(爸爸no.1)我老豆係口靚妹: 阿政no.17

阿政no.17


「你記住,千祈千祈,絕對絕對唔好去!」
「但係.......佢響全校面前.....」
「佢叫你去死你又唔去?依家係去講數、隻揪呀,你好好打咩,你咁大個仔打過架未呀?去!」

「.........」呆咗
我咁大個仔比人打就試得多,但打架就真係一次都未試過,不過我依家好似隻烏龜
縮響阿嘉後面!





「仲有,全校嘅花生友聽日都會響公園睇戲,如果你哋真係開拖,一定會傳到校長嗰度,到時趕出校都有之,
可能我真係玩大咗,不過夠啦,學業為重,唔好理嗰條撚樣以後返學放學同私一齊,唔好比位佢入,如果佢響
條街打的哋,我一定報警!」

「阿政,聽爸爸話唔好再理嗰個人!」擔心
雖然阿嘉平時蝦蝦霸霸,得罪人多,但佢好識睇人眉頭眼額,我諗阿嘉已經feel到盧碩俊唔好野,所以要我
避一避!

「...................」




「落堂!」
4:30嗱?以前放學一定係整日最開心時刻,依家.........

「喂!」阿澤
「放學囉,去唔去搵嗰條金毛?」
「唔去啦!我約咗阿嘉返屋企!」

「做男人點可以咁架,要勇於接受挑戰,唔洗怕喎,有我哋!」澤
另外嗰三個幾時圍住我架?
「唔好啦!佢叫我一個去隻揪,如果你哋都去.......」





「唔怕喎,我哋淨係襟住佢,你一個揪佢,咁咪隻揪囉!」傑仔
「咁都叫隻揪?」

我知道佢哋為我好,但如果我哋幾個去圍盧碩俊,比學校知道分分鐘我哋比人停學,上唔到大學,到時我就
做咗罪人,而且除咗阿澤,其他都唔係戰鬥型,去到都幫唔到手!

「唔洗啦!我決定唔去!」
「吓!你知唔知全校都睇死你唔夠膽去,依家有96%人買你唔去,嗱!比d吉士唔好比人睇死!」澤

「係呀,學校開咗個陪率,買你去嘅係1陪12.8呀,去啦去啦!」傑仔
「你唔好話比我聽買我會去嗰4%係你哋四個吓!」
「...............」左望右望

之前講嘅嘢收返,仲話乜嘢好朋友好兄弟,最好全部同我趕晒出校!




「阿政去啦,露一露面得架啦,我哋會好似G4咁送你返屋企,我買重你!」傑仔
傑仔你條人渣,仲有唔好次次有求於我都扮到成條女咁,好撚難頂!

「嘩啦.......嘩啦!」吵吵鬧鬧
「喂政仔,你點解仲響度?」噹噹
「噹噹?我......同阿嘉一齊走!」

「...............」兩頭望
「政仔過嚟!」噹噹
「阿嘉走咗去搵個金毛!」細細聲
「吓?佢又話唔好搵佢?」

「可能阿嘉驚你有事,佢自己一個去搵盧碩俊!」
「仲有地點改咗,因為嗰度太多人,佢哋去咗另一個公園!」
「呀唔該,我即刻去!」





嗰個傻佬,乜嘢都自己攬上身,又唔知自己依家只係一個女仔,你唔好有事呀!

「嗄.......嗄......」
「盧碩俊,阿嘉呢?」
「阿嘉冇嚟呀,喂!好似係你叫我嚟依度!」
「吓?我........」

「有個短頭髮嘅女仔同我講,你話嗰個公園多人,叫我嚟依度等你!」
噹噹.......我前世係咪殺咗你全家,你點解咁對我!

「好啦,你都嚟咗,我哋一五一十講清楚佢!」
「我清清楚楚講一次,我盧碩俊係阿嘉嘅男朋友,阿嘉依家失咗憶先唔記得,當
佢記返起佢一定返嚟我身邊,我唔會比人乘虛而入!」





「阿嘉講過佢鍾意關心佢、保護佢、比到佢有安全感嘅人,你認為你得咩?」
「我會盡力.......」
「盡力?我第一次見到你嘅感覺係閃閃縮縮,縮響女人後面,你真係能夠保護到阿嘉?」

「做乜講到阿嘉好似好危險,成日都要人保護咁?」
「你跟本乜都唔知,你知唔知阿嘉有情緒病,佢唔可以受刺激,醫生話阿嘉有自毀傾向,若果再受剌激或傷害,會做出自毀行為,
上次自殺就係一個例子!」

「而且阿嘉已經唔係第一次自殺,你係咪想阿嘉死響你面前你先開心!」