(爸爸no.1)我老豆係口靚妹: 阿政no.18
阿政no.18 我會保護你
「但我睇到嘅係,好似阿嘉照顧你、保護你多過你對佢!」
「若果你真係想做阿嘉男朋友,打贏我,你想點都得!」
「喂!等等.......砰!」
「呀!」
佢.....佢真係認真,同以前比人打唔同,佢真係想攞我命!
「起身!你唔係連還手都唔敢吓,真係女人都有用過你!」
「等等,唔好再打......」
「正垃圾,乜嘢男朋友,你連做男人嘅資格都冇呀!」
「呀........」佢發咗癲,係咁踼我
「停手呀,你踢死佢啦!」
「呀!」阿嘉推開盧碩俊
「阿政你點呀!你咀角流血,d牙有冇事呀?比我睇睇!」
「阿嘉!對唔住呀,我衝動咗小小,不過我只係想証明........」
「你條仆街.........打我個仔!」
「你咁撚好打同我打,我哋隻揪!」
「嘉,我唔係咁嘅意思,我只係想証明佢冇能力保護你,我唔係想打架!」
「係囉!如果你連我都打唔贏,我洗撚你保護呀!」
「陣間邊個頭沾地就輸,我輸-----做你條女,你輸-----同我爛!」嘉
「............好!」盧碩俊
吓!真係打?你依家只係一個女仔,你以為仲係以前咩,唔好打!
「呀!」盧
「喝!」嘉
點解會咁架?仲以為係一面倒嘅戰況,雖然盧碩俊有留力,但阿嘉唔知用咩方法
鎖住盧碩俊(好似柔道),盧碩俊失咗重心,成個頭撞咗落地下,好彩地下係軟墊,
如果唔係.........
「嗚........」
「嗄.....點呀?保護証人組,輸咗喎!」
「你同我聽住,我哋玩完啦,我以後都唔想見到你,仲有!如果你再搞阿政,我
一定唔會放過你,我一定殺死你!」
走咗啦,被自己女朋友咁鬧,任何人都會死心,其實盧碩俊都幾可憐,佢面前嘅
跟本唔係自己嘅女朋友,而係我爸爸,真正嘅蔣泳嘉可能已經死咗!
「你有冇事呀?洗唔洗睇醫生?」溫柔
「冇事........你做乜全身震晒!」我
「吓?冇事呀,打完架有小小緊張之嘛!」
「你跟本就係驚,你宜家已經係一個女仔,唔好乜嘢事都自己攬上身,如果你
有乜嘢事........」
「打你呀!佢打你呀.........嗚!」
喊?自從佢變咗女仔之後佢好易喊又情緒化,到依一刻我先留意到佢已經慢慢
變成咗一個女仔,一個真正嘅女仔!
雖然佢係一個女仔,但有乜嘢事佢都會企出嚟替我出頭,反而我牛高馬大........
「唔好喊啦,我冇嘢啦!」
「哦.......唔!」抹眼淚
「嗄.........你哋冇事吖嘛?」噹噹
「開心啦,阿政比人打呀!」嘉
「吓!其實我唔想政仔做縮頭烏龜先叫佢嚟,我都唔知個金毛咁狼死!」噹噹
「好彩我好打過佢,如果唔係阿政比人打死都得啦!」發火
「好囉喎,洗唔洗咁惡呀,你好好打咩?嗰條友就住你咋,真係打你一早比人打
暈咗,拖埋一邊姦緊啦!」
「原來你想我比人姦!」
「喂!講咗去邊呀?如果你有事,我一定幫拖!」噹噹
「你好好打咩?」嘉
「我唔信我哋兩個打佢唔贏!」
「仲有我哋呢!」澤
佢哋四個都嚟咗!
「吱吱..........喳喳.......」兩個仲響度鬧緊架
我知道佢哋對我好,但我依家就好似一個8歲嘅細路比大哥哥大姐姐保護
一樣,唔係,就算一個細路都唔想比女仔保護,盧碩俊講得啱,我真係一d用都冇!
「喂!政仔........你........喊?」噹噹
「吓!唔係.......冇.........」逃走
「阿政!」幾個人
我當時真係想揾個窿捐埋!
***********************************************************************
「喂!揾到你啦!」嘉
「呀......其他人呢?」
「見到你個樣,邊敢過嚟吖,噹噹仲以為你嬲咗佢添!」
「我冇嬲佢哋,我只係嬲自己點解咁冇用!」
「咩冇用呀!好打就有用啦咩?依個時代有錢就有用,到你有錢有地位嗰時,就算
你成碌鳩咁行出嚟都冇人敢笑你啦!」
「我係一碌鳩...........」情緒低落
「喂.....喂!我唔係咁意思.......」不知所措
「不過點解你咁好打嘅?你依家係女仔都打得贏盧碩俊!」
「自衛術囉!我以前學過,加上成日同你媽媽對打,連泰拳都識小小!」
「可唔可以教我?」
「唔洗啦,你氣管唔好,而且學業要緊!」
「但我真係想學泰拳!」
「唔好好似細路仔咁我要我要,比個理由我,唔好話我知你要去報仇,打個死MK!」
「保護你!」
「吓?」
「我想保護你!」
「喂喂.....講乜嘢呀你?兩條麻甩佬講d咁嘅嘢!」手足無措
「盧碩俊話你有情緒病,唔可以受剌激,我唔想你所有事都攬上身,我唔想你再有事!」
「咁咋!」鬆口氣
「放心喎,有情緒病嘅係蔣泳嘉唔係你老豆,就算有十幾條大漢追斬我九條街
都斬我唔死,放心喎」
「不過有人幫吓手都幾好嘅,就教你自衛術啦!」
「真!」
「係呀!不過同你返屋企整整個樣先,比人打到成個豬頭咁!」笑
「仲有呀,若果真係有嘢做唔嚟,千祈唔好死頂有我呀,唔好話我係女仔就唔好意思,我係你老豆呀,嗯!」擰轉頭望返我
「哦........知喇!」
其實有邊個做父母見到自己個仔比人打會唔出聲吖!就算唔夠打都會企響兒女前面.
雖然牙平時吵吵鬧鬧、兇神惡剎,不過有起事上嚟佢都係第一個企響我前面嘅!
但我都唔可以比佢太免強,雖然靈魂係爸爸,但身體始終係蔣泳嘉,話時話,蔣泳嘉
嘅身體會唔會影響到爸爸嘅情緒?