「沙!!!」
一盤冷水倒向我既臉

我慢慢張開眼,發現自己正坐響木凳上
睇見自己上身赤裸既驅體,褲袋既andphone,手機都唔見哂
慢慢回想起,頭先我追緊個蒙面人,之後唔知做乜斷左片

我正想起身,但發現,我雙手被綁響椅背後
屌...做乜鳩呀





我抬起頭,係一間頗為殘舊既房間,大約有700呎,房間被窗外既陽光照射住
響我面前既,係一個戴住黑超,高一米八,身穿軍服既白髮中年男子,大概係南歐裔
左右兩旁有四個手持步槍既軍佬
睇黎,我比絕對零度捉左

呢一刻,我只係希望佢唔好好似某一集007咁,鞭我春袋

中年男子終於開口,用純正英文道:「嘿,醒啦?IID既特工」睇黎佢已經知道我既身份
「你地...係絕對零度?」雖然我英文得lv3,但係對話都唔係問題
佢點一點頭:「嗯,呢度就係大潭,你地每晚都有派人黎監視既地方」




我笑道:「咁,睇黎你已經對我地瞭如指掌啦喎」
「一般般啦,了解既程度同你地對我地既差唔多」

中年男子企起身:「我,就係絕對零度既總司令,Sergio Carricondo」
對住Sergio,我只係諗起gigi既西班牙籍老公

「我地呢隊人馬,雖然比你地攻擊過幾次,但係響香港既人馬依然仲有四十人..」
「你地係為咩要黎香港?」
「為咩?」Sergio笑左一聲:「當然係為錢架啦...有人比錢我地兼設個局安排我地入黎,咁我地咪做囉,傭兵組織就係咁架啦」
我問:「係....Sombras?」





「bingo!」中年男子向我單眼一下:「估得岩呀IID特工,就係Sombras」
「你地一直搵緊既果樣野..係咩黎?」我繼續追問
「咁A先生又冇講喎,佢淨係講左裝住果樣野個箱既特徵姐」Sergio對住我奸笑:「不過,上兩個星期有另一個恐怖組織又出左更多既錢叫我地將果樣野比佢地..」
「所以..你就殺左果個保安局局長..」我冷靜道
「嗯!就係咁簡單,因為佢已經冇利用價值,我地絕對零度可以靠自己搵到果樣野」
「你地唔驚得罪A先生同Sombras咩?」
Sergio輕鬆答:「呢個世界,邊個有錢,邊個就有實力架啦,只要將果樣野攞到手,我地就有100億美金可以袋袋平安」

100億????!!!
呢一個金額係我從未幻想過既大數目
咁,當日韋志輝講既果樣野,咪就係值
1000億....?!!!!

「點解..你要同我講咁多野?」我好奇問




Sergio拎起腰間既手槍:「我習慣,會響殺人之前,將果個人想知既野講比佢聽,等佢死得眼閉」
「即係..你依家要殺左我?」我冷笑一聲
Sergio用槍指住我頭:「嗯..你依家死得眼閉啦」
呢個絕對係,我人生最接近死亡既一刻


「砰!!!!!」「砰!!!!!」「砰!!!!!」「砰!!!!!」
窗外傳來多聲巨響
「咩事呀?」Sergio感到意外
一個同樣身穿軍裝既男人走入黎:「大佬!有入侵者呀!!」
Sergio既表情馬上180度轉變:「咩話!有幾多人?!」
「大約有十幾人呀!」
「仆街!!」Sergio著急起黎,走到另一邊既門口:「你地,幫我搞掂佢!」
說罷就走出呢一間大房





其中一人已經走到我面前,舉起步槍
「砰!!」
前面既大門被撞開
「轟轟轟轟轟轟轟轟轟轟轟轟轟轟轟轟!!!!!」
接著既係不斷響起既槍聲,將屋內既四人射低

「石仔...」門前既係兩個女性既身影,各拎住一把步槍
果然冇估錯,係airi同新月
airi好緊張:「石仔,你有冇事呀?!!」馬上走過黎幫我鬆綁

「嘩..乜咁遲呀...你地黎遲一步既話我就要食蓮子羹架啦」我笑道
新月怪責我:「一日都係石仔你,叫左你唔好追架啦,搞到我地要call boss搵combat team黎強攻」再遞上我既andphone同電話
「係呢,你地點搵到我架.」我起身鬆一鬆自己既四肢,並執起一支步槍
airi笑道:「全靠阿昇咋,佢原來一早響你對鞋度裝左跟蹤器,所以我地先知你比人捉左黎」
我馬上戴上耳機:「阿昇,今次真係多得你喎」




「乜說話丫石仔!不過有咩留返一陣先講啦,你地依家一定要..」
我插嘴:「我知,要收絕對零度皮丫嘛,頭先果個乜春野總司令就係行左去呢邊啦..」
新月拎起andphone,睇住童軍中心既平面圖:「佢應該行緊去...室外果一塊草地,頭先阿昇用無人機睇過,果度有架直升機..」
「佢應該係想走佬啦」airi道
「咁其他絕對零度既人馬呢?點算?」我問
新月已經打開後門「combat team同佢地響門口駁緊火,我同airi都係響另一邊偷入黎架...」
「嗯..咁追啦」

走出呢道門後,響我地面前既係一條走廊
「砰砰砰砰砰砰砰砰!!!!!!」
仆街,走廊盡頭有兩個絕對零度既人等緊我地

我大喊:「小心呀!!!」再將身旁既airi拉入門後
「石仔..唔該..」airi向我道講
「有咩一陣先講啦airi!!」我暗望住出面:「你地兩個掩護我,我衝過去啦!!」




「石仔呀..」
airi話口未完,我已經跑向走廊既盡頭

不出我所料,果兩個槍手已經想拎槍射向我
我馬上跣落地下,再用手上既步槍瞄准左邊既槍手
「砰砰!」連開左兩三槍,就成功射殺佢
正當我想橫移步槍,再射埋另一邊既果個槍手

「吱!」果個槍手一瞬間被爆頭
我回頭一看,係airi用佢把m24,射殺槍手
「嘿,唔該哂喎airi,今次輪到你幫我tim」
airi報以微笑回應:「唔駛..我地行啦!」


跑左大約兩條長走廊,終於見到新月所指既果個草坪
「係直升機呀!!」airi大叫
即使相距三四百米,但都已經見到
個Sergio拎住一個手提袋,坐上直升機

阿昇向我地匯報情況:「依家正門果堆槍手已經比combat team既人收哂皮啦,佢地趕緊入黎啦」
「嗯..不過作用都唔太啦,個司令已經上左直升機啦!」新月答

直升機已經起飛,駛去大潭港既方向
我同新月邊跑邊對住直升機開槍
「砰!砰!砰!」

新月:「我地咁樣用步槍射都冇用...」
我:「屌,部直升機好撚硬淨喎!」
再係咁落去,部直升機出到海既話就冇機會捉到佢架啦...

「airi!」
跑響我後面既airi問:「石仔,做咩呀?」
「你用m24..射佢落黎啦」
「吓點射呀?!!」airi被我嚇到呆左
「射個機師位囉!!!!!!」

「我...盡力啦...」面對呢d緊急關頭,airi唯有接受我既要求

airi拎起掛響背後既m24狙擊槍,右膝跪地,瞄准住直升機前面既玻璃
「吱!」
子彈一下子就射穿玻璃,頓時血花四濺
直升機馬上失控,衝向前方既樹林中

「嘿,都話左你掂架啦airi」我笑道
但我身後既airi嚇到成頭濕哂:「哈..撞彩姐..」
新月:「airi做得好呀...依家咁樣.佢就走唔甩啦」

我地三人跑到直升機墜落既位置,只見滿身鮮血既Sergio慢慢響地上爬動
「司令,今次係我贏啦」我用步槍指住佢
Serigo答:「嘿,細路..」說罷,新月就用手銬將Sergio扣住
嗯,絕對零度成功比我地瓦解,任務完..

「小心呀!!!!!」
剎那間,airi將我推開
佢搶左我手上既步槍,向住剛才我地行過黎果條路開火
「砰砰砰!!」原來果度,仲有一個未死既槍手
但可惜,airi呢一槍黎得太遲,槍手早已經開槍,並且擊中
我地身後既直升機

「轟!!!!!!!!!!!!!!!!!!!!!!!!!!!!!」
直升機馬上爆炸
我地四人都被強大既爆風炸開

「嘩屌..」跌響地下既我摸摸頭,好彩唔係太傷:「你地冇乜事丫嘛..」
新月慢慢起身:「我冇事..」而Sergio仲響地下,睇黎冇乜大礙
「咁..airi呢..」

我回頭一看
只見airi滿頭鮮血,倒響地上
「airi!!!!airi!!!!阿昇!!!call救護隊呀!!!!!!」
已有 0 人追稿