[魔法/武俠]《窮撚被女飛 之 鳩闖魔法世界》: 第二十一章 - ok，我認我想順便溝女，但都唔駛搵兩條友睇實我啩
來到雲天客棧開了兩間客房，我和呀牛小瑩就先去吃飯。
吃飯時我想起老伯的遺言，心想還是再勸一下呀牛吧。
「呀牛，前輩佢同我講過，話唔想你哋去搵赤丹子報仇......」
我還沒說完，呀牛就大聲道﹕「唔得！我要同爺爺報仇！」
他的聲浪惹得幾枱食客都朝我們看來，我連忙安撫他﹕「冷靜啲冷靜啲......」
呀牛吸了一口氣，黯然道﹕「爺爺養育我們成人，怎麼可以對仇人置之不理......」
小瑩已經放下筷子在垂淚。
我嘆了口氣﹕「赤丹子武功高強，前輩驚你哋有危險呀......」
「我不怕死！」
「我知，但你死咗又有邊個照顧小瑩? 」
呀牛看了小瑩一眼，神情有些動搖，頃刻，他問小瑩﹕「小瑩，你怎麽說? 」
小瑩淚眼汪汪的看了呀牛一眼，道﹕「我......不想哥哥以身犯險，但...但...爺爺......」
呀牛突然道﹕「楊大哥的武功好像很厲害，我待他回來後就求他收我為徒，我一定要為爺爺報仇！」
我也不知道說甚麽才好，呀牛這種牛一般的性格，除了老伯和小瑩外，看來沒有誰能令他聽話，但看來小瑩自己也想替老伯報仇啊......
這件事我先放下了，待楊兄回來後跟他商量一下再說。
晚飯後，因為趕了整天路的關係，我們早早就各自回房休息。
呀牛回到房中片刻就睡著了，我因為還未習慣早睡早起的生活，所以就跳上了屋頂吹吹涼風，順便練習一下魔法。
到了差不多月上中天，楊兄突然出現在我身旁﹕「喂！咁夜唔瞓坐喺屋頂做乜? 」
「無呀，見瞓唔著咪上嚟曬吓月光，順便練吓魔法囉。你呢? 同Lucy去到咁夜先返嘅? 你哋唔係...嘿嘿......」我刻意做出很猥瑣的模樣，就是想試探一下他對Lucy的態度。
「痴線！你諗咗去邊呀? 我當佢係妹，佢當我係呀哥咋。」
係咩? 都唔知你真傻定係扮懵，我一睇就知Lucy冧你啦。
「而且，仲有人等緊我......」楊兄望向遙遠的黑夜，大概他又想起他的小龍女吧。
「知啦知啦大情聖，我講吓笑啫......喂話時話你幾時教我內功同劍法呀? 」還是先讓他教我武功要緊，反正他的感情事也不到我來管。
「聽日啦，教完之後你自己勤啲練，入到去書院我幫唔到你啦。」
「嗯......」我想起呀牛的事，於是問他﹕「喂有件事想問下你意見。」
「嗯? 」
「就咁，呀牛想跟你學武功。」
「吓? 做咩? ............呃...佢想搵嗰個咩赤丹子報仇呀? 」
我點點頭。
楊兄凝重起來﹕「我諗唔係咁易，上次同佢交過手，雖然佢唔及我，但我要打贏佢都唔係咁易，起碼要過百招之外。」
「咁我都係再勸吓呀牛啦......」
「嗯......其實我都可以教佢武功嘅......」
「你贊成佢報仇? 」
「佢報唔報仇係佢自己嘅決定，但佢變強咗，起碼多一分力保護佢自己同小瑩。而且，我諗佢可以同埋你一齊混入去，起碼多個人多個照應嘛。」
「吓? ......佢入埋去? 真係請恕我直言，佢憨吓憨吓咁我驚佢壞你大事喎。」
楊兄笑道﹕「哈...應該唔會嘅，起碼有人幫我睇住你，等你唔會掛住溝女嘛。」
我無言以對，因為他說的很大可能會成為事實。
楊兄早一步去睡，我還未有睡意所以繼續在屋頂練習。
「比返你，咸濕仔。」唉瘋突然出現在我眼前。
「點呀? 同楊兄影咗啲咩淫照呀? 」我接過唉瘋後就打算看看他們今天去了甚麼地方。
「淫你老味！唔準睇呀！」Lucy又伸手來搶。
我一邊東躲西避，一邊道﹕「好心你女仔之家唔好咁爛口啦，楊兄唔鍾意女仔講粗口㗎。」
「關你撚事咩！比個電話我...比我呀！比......」我站起來把手伸高，她比我矮多了所以跳起都抓不到電話。
「部電話我㗎小姐，你影得都預咗我會睇啦。」
她鼓起腮坐下﹕「屌！睇啦睇啦！睇撚飽佢啦！」
其實我只是逗逗她而已，我收起電話，道﹕「喂，你認真㗎? 」
「認乜撚嘢真呀? 」
我也不轉彎抹角，直接道﹕「I mean，你真係鍾意咗楊兄? 」
她憤然轉過頭來，面紅耳赤的道﹕「無呀無呀！我當佢係......」
我在她說出違心之言之前，已經按著她的嘴巴﹕「你唔駛答我，你用個心去答你自己，你，係咪鍾意楊兄? 」
Lucy瞪大雙眼，呼吸急促，然後......
「噗」的一聲，一件女裝在空中飄盪落下，衣服下伸出一顆烏溜溜的貓頭。
「噢...你夠鐘變返貓喇......」
Lucy矋了我一眼，一聲不發就跳走了，消失之前我聽到她說﹕「幫我拎返套衫比大哥收好。」
翌日一早，我被呀牛叫醒﹕「南兄，南兄，大家都在等你呢，吃早飯了。」
我看一看電話，這才早上六時，這麽早起有金執嗎?
下到樓去，楊兄和小瑩都在吃早餐，但Lucy卻不在。
「南大哥，早上好。」小瑩一雙妙目看著我。
「早......呵欠......」
「尋晚好夜瞓呀? 」楊兄喝了口粥問。
「點零啦，始終唔慣早睡早起。」
「哈！咁你以後要慣吓啦，內功要練得好，一定要倒塔咁早起身。」
「吓............」我已經拉長了臉。
呀牛聽到內功，馬上在楊兄跟前跪下叩頭﹕「請楊大哥收我為徒教我武功，讓我可以親手替爺爺報仇。」
呀牛你晨早流流搞啲咁嘅嘢? 好彩一大早周圍無乜人啫。
楊兄左手一扶，呀牛不由自主的站起來，但他的樣子還是很倔強。
楊兄微笑道﹕「要我教你唔係唔得，不過你要應承我幾件事。」
呀牛忙不迭連連點頭﹕「甚麼我也可以答應的！」
「好，第一件，我要呀南去幫我做一件事，你要同佢一齊去，必要時要保護佢安全。」
「無問題！」
「等等！」我問楊兄﹕「喂乜有生命危險㗎? 」
「你知你把口幾臭啦，我驚你得罪人比人打死。」
「..................」
就算係，都唔駛呀牛保護我呀? 我點睇都好打過佢喎。
「第二，遇到咩危險唔可以逞強，最緊要留返條命仔。」
「明白！」
「最後，除非得到我准許，否則唔可以私下搵赤丹子報仇。」
「這......」呀牛臉露難色。
「呢個係為你好，赤丹子一啲都唔簡單，如果你以為學識兩招就可以報仇，你一定死硬，我都唔會教你武功。」
小瑩插嘴﹕「哥！你就聽楊大哥的話吧。」
「好！我答應了！師父在上，請受徒兒一拜。」說罷又要跪倒叩頭。
楊兄按住了他，笑道﹕「唔駛啦，我都係因為自己嘅事先教你武功啫，我哋以兄弟相稱啦。」
呀牛大喜﹕「楊大哥在上，請受小弟一拜！」然後又要拜倒，楊兄給他弄得啼笑皆非。
吃過早餐，楊兄帶著我們來到城郊一處密林。
小瑩問﹕「對了楊大哥，怎麼不見了露...絲姑娘的? 她到哪裏去了? 早上醒來時她也不在房中呢。」
就在這個時候，一只黑貓在前方慢慢走過來，正是Lucy。
楊兄瞄了Lucy一眼，然後睜著眼說謊﹕「Lucy? 她有啲事要做，所以唔同我哋一齊啦。」
大概楊兄還不想將Lucy就是黑貓的秘密說出來吧，所以我也沒有說穿。
呀牛道﹕「噢...是嗎? 那真可惜啊......」
我聞言邪笑道﹕「你可惜啲咩呢? 噚日先識咋喎，唔通你對人一見鍾情? Lucy靚係幾靚嘅，不過我同你講呀，女人唔可以剩係睇個樣㗎，身材都好重要。Lucy佢其實......」
「喵！」Lucy猛然跳過來伸爪往我臉上抓來。
偷襲? ！
還好我反應夠快，腰向後一拗避開她的一爪，並暗中以一顆小火星射往她下巴。
Lucy頭一側就避開了，然後我感到左腳踝一緊，然後失去了平衡向後倒，原來竟然被一條藤蔓纏住了。
困境之藤? 呀牛同小瑩都唔識木之術，唔通係楊兄出手? 但應該不會㗎.....唔通係Lucy? 佢變咗貓仲可以用五行術? ！
我倒在地上，Lucy伸出利爪在我眼前比劃著，那寒光閃閃的指甲似是要把我的眼珠子挖出來。
「好喇，唔好玩啦。」楊兄道。
小瑩的聲音很興奮﹕「嘩！這只黑貓真漂亮！」她伸手想輕撫Lucy的頭。
Lucy避開了，並一下子跳到楊兄的肩上伏下。
小瑩問﹕「楊大哥，這黑貓是你養的嗎? 」
「吓? ......呃...算係啦......」
「真可愛啊！牠叫甚麼名字? 」
「佢叫Lu.......」看來楊兄霎時間想不到一個假名字。
「Lu? 」
我道﹕「隻貓叫路飛。」
小瑩﹕「路飛? 」
「係呀，叫路飛呀。呵，楊兄。」我望向他。
楊兄忙道﹕「係呀係呀......路飛......」
Lucy聽到我們的對話，已經在發出很不滿的胡胡聲了。
我沒有理會她，繼續剛才跟呀牛的對話﹕「呀牛，你頭先做咩話Lucy唔喺度可惜呀? 因為無咗個靚女喺度? 」
呀牛臉紅起來﹕「不是不是！別誤會。只是難得有一個姑娘可以陪伴小瑩，現在又不在我覺得可惜罷了。」
楊兄﹕「好啦好啦，唔好再講無謂嘢啦。呀牛，過幾日你同呀南要去翰林院做學生，你嘅責任就係要幫佢完成一個調查任務。」
「調查任務? 我們要調查甚麼? 」
「一個人，一個女人。」
話說Lucy在中仁城與楊兄會合之前，她與楊兄分別在不同的地方尋找小龍女的下落。結果楊兄他小龍女沒有尋著，卻遇上了我。而Lucy則在雲天城尋到疑似人物，所以趕緊到中仁城通知楊兄。那天楊兄得知這個消息後馬上與Lucy趕往雲天城，一個晚上卻只能查出目標人物為翰林院的學生。因為他與翰林院的校長曾經有過節，正當他煩惱如何入手之際，就想起我可代替他混入校園調查，於是就有了這個「逃學威龍」計劃。
「女人? 」呀牛問。
「嗯，佢係我老婆，我搵咗佢好多年，前一排我查到有疑似佢嘅人喺翰林院入面，我想知道究竟係唔係佢。」
我瞄了Lucy一眼，但她對於楊兄說「我老婆」時好像沒有甚麼反應。
「啊，原來楊大哥已經成親了。既然是有關楊大嫂，我一定會查出來的。」呀牛拍心口道。
這個時候小瑩插口﹕「楊大哥，我...我也可以跟哥哥和南大哥一起混進去幫忙...可以嗎? 」
「咁呀......」
小瑩忙道﹕「其...其實我想，楊大嫂是女孩子，若果是哥哥或是南大哥的話可能不會那麽容易接近吧......」
「嗯......咁你又講得啱。」
楊兄一拍手掌﹕「好！就咁決定！咁我都教你一啲防身武功，記住入到去幫我睇實呀南。」
小瑩喜道﹕「謝楊大哥，我會好好照顧南大哥的。」
喂搞錯呀！搞到我好似入去搞事咁，我都係做嘢㗎！