(爸爸no.1)我老豆係口靚妹: 阿政no.25
阿政no.25 考試前夕
「哈......哈.......就係咁囉,唔唔........我依家同你阿哥一齊,我陣間會過嚟!」茵
「麗麗!約定21號考完試嗰日我哋去唱K,跟住一齊買衫.............」茵
「阿原,麗麗話叫你陪我哋去買衫喎!」
「哦......好呀!」原
同阿茵傾緊電話嗰個叫高天麗,係阿原最細嘅妹妹(小學五年班),本來我都擔心
佢哋夾唔嚟,點知阿茵知道阿原有兩個妹,其中一個仲係小學生,直頭發晒癲,即日就踩上人哋屋企,
兩日之嘛,已經收咗佢哋兩個做契妹!
至於阿原,我宜家先知佢原來係家居博士,(仲勁過曾sir) 阿茵問佢d家頭細務嘢
佢全部識答,亦係咁阿原嘅口才都好咗,見佢哋兩個有講有笑,依d真係緣份嚟!
唔好誤會,阿茵嘅目標一直都係佢兩個妹,佢哋冇嘢!
「阿原,你識唔識織冷衫?」茵
「識!」原
「嘩!我都話佢冇嘢係唔識啦,你睇你哋,仲話女仔喎,冷衫都唔識織,遲d我學識咗我就係4A唯一
一個織冷衫少女!」(4A冇人識織冷衫)
「白痴!」噹噹、詩、嘉
「其實我都唔識架,不過上年阿美話織條頸巾送比男同學,我先學咋!」原
「吓!美美今年先F.2,F.1已經拍拖啦?我哋四個竟然輸咗比個小妹妹!」
「單戀咋,佢最後都冇送到!」原
「呼~~~好彩!美美仲係我嘅!」茵
「蘿莉控!」噹噹
「幼齒狂!」詩
「戀童魔!」嘉
「咁陣間我上你屋企,你教我吖!」完全無視
「好呀!我煮咗鍵羊腩煲,食埋先走吖!」原
「羊腩煲?」茵
「你呀!阿美話天氣凍想食羊腩煲,我煮咗好多呀!」原
「好呀!我買氣水,走囉!」茵
「砰!啪啪啪...........」走咗
「羊腩煲..............」噹噹
「我好肚餓..........」詩
「...........................」嘉
「打邊爐---------反擊!」嘉
「起壇!」噹噹
「落街買嘢!」詩
「喂!後日你哋考試啦,仲搞咁多嘢,溫書.........」我
「砰!啪啪啪.............」走晒
究竟佢哋上嚟係溫書定打邊爐?
打還打吖,響我屋企打,陣間洗碗洗死我!
*************************************************************************
3小時後
「呀!好飽呀,依家真係食乜都冇味!」噹噹
「乜嘢羊腩煲,依家有隻和牛響我面前我都放佢走呀!」嘉
「我飽到想嘔!」詩
「睇唔出阿詩咁大食吓!」嘉
「乜呀!你哋係咁塞d丸呀、牛呀落我個碗度!」詩
「塞比你就要食嘅咩?」噹噹
「第時有人塞d嘢入你嗰度你要識得嗌唔好呀!」嘉
「哈哈............」兩隻嘢
「喂!講嘢似返個女仔啦唔該!」我
「係囉!」詩
「仲有呀,打還打做乜買埋啤酒上嚟?你哋兩個飲到紅卜卜,聽日返學比miss 見到
你哋就知死!」我
「你都話聽日啦!」噹噹
「依家9點幾啦!得嗰10個鐘d酒氣都唔知........」
「9點幾?」噹噹大叫
「成三粒鐘我淨係望住粒魚蛋,一條數都未望過呀!」依家先識驚
「我冇所謂呀!我攞硬第一嘅,我過大海玩兩晚通埋頂返嚟考試都仲得!」嘉
「死八婆!打乜嘢邊爐呀!」發爛渣
「頭先邊個大大聲叫起壇架,數我?」嘉
「吱吱..........喳喳..........BB..............巴巴............」
又嚟啦!三日唔埋兩日就嗌交,不過依d係佢哋獨特嘅溝通方式,慣架啦!
「聽日我早d同你溫習啦!」我
「阿政!你都要考,mock唔好太顧住噹噹!」嘉
「你......你真係想趕絕我?」眼泛淚光
「我親自出馬呀!阿政都係我教嘅,我聽朝比份精讀你,你跟住溫就會合到格架啦!」嘉
「真?」噹噹
「嗯!」嘉
「嘩!太好啦,原來你仲有良知架,你唔洗驚收尾嗰兩年啦!」攬住阿嘉
「信唔信我整d毒貼比你...........」
呼...........走晒啦!送完阿嘉返屋企,餵埋貓再洗碗都成11點,同噹噹一樣今日我
都冇乜溫到書!
不過我平時有溫習,基本上已經溫得七七八八,而且一月頭先考,但係噹噹......
嗶.....
阿貓?
牛奶: 喂!你唔係聽日考試咩?仲上嚟?
夜貓: 死啦,今日顧住打機唔記得溫書呀,點呀點呀要出貓啦,貓紙收響邊呀?
夜貓: 手袖?肚腩?塞入口?高科技得唔得?救救救命呀!
牛奶: 你宜家第一件事係要熄咗部電腦溫書,溫得幾多得幾多!
夜貓: 唔得呀,我好亂呀,出貓出貓出貓........呀!老豆你響後面........嗶!
點解佢老豆響後面佢都有心情打埋隻字出嚟?
係呀!佢哋全部都響依一兩日開始考試,真係連我都緊張埋,其實響依幾年F.1-F.5
我哋學校都係響聖誕前考試!
但今年F.6考mock係一月,好似同佢哋有d代溝咁,到我考mock嗰時佢哋都考完
晒,好似有d孤軍作戰,不過嚟緊嘅考試係最重要嘅一場考試,亦係最後一次,考完
DSE,無論上唔上到大學,我都要離開學校,好似今日咁樣一齊溫習打邊爐,吵吵
鬧鬧嘅日子可能唔會再有,我又可能要變返一個人!