「咇!」球證鳴笛正式開波。阿夫將個波輕輕傳比阿毛,再回後比Kevin。正式拉開喱場比賽嘅序幕。基本上我哋喱場波個部署就係踢Control 風格,再加埋Retain Possession、Close Down More、Work Ball into Box嘅戰術。 

一開波冇耐,對面獲得一個角球機會,由教畜主踢。佢一踢個波出嚟,畜隊半隊人向前柱衝,聰哥、河童、Kevin即刻跟晒去近柱。但係原來個波開去尾柱,禁區入面成一半人失晒位咁濟,對面高大後衛正額一撞……

「呯!」「嘩!」個波撞到條橫眉正一正彈咗出界。對面個高佬頂波果陣,我哋成隊好似比人點晒穴好似觀眾咁睇住佢頂,一啲後應都冇。「專注啲呀!」我見一開波大家好似未瞓醒咁,大聲嗌出去鼓勵吓大家。喱個時候個死教畜拎過嚟望住我,對住我係度恥笑。真係想打柒佢。 

去到上半場中段,比利一個直線,穿過晒所有人。阿毛飛身剷射,柱邊僅僅差一個波位出界。之後,阿毛把握對面解圍失誤第一時間窩利抽埋去,結果偏離目標。臨完上半場前,阿毛截到對方傳波,斜傳比係右邊嘅Kevin,Kevin諗都唔諗one touch斜直線比入楔嘅小夫,小夫控定之後射個地波。對面守門員以為佢勁ban上角所以企定定係度,冇伸腳或者撲落地下,個波一直向龍門嘅左下角去……  

「哎呀!」「咇咇咇。」柱邊半個波位出界。唉……上半場最後一個黃金機會最終都把握唔到,0比0完半場。「喂,大家唔好咁樣,咁踢啱咖喇,係差啲運姐。」威廉見大家射極唔入,開始有啲失咗信心,所以激勵吓大家。「下半場,文仔入去替聰哥,放多一個人上去攻喇!」 





「咇。」球證鳴笛示意我哋入番場。「正義聯盟!打倒共產黨!USH!」唔好以為我哋參加緊學運。其實教畜係學校個稱號縮寫同共產黨一樣。你懂的,中學果陣總係覺得咁樣指桑罵槐好聰明,自己爽完人哋又唔知我哋鬧緊佢。 

一開波,對面隊就交個波比教畜,任佢扭。小夫同Kevin都俾佢扭過咗,我見佢扭咗兩個有少少控甩腳就走過去爭身位。比我食咗身位之後個死教畜一嘢拉住我,唔比我推走個波,我借機批一批佢掙。「喂,拉衫呀球證。」 

「嗶,你兩個過一過嚟。」「嘩!」場面啲6D同學係度起哄。「你哋咁樣落去唔係踢波,係打交咖喇。」其實由一開波,我哋只要同個教畜有埋身肉搏,就即刻迪亞高哥斯達上身咁,毛手毛腳小動作多多跟住就扮嘢。再加埋我哋啲剷波攔截都幾過火吓,每次都係「要腳唔要波」。所以個球證應該都忍咗我哋好耐,終於比咗張黃牌我同教畜。