【驚慄】《冥婚：血紅色的裙褂》點解會係我同你？: 二十二、冥婚
二十二、冥婚
嘉駿和鄺子仁急急的衝出酒館，奔往陳影紅的莊園，以期找到藍朗蕎的身影！
「個個陳影紅會唔會對阿蕎做咩事？」鄺子仁邊跑邊問。
「就係唔知⋯⋯無論點我都唔可以畀阿蕎有事。」嘉駿說。
不消一會兒，兩人已經跑到陳影紅的莊園。嘉駿跑到陳影紅的家門外，起勢的拍門。
「陳影紅！你出來呀！」嘉駿高呼道。
「出來呀！」鄺子仁也一起幫忙高呼。
不久，陳影紅便出來，但她似乎卻並未入睡，她還身穿外出的服飾、頭髮也沒亂。
「係你地？做咩事？係咪阿蕎同左你地講喇？」陳影紅語調平淡溫和，令嘉駿和鄺子仁霎時間摸不著頭腦。
「你唔好扮野，你收埋左阿蕎係邊？」嘉駿質問陳影紅，只見陳影紅臉露驚訝神色。
「咩呀？咩收埋佢？我仲以為佢返左去搵你地⋯⋯即係佢無返過去？」陳影紅問。
「你講咩呀？」嘉駿問，他也被陳影紅弄得亂了套。
「佢岩岩係搵過我⋯⋯而我都同佢相認左，其實我係佢媽媽⋯⋯」陳影紅說。
「而你就係柳絮個仔，文駿，我有無講錯？我叫左佢返去同你講清楚，然後一齊阻止冥婚⋯⋯咁即係佢唔見左？」陳影紅問。
「佢無返過來⋯⋯」嘉駿說。
「仲企係到？一齊去搵佢喇！聽日就要冥婚，到時就來唔切架喇！」陳影紅緊張的說，連嘉駿都開始被弄到一塌糊塗。
「駿！」
這時三人都聽到阿蕎的呼聲，一起看去遠方，就發現藍朗蕎正跟一黑實男人站在一起。
藍朗蕎和嘉駿對上了視線，兩人的眼神由初初的擔憂，變成驚喜，再飛奔去對方那處。那種先是擔憂對方安危然後知道對方安好的複雜感情，完全在兩人的眼裡透現出來。
兩人帶淚衝向對方處，他們均只想緊緊擁著對方，只是⋯⋯
他們都穿過了對方。
他們都忘了人鬼殊途，他們根本不可以碰到對方⋯⋯
古一、陳影紅和鄺子仁見狀也一同走過去。
「都唔記得左添⋯⋯哈哈。」藍朗蕎轉身看著嘉駿苦笑道。
「係囉，我都係⋯⋯不過最緊要你無事。」嘉駿笑說。
「你係咩人？」陳影紅警覺的看著古一。
「呢位係古一大師，岩岩係佢救左我。」藍朗蕎連忙向眾人介紹古一。
「救左你？你岩岩做咩事？」陳影紅問。
「你同邊個講緊野？」鄺子仁問陳影紅，眾人都忘了鄺子仁還是看不見藍朗蕎。古一笑了笑，然後走近鄺子仁。
「等我幫下你。」古一說，然後唸了幾句咒語，再用拇指用力按壓鄺子仁的眉心，鄺子仁感到一陣痛楚和天旋地轉的暈眩然後跌倒在地上。
「哇頂⋯⋯好痛呀⋯⋯」鄺子仁正要抱怨古一的粗暴的時候，鄺子仁卻終於見到藍朗蕎⋯⋯
是已為鬼魂的藍朗蕎。
「蕎⋯⋯」鄺子仁呆呆的看著藍朗蕎，他方知道，藍朗蕎一直以來所說的怪異事情都未必一定是假的，鬼、神之說，也許都有其真實性。
他後悔了，後悔沒有相信過藍朗蕎。
「好喇，感性野遲下再講，我諗我地有好多野要討論。」古一說，打斷了這個百感交集的場面。
-
「原來個個王玄天係咁既人！豈有此理！我仲咁相信佢，原來一切都係佢設既局！」嘉駿氣憤的說。
「而家所有野都清清楚楚，佢地聽日一定會逼蔓渟同正宇進行冥婚，我地點都要阻止佢。」陳影紅說。
「唉，估唔到我師弟帶左咁多麻煩畀你地⋯⋯」古一歎氣道。
「佢由細到大都對學法好執著，一直要追求更厲害更特別既法術，不論正邪佢都想學。最近佢就想利用佢捉返來既鬼去煉一種好陰毒既法術，但如果要成功，佢要起碼過萬隻怨靈先可以做到⋯⋯」古一說。
「邊有咁多呀⋯⋯」鄺子仁說。
「所以，當佢聽到幽山村有山妖既傳說之後，就來左呢到睇，一隻高階既妖可以抵上好多既怨靈既份量⋯⋯」
「咁你話⋯⋯佢會唔會可以捉到山妖？」嘉駿問。
「佢根本唔知自己面對緊既係咩，呢隻山妖唔係咁簡單，要對付佢都唔係咁易。」陳影紅說。
「咁我地有無辦法可以消滅佢？」藍朗蕎問。
「以我對佢咁多年既經驗，我知道佢都唔係萬能，而佢一定係有一個肉身係呢條村附近，只係咁多年來我都諗唔通，呢樣野到底係咩。」陳影紅說。
「唔好諗咁多住，聽日佢地就會準備冥婚，我地搞掂左聽日單野先。」古一說。
正當眾人正在商議對策之際，忽然一陣拍門聲傳來。陳影紅趕緊去開門，發現來者是一名與陳影紅較為友好的村民。
「紅姐！唔好意思阻住你休⋯⋯」村民此時才發現陳影紅家中十分熱鬧。
「咩事？咁夜搵得我咁急？」陳影紅問，但村民卻打量著嘉駿、鄺子仁及古一等人。
「照講喇。」陳影紅說。
「孫老太帶左個法師去搵班長老⋯⋯話場冥婚推遲一次又一次，山神好嬲⋯⋯所以為左幽山村，佢地決定要即時冥婚喎！」
「咁快？仲諗住直接跳過我⋯⋯豈有此理！」陳影紅說。
「我地要去山神廟！即刻！」陳影紅說。
-
嘉駿、藍朗蕎、鄺子仁、陳影紅及古一也到達了山神殿，只見汪媽媽正在替神情呆濟的汪蔓渟上妝，準備待會的冥婚祭典。而敖正宇也已經到達了，他的精神仍然是在崩潰邊緣、沒法自控。
當然孫老太、王玄天也正在山神殿，準備主持儀式。
「停手呀你地！而家幾時換左規矩？做儀式唔使問過我？」陳影紅霸氣壓倒全場。
「你其身不正，處事不公，點配做儀式主持人？大家，企係佢隔離個個男仔叫嘉駿，就係佢好朋友柳絮個仔！大家認得佢架喇！上次同佢來個個女仔阿蕎，就係陳影紅個女！」王玄天說，在場的長老不禁感到驚訝。
「明明應有二十年前死左，但而家重現人間，點解？就係因為佢為左救自己個女，所以呃大家、講大話！一個咁自私、咁唔公正既人，我地仲應該要信佢咩？」王玄天高聲叫道。
「師弟，夠喇，你收手喇，你做咁多野都係為左自己既煉屍大法，但你知唔知咁樣好危險？」古一也開口說。
「各位！係，以前我做過好多錯事，親手將兩對男女送去死，仲有好多人嚇到自殺、殺人⋯⋯我滿手鮮血，我預左我會有報應，只係我估唔到⋯⋯報應唔係報落我自己到，而係報落我最親最錫既人身上⋯⋯阿蕎已經死左喇！」陳影紅叫道。
「呢件事係錯架，我地唔應該咁做，從一開始就唔應該！今日有份害死呢對男女既話，你地今日可能會無事，但安穩一時，邊個會知道山神下次係咪會要你？定要你既子子孫孫？你既朋友？」
「各位聽我講，唔好再繼續落去，我地要反抗！」陳影紅說。
「唔好理佢！我地繼續！新郎新娘就位！」王玄天說，敖正宇慢慢走過去就位⋯⋯
「汪太！你可以救返你個女！唔使佢死架！你個仔都會無事！」陳影紅連忙拉著汪媽媽，但汪媽媽已被恐懼控制。
「唔好搞我個仔⋯⋯唔好⋯⋯」汪媽媽嘀咕著。
「正宇！你醒下喇！你唔記得寶賢啦咩？佢唔會想你咁樣架！」嘉駿也去拉著敖正宇。
「你畀返個仔條命我呀！賤女人！」孫老太衝過去要捏著陳影紅！整座山神廟亂作一團！
「妖！等我來！」鄺子仁見狀也惱了，便衝去祭壇將所有用品掃跌！
「冥咩婚呀！唔使冥婚喇！取消呀！」鄺子仁大叫道，全場都忽然靜了。
「你⋯⋯」王玄天看著鄺子仁，氣得咬牙切齒。
「斃喇⋯⋯我從來未試過咁樣⋯⋯」其中一個長老驚慌的說。
山神殿的燭光忽然熄滅，怪風也沒預警的襲來，將眾人的恐懼推至最高點！
「無喇⋯⋯無喇⋯⋯佢嬲喇佢嬲喇⋯⋯」長老說道。
「來喇終於⋯⋯」王玄天狡黠的說。
眾人都戒備的看著周圍，以防山妖忽然出來。正當眾人惶恐之際，孫老太卻忽然發出刺耳的笑聲！
「哈哈哈哈哈哈哈⋯⋯」孫老太在瘋狂笑著。
「孫夫人？」陳影紅甩開孫老太的手，問道。可是孫老太並沒回應。
「你地呢班奴隸⋯⋯好大膽⋯⋯竟然一次又一次逆我意？」孫老太用怪異的聲音說，他們都知道，山妖已經佔據了孫老太的身體。
「係你喇！」王玄天見狀，馬上拿出幾道紫色的符紙，全部貼到孫老太的額頭！
「雕蟲小技！」山妖說，然後一下子撕掉符紙，好像完全沒效似的。
王玄天沒有停下手，他馬上取出一卷墨斗線，並纏著孫老太的身體，墨斗線忽然發光發熱，灼傷了孫老太。
「啊！」孫老太發出非人的尖叫聲音，令人心寒不已！王玄天竭力與山妖拉扯，但山妖的力量似乎更勝一籌！
古一也不會見死不救，古一同樣取出一卷墨斗線，在另一方纏著孫老太的身體，兩師兄弟一前一後夾攻著山妖。
「啊！」孫老太這次叫得更淒厲，王玄天、古一拼盡全力，額角都出汗，而王玄天更是用墨斗線一同纏上自己的手，以防脫掉。但線拉扯得好緊，勒得王玄天的手出血。
「放手呀師弟！佢太強大喇！」古一勸勉著王玄天，但王玄天沒有理會古一的勸告，繼續與孫老太鬥扯。
「不自量力！」孫老太大叫，古一知道他們根本沒有勝算，毅然放手；但王玄天卻要鬥到底，結果墨斗線把王玄天的手都夾爆了！
「呀！」王玄天痛苦叫道，然後被孫老太發出的力量彈撞到牆，吐血死亡。
「唔好話我唔畀機會你地班人，三日後我要十對男女，如果少一個，我就要你地幽山村一個不留，全部都要做我奴隸！」孫老太叫道，然後她的頭忽然扭轉180度，手腳也不自然的扭曲著，然後升上去，凌空的用詭異目光看著眾人。
然後一下子掉到地上，孫老太也死了，她的表情仍是猙獰的笑著。
在場的人都嚇壞了，這是他們有生以來最驚險的一次，也是最可怕的一次。
-
嘉駿、藍朗蕎、鄺子仁、陳影紅、古一及幾名長老都聚在一起談論此事，而汪媽媽早已暈倒了；敖正宇受了驚嚇，卻由痴呆變回驚恐，似乎精神有所好轉；汪蔓渟也未回復狀態。
「媽媽⋯⋯唔好犧牲我⋯⋯」汪蔓渟重覆著。
「媽媽⋯⋯」汪蔓渟仍然故我的這樣說。
「佢幾時先會好返？」陳影紅問嘉駿。
「應該過多陣會無事，只係藥力未過姐。」嘉駿說。
「咁而家點算？連王玄天都死埋，得你一個又點收拾佢？」鄺子仁問。
「⋯⋯」古一臉有愁色。
「仲有方法既，係咪？」藍朗蕎問。
「仲有咩？你岩岩都睇到，兩大法師合力都搞成咁⋯⋯我地呢種凡人做得咩？」鄺子仁問。
「其實⋯⋯方法唔係話無⋯⋯不過⋯⋯」古一似有遲疑。
「講喇古師父，而家咩方法都要試架喇。」嘉駿說。
「來呢到之前，我都查過呢隻山妖既底細，佢既道行好深，應該有好幾百年功力。不過佢亦都唔係天下無敵。」古一說。
「要治佢，就要先用一種佢最怕既武器，就係刀。」古一說。
「刀？我有幾十把喇，畀曬村民一人一把都仲得呀！」鄺子仁說。
「你聽我講埋先，呢把刀唔係普通刀，而係殺人無數既一把凶刀。」古一說。
「殺人無數？唔係掛⋯⋯」鄺子仁說。
「咩刀係殺人無數⋯⋯」藍朗蕎思考著。
「據我所知，古時曾經有個人用佢既刀斬殺過山妖一次，但呢隻山妖無完全死到，所以如今就有咁厲害既力量同功力，只要我地用呢把刀再斬佢一次，就可以消滅佢。」古一說。
「咩刀咁巴閉？」嘉駿問。
「呢把刀⋯⋯係清朝末年最後一位劊子手留低既物品⋯⋯」古一說。
「下？清末？點搵？」藍朗蕎問。
「距離呢到只有半日路程，就有個位劊子手既後人住係個到。」古一說。
「不過個條村⋯⋯有些少危險。」古一皺眉頭的說。
「你想講⋯⋯個條好整齊⋯⋯但無人去、無人住既瀧山村？」陳影紅問，古一點點頭。
-
「渟渟，起身喇。」一把溫柔的女聲傳入汪蔓渟耳中，而且好熟悉⋯⋯
「渟渟⋯⋯係我呀⋯⋯姐姐呀。」汪蔓渟又再聽到這把聲，她緩緩張開眼，驚見身穿白衣的姐姐汪蔓頤就站在自己面前。
「姐姐⋯⋯你來接我架？」汪蔓渟迷糊的問。
「傻妹⋯⋯緊係唔係，只係我唔可以畀你再訓，你訓得太耐喇⋯⋯而且有野要你幫手架。」汪蔓頤溫柔的說。
「但我好累⋯⋯」汪蔓渟說。
「你既屋企等緊你去保護⋯⋯係我地既屋企，你唔可以放棄⋯⋯」汪蔓頤說。
「我好想放棄⋯⋯好累⋯⋯」
「如果連你自己都放棄，仲有邊個會幫你？唔好羨慕人地點解有咁好，應該諗下點解自己做唔到，知道嗎？」汪蔓頤問。
「乖喇，要起身作戰喇⋯⋯」汪蔓頤說道，溫柔的摸了摸汪蔓渟的臉頰。
忽然間，汪蔓渟就醒過來了。
「係⋯⋯要作戰喇！」汪蔓渟驚醒道。
未完待續