講,我先知道你受左傷入黎?點解你會...」
「呃...我過馬路果陣冇睇到,比車撞到...」airi支支吾吾回答
「乜你咁唔小心架!」
airi亦捉住Jonathan既手:「唔緊要啦,依家我地都冇事就夠啦,嘻嘻」見到Jonathan,airi既笑容都好似更甜
Jonathan留意到我地三人:「咦..佢地係...」
「我地係airi依家既同學,你好」我地向Jonathan示個好
「嗯,你好,我昏迷既呢段時間真係麻煩哂你地啦..」Jonathan對我地鞠躬
我搖搖手:「唔好咁講,airi係我地既朋友嘛,唔阻你地啦,我地聽日再黎啦airi」
「咁好啦,拜拜!」
「做乜咁快走呀石仔,岩岩黎咋喎我地..」阿昇問
新月冷冷道:「你睇唔到架咩?我地做緊電燈膽呀..」
「咪係囉,比airi佢同Jonathan聚下舊啦..」
阿昇無奈道:「你又岩既,不過...依家又搞掂左絕對零度,亦即係話...airi唔會再係我地既拍檔」
我:「咁,唔係拍檔姐,我地都仲係朋友架嘛..」
新月乘機轉換話題:「係喎,咁石仔你同瞳瞳...」
一提起瞳瞳,我不自覺咁唉左一聲:「唔知呀,佢就黎生日,我諗住借呢個機會氹返佢」
10月20號,正正係瞳瞳生日
大約三日之後,airi已經可以出院,叫我去醫院接佢返去
airi既精神比起醒返果日好好多
響車上
「石仔呀,你氹返瞳瞳未呀?」
「唉..仲未呀..佢仲係唔睬我」我無奈道
airi扁住嘴:「其實都咁耐啦,我估佢都好快嬲完架啦...」
「希..希望啦」老實講,我都仲係唔睇好
airi鼓勵住我:「比住信心自己啦石仔!我同Jonathan依家都平安無事咯..」
「係呀,石仔呀..我決定左啦」
「我..要同Jonathan去英國...」
「英..英國?!」我馬上打左個突
「嗯,佢話同我..去果邊繼續讀書,佢屋企人都響哂果邊架啦」airi平靜道「我問左boss架啦,佢話只要我承諾唔會同其他人講IID既野就可以脫離IID」
我問:「咁...即係以後都響果邊住架喎?」
「可能啦..不過總好過響香港讀asso既,嘻嘻」
我笑道:「你都岩既,有錢緊係出國讀啦」
airi咁講得,即係Jonathan都係一個有錢仔,可以幫airi比埋學費
「做咩呀石仔?唔捨得我呀?」airi奸笑住
我扮無野:「唔係..你可以同Jonathan一齊我都替你高興」
「不過...唔捨得就點都有架啦」
「其實..」airi低住頭:「我都有d唔捨得..你..地」
「話哂我同你地都出生入死左幾次啦,石仔你又救左我幾次..」
我望住佢,airi又望住我
「唔..唔好誤會呀石仔,我係..當你..係好好好好既朋友咋」airi馬上臉紅
我馬上大笑:「你講咩呀airi,我..都只係當你係好好好好既朋友咋,我仲有瞳瞳架嘛」
「嗯,嘻嘻」airi亦都只係響度傻笑
「咁airi你幾時過去呀?」
「下星期四下晝5點,你會唔會送我機架?」
「嗯,緊係會啦」
返到去淺水灣既大宅
我將airi要走既事同左阿昇新月講
「吓,走得咁突然?!」阿昇被呢個消息嚇倒
「Jonathan話想同我快d過去,適應下喎..」
「估唔到我地只係相處左一個幾月,咁快就要分別」新月低住頭
airi依家笑容滿瀉:「但係我地呢一個月過得好充實呢,我地四個係好好好好既朋友黎嘛!而且我仲可以返黎探你地,你地又可以黎英國探我架嘛」
阿昇:「既然係咁,咁今日開始,我地每晚都食豪d!當係同airi farewell!!」
「好!!!」
「石仔,唔該哂你,又要你幫我執行李,嘻嘻」airi摺起佢既衣物,放入行李
「唔緊要,好朋友邊會計較呀」
今日就係airi要飛既日子
「原來都已經住左響度咁一個月啦喎,唔知英國間屋係咪都係咁大呢?」airi響房間巡行
「英國咁大,分分鐘大過呢度啦」我笑道
「不過呢,如果得我同Jonathan住,又好似太靜喎」airi扁住嘴
我:「咁你可以skype搵我地三個架嘛,阿昇又係廢青黎既,你日日同佢傾都得啦....唉搞掂!落去啦airi,阿昇同新月佢地響車等緊我地啦..係喎你支m24..」
airi:「嘻嘻,留返比你留念啦,話唔定你有用呢..」
「石仔..」airi走過黎,牽住我對手
「吓..做乜呀」
「砰」
airi一下將我攬住,仲要係攬得好實
「石仔,多謝你..」airi索住鼻水:「呢段時間冇左你,我..真係唔知點算」
我亦輕輕咁抱住佢:「放心...我地..仲會有機會再見..」
「...嗯..」
呢一個,算係我同airi最完美既結局
望住天空上飛翔既國泰客機,我不自覺嘆一口氣
「做咩呀?仲係唔捨得呀?」坐響前座既新月問
「唔係...」我坐響toyota既後座:「要講既野都講哂啦...」
「唔好咁sad啦石仔,最多比d歌你聽下啦」渣住車既阿昇安慰我,並開著旁邊既cd機
Wherever you are, I'll always make you smile
Wherever you are, I'm always by your side
Whatever you say,君を思う気持ち
I promise you "forever" right now
「阿昇你可唔可以播d開心d既歌呀?」新月怒視住阿昇
「唔好意思囉..咁我轉歌啦」
我叫停阿昇:「唔駛啦,呢條歌..幾好聽」
雖然繼rina之後又有一個拍檔要同我分別,但係今次我都係替airi開心既
因為佢可以同佢深愛既人離開香港,去英國重新生活
響英國,佢唔再係殺手個女,sniper,佢係張愛莉
「嘩,咁耐冇搵我,原來發生左咁多事..」熒幕上既rina飲住可樂
我笑道:「airi又係學你咁樣呀,走左去..」
「但係聽落去,airi應該會好幸福丫,你應該祝福佢先係架」
「我知..我咪祝福左佢囉」我無奈道,點解個個都要講到我放唔低airi咁:「係喎你同果個智乜春野..」
「係智也呀!...我同佢.....拍緊拖啦!」
我睇住rina春風滿面,都替佢高興:「咁都搞得掂佢呀,我真係恭喜你呀哈哈」
rina奸笑住:「嘿嘿駛唔駛send d閃光彈比你呢?」
「屌...唔駛啦」
「咁..你同瞳瞳點算呀?」rina問
「我諗過架啦,聽日係佢生日,我諗住揸車去cu接佢,同佢去食飯..」我講出我既計劃
rina托住下巴:「你咁多日都有去搵佢,我諗瞳瞳佢都開始軟化架啦,加油呀石仔!」
「嗯..」
一早已經問左yuri,知道瞳瞳今日要返parttime
第二日既六點,我就揸住自己既type r去到瞳瞳做野既果間響沙田既時裝店對面
我拎住鮮花,等待住瞳瞳
終於,身穿便服既瞳瞳從走出黎
「瞳...」我正想叫瞳瞳既時候,一件更令我難以置信既事出現左
佢同佢身後一個黑髮既俊男,一齊上左鋪頭門口既一架黑色bmw
瞳瞳佢,完全冇察覺到我
呢一刻我終於記起
呢個黑髮男,係響漢堡店瞳瞳比我睇既果張相中,唯一既一個黑髮mk
佢既身影,就係3月我同rina見到,同Sombras殺手會面既果個人