[新手][校園] 當你中六果年先遇到教畜，最好嘅解決辦法就係‧‧‧‧‧‧: 19. 拚死一戰(下)

無段段第一次犯規就攞咗黃牌之後，動作唔多唔少都要收歛啲，但係個死教畜見我攞咗黃牌，就係咁走過嚟撩我，諗住最多大家玉石俱墳。比利見唔多對路就叫我去前面攻唔洗返後。基本上，我哋下半場開始咗成十分鐘，都冇創造到任何機會，大家都係傳吓失吓咁樣。 

去到中段，我哋前面果4個開始迫得再緊啲，結果比阿毛迫甩咗對面嘅控球。我見到即刻攝去右邊嘅空位。阿毛斜線短傳比我。我控定之後猶豫咗一吓，因為控得太痴腳，所以諗緊推唔推多一吓。「射呀！」後場一聲嗌過嚟。我諗都唔諗用腳內側射出去。「頂，食個波食得唔係好應添。」射果陣其實我個心都虛虛哋。

「呯！」 

「Yeah！！！」死好彩，個波中內柱彈入。我見到班女同學興奮到係個stand跳，一啲儀態都冇。入咗波之後，我第一刻竟然係想個教畜示威。所以我走咗去佢面前，跪低拜咗佢三吓，仲要作勢插三支香。依家諗番其實都唔知點解果陣會咁做，可能覺得好型掛。 

對面都估唔到喱球波輸得咁突然，由失控球到失波都係半分鐘左右，所以都有啲失神。「喂，專注啲呀！前鋒係前面，後衛企後面。」教畜見自己班波突然之間頹咗，即刻扮隊長喝佢班隊友。 
「你講乜勁呀？ 」我緊係把握機會串一串佢，仲要附加幾吓恥笑。「哈哈哈 」全場連觀眾都比個教畜搞到爆笑。 





重新開番波之後，對面就一味係禁區外亂槍掃射，希望可以扳平。但係由於我哋好似人肉長城咁圍係自己半場，所以一係省到人，一係離題萬丈。終於個教畜離門20幾碼一射，第一次中龍，不過就比阿風托出底線。

喱球角球對面成隊除咗龍門之外都湧晒入禁區，希望用人海戰術可以臨完場前追和。「舉高手！」教畜係角球點準備斬個波入禁區。我哋用區域聯防3條友圍係龍門前小禁區頂。個波一斬，係5碼點附近落，又係果個後衛鶴立雞群跳起一頂。
 
可惜今次佢跳個時間錯咗，個波軟弱無力比阿風沒收，之後再擲比已經轉身向對面跑嘅比利，比利控定再地波傳去比係中線食花生嘅小夫。小夫控定轉身之後，基本上就面對住一片廣闊嘅半場同埋對面龍門。推到禁區頂面對出迎嘅龍門，左中右上中下任佢射。結果，小夫條友玩命咁射大細龍門。
 
「咇！」二比零。