We love but we can't (沒有發生的愛情): 第六集
2020年11月14日 (SAT)
“等你好耐啦！咁遲架！”
“小姐，又買呢樣又買個樣。。。”
“我天后黎架，出街成日俾人偷拍架，我唔想俾人影到我食魚蛋，一陣唱片公司又會逼我減肥同鬧我一大餐。。。咪叫你黎我留下囉！”
“仲有呀！你明星黎架，食咖哩魚蛋飲可樂。。。想做魯芬呀？”
“你知唔知道呢個世界最犯賤嘅人係咩？”
“你講過好多次啦！唔鍾意食嘢嘅人呀嘛！但係你係咪想做返以前個死肥婆呀？”
“哥仔，我已經食少咗好多架啦！你知唔知除咗咖哩魚蛋，我仲好掛住牛雜、碗仔翅併生菜魚滑、炸雞，仲要全部都係辣！為咗歌唱生涯。。。我要同佢地絕交。。。人生就咁冇咗意義。。。依家想食幾粒魚蛋者，駛唔駛咁鬧我呀！”
“所以之前咪同你講你唔適合呢行囉！你有好多好多嘢都唔適合！”
“你係我男朋友黎架！講吓d正面少少嘅嘢得唔得者？”
“對唔住wor, 我唔識～”
“唔睬你呀！我食魚蛋。。。 阿嚏！”
“你凍唔凍呀？你睇你，得十幾度仲著短褲！你大個架啦！獨立d啦！大小姐！”
“平時有助手幫我呀嘛！屋企又有工人，駛乜咁獨立者！”
“得！我知自己點樣都拗唔過你。。。用我件外套kum住對腳啦！”
眼前呢個平時喺台上華麗打扮，但依家著住短褲踢拖嘅Snowy，Nelson心入面其實好矛盾。雖然有少少睇唔過自己嘅女朋友過度依賴，但係自己又會心甘情願照顧對方。望住一個食相毫無儀態嘅女仔，佢最想同對方講一聲“希望你永遠都唔好長大！”
“喂！你叫我出黎唔係應該只係想食魚蛋呀？”
“嗱！你老實答我呀！你有冇睇過前幾日個篇訪問？”
“搞到你遲到個篇？。。。大概有啦”
“即係有啦！咩大概者！一日到黑口是心非。。。睇完有冇唔開心呀？”
“我做咩為你唔開心呀？你邊位呀？”
“我讚Gordon唔讚你wor~我d fans仲喺我facebook留言叫我飛咗你即刻搵返Gordon拍拖Wor?"
“。。。”
“你唔好唔出聲啦！”
“咁你想我答你d咩？”
“你唔答就算啦！咁我講我想講嘅嘢啦。。。對唔住～”
“咩話你講咩話？”
“同你say sorry呀！係咪唔想要呀？”
“你個潑婦會道歉？世界末日～”
“咁某程度上我係俾緊綠帽你帶嘅～”
“。。。你知就好啦！”
“死仔呀！終於肯講真話！”
“咁如果我同你講我會唔開心，你一定會發我脾氣架～”
“我唔會囉！我有冇咁蠻不講理呀！”
“你會囉！”
“我唔會！係埋一齊都四年啦！有邊次真係認真發你脾氣呀！不過呢。。。我應承你。。。我以後講少d Gordon。”
“唔似你wor...識得就人。。。”
“咁又同我係埋一齊咁耐？”
“逼於無奈。。。大概係神嘅安排～要我好好要咗你，咁其他男仔唔洗受苦～”
“都唔知前世做錯d咩！搞到今世有你呢個男朋友！”
“不過，你唔駛因為我而同Gordon有避忌。。。我明架！”
人地話熱戀期有3個月，但對於Nelson同Snowy，係唔會有任何period.佢地拍拖嘅4年裡面，只有鬧交，嗌交同嘈交，什麼“我愛你！有你就好！”嘅說話。。。只不過，佢地心入面係好享受串對方、見到對方為自己生氣，大概因為咁。。。大家就喺埋一齊四年～
“話時話，我地好似冇咩點做過浪漫嘢。。。”
“買宵夜俾你喺公園食仲想點呀？”
“小學個陣睇“新紮師妹”，我同我屋企人講我一定要揀吳彥祖做我男朋友。中學個陣睇完“繼承者們”同“來自星星的你”我同班姊妹講我要搵李敏鎬同金秀賢做男朋友，一拖二。。。但係依家。。。冇諗過會同一個平平無奇嘅你喺埋一齊～”
“我夠冇諗過自己會同個港女一齊囉！”
“世界就係咁架啦！你以前想同邊個人喺埋一齊，到最後呢？質素有心儀對像一半已經偷笑！就好似中學個陣我想同Gordon...sor..."
"個陣你想同佢戀愛呀嘛！我好講道理嘅，呢d係past tense！”
“大個仔wor, 有前途呀！”
“。。。”
“今晚好難得呀，天上面會見到咁多星星。。。Nelson...多謝你呢幾年黎照亮住我。。。”
“呢d嘢講自你把口有d想嘔！”
“認真架！你仲會做我粒星星架可？”
“。。。睇吓點啦。。。”
Nelson自己清楚知道，Snowy係真心真意愛對方，佢亦都明白，喺Snowy心目中，講到重要性，自己一定唔會比Gordon高，但係佢輸得心服口服，因為佢知道。。。Gordon比自己，係更了解Snowy嘅脾性。。。Nelson之所以同Snowy可以 keep住咁好嘅關係。。。某程度上。。。亦都因為Gordon...
對於Snowy，冇錯佢係好鍾意洗錢，睇韓劇個陣亦都會幻想住自己有個六呎高嘅白馬王子，仲係可以做闊太個種，但回到現實，拍拖結婚係一生一世嘅事。鑽石戒指？自己都買得到俾自己！六呎高嘅型男？身邊嘅dancers都大把。榮耀？隨時隨地唱幾句已經有好多人為佢歡呼。。。佢所需要嘅，係一個一心一意愛佢嘅男朋友，唔渴望對方會為佢做到d咩，偶然一次喺公園食魚蛋，就已經係一件好幸福嘅事。。。