(爸爸no.1)我老豆係口靚妹: 阿政no.19

阿政no.19            陪伴我到60歲


「哥哥,你又嚟啦!」
「係呀.......咦?你隻腳損咗呀」我
「唔,頭先跌倒!」

「我幫妳沖沖佢啦!」
「嗱!貼塊膠布就冇事架啦!」
「哥哥你好好人呀,如果你日日都嚟就好啦!」





「唔得架,我得8歲要爸爸帶我先嚟到,而且我住葵涌,依度九龍塘好遠.........」
「嗚.......唔得,我要哥哥!」佢攬到我實一實
「好啦好啦!到我10歲我自己識嚟陪你啦!」

「唔!咁你到時日日都要嚟陪我喎!」
「日日,唔洗吓?」
「依間屋雖然好大,但係只係得我一個,都冇人陪我玩,好悶好悶好悶好悶!」發脾氣

「好啦好啦!」




「咁你要一直陪我玩,陪到60歲喎!」
「60歲?」


「嘟嘟!」

5:30am.係呀,由今日開始我要去跑步,曾幾何時我張子政都係一個有自信,可以比
到人有安全感嘅人,但自從上咗中學之後,日日比人蝦,就好似變咗隻烏龜!

唔得,唔可以再係咁,我要變返堅強,我要變以前嘅我,我要...............




「嘶........................」
「嘩!五點十啦!」

「洗面、刷牙、銀包、電話、鎖匙、仲有哮喘噴劑(備用)!」
「出發!」


「呼........呼.........」

原來12月嘅清晨係好涷架,(有d後悔)不過為咗鍛鍊自己,做返一個真男人,我要努力!不過...............

「跑去邊呢?」戇鳩鳩企咗響路口
「張~~~子~~~政~~~」毛骨悚然

係咪我未瞓醒?我好似聽到有人叫我,邊有可能吖,6點鐘邊度會有熟人響條街吖!




邊度有人............

「張~~~子~~~政~~~」毛骨悚然
真.......真係有嘢叫我,我聽阿媽講如果夜媽媽有人叫你,千祈唔好擰轉頭、唔好應........

「張~~~」
「呀!」走
「政仔好囉喎!係咪玩絕交,唔啋人呀!」
「噹噹?」

「咚!」
「哇!」
「竟然當我係鬼,枉我咁溫柔,仲叫你全名!」

「你嗰d唔係叫溫柔,係叫恐怖...........」




「砰!」心口一拳
「咳、咳.........」


*******************************************************************


「不過都好,原來你冇嬲我!」噹噹
「我嬲我自己冇用啫!」
「邊度冇用呀?一聽到阿嘉有事諗都唔諗就去揾條金毛,比着我班d男仔,
冇事就大大聲,有事就一齊閃,我覺得你好好多喎!」

「不過好打返小小就最好啦!」
終於都講事實出嚟啦!





「咁你依家諗住點?」
「乜嘢諗住點?」
「跑步、訓練、報仇?」

「喂喂!我冇諗住報仇乜嘢呀,我只係想練返強小小咋!」
「呵呵.....放心!有我幫你飛虎隊你都考到呀!」
「.........................」不安

「嗯!都係唔洗麻煩你啦,我自己.........」
「咁你諗住跑去邊吖?」
「嗯.........」

「我帶跑啦,喂!跟住我跑啦,快!」
「吓?」
點解會變咗咁嘅,我好似多咗個魔鬼教練!





「嗄.......嗄.......」
「唔係嘛,跑咗10分鐘都冇就咁嘅死樣?」
「大佬,第一日跑咋,唔好咁高要求.......嗄!」

「又係嘅,如果太辛苦,以後聽到跑步都驚仲慘!」
「好啦,我哋行吓跑吓啦!」
「你日日都跑步?」我

「唔!一至五啦,六日瞓晏d,你呢?」
「我決定二四六隔日跑!」
「今日星期五喎!」
「試水溫啫!」

「咁即係聽日先正式啦,好啦!我聽日陪你跑!」
「你又話星期六瞓晏d嘅?」
「我驚你戇鳩鳩,過馬路比車車死呀,有我睇住好d嘅!」
「....................」

「做乜咁望住我,多個人陪唔好咩?」
「好!不過可唔可以唔好當我細路仔咁呀?」
「係係!大哥哥!」

「係喇,你住依頭附近?」
「吓?唔係嘛,識我咁耐都唔知我住九龍城?」
「我哋好似識咗三個禮拜咋喎,你唔係想我第一次唱K就問你攞電話地址吓?」

「如果你要我咪話比你聽囉,跟埋我返屋企都得架!」笑得好甜咁望住我
「吓!我唔係咁嘅意思!」
「哈........怕羞到你個死樣,面都紅晒哈!」

我又比人玩啦!


就係咁,我哋跑吓行吓,講吓笑吓,響依半個鐘,我哋行咗大半個九龍塘、九龍城,
原來除咗跑街,九龍城都有幾個公園,噹噹講聽日會帶我去跑緩跑徑........

平時嘅旺角九龍城,人多車多,但響清晨完來係咁寧靜,依家天空開始魚肚白,
新嘅一天開始啦,我張子政平時冇7、8點都唔會起身,咁多年第一次睇到日
出係同阿嘉踩單車,今次係第二次,身邊一樣有人陪我----------係噹噹!