(爸爸no.1)我老豆係口靚妹: 阿政no.29
阿政no.29 我與少女們的四日三夜
「陽光!」嘉
「大海!」噹噹
「沙灘!」茵
「海風!」我
「貓貓!」詩
「....................」
「做乜喎?乜都比你哋講晒,真係諗唔到吖嘛!」詩
「花草樹木、藍天白雲都得嘅啫,乜都係貓,破壞晒我哋d氣勢!」嘉
「再嚟一次!」嘉
「今次我先,陽光!」詩
「學我?」嘉
1:00pm
到咗塘福啦,不過時間尚早,阿嘉話過多兩個字先去攞房,所以我哋五個響度欣賞
吓四周嘅風景!
我哋身處嘅海灘小屋,將會係我哋依三日嘅家,真係好舒服呀!
「..............」大字型深呼吸
「有人吸收緊天地靈氣喎!」嘉
「道長!」茵
「喂喂,放鬆小小都要笑人!」我
「放鬆d吓?咁我哋大嗌一聲!」噹噹
「嘩.......聖誕快樂!」大嗌
「嗱!依度就係我哋嘅基地啦,掂唔掂呀?」嘉
「好就幾好,不過真係冇乜嘢玩喎!」噹噹
「乜嘢呀?之前講嗰d陽光海灘,真係地水火風空乜都有齊,淨係個沙灘、水上活動
都玩死你哋啦!」嘉
「寒冷天氣警告生效,日間氣溫15度,晚上市區得10度,新界地區再低兩三度.......
」天氣小姐阿茵
「即係連最後一個功能都冇埋!」詩
「喂!仲有火呢,聽日我哋燒嘢食,fire camp wow!」嘉
「你都話聽晚啦,今晚呢?唔通燒足三日三夜咩?」反應冷淡
「喂!去camp就係咁架啦,我哋有齊地水火風空,係所有去camp嘅人理想生活!」嘉
「原始生活!」三個
「咁唔鍾意咪走囉,又冇人叫你哋嚟!」發老脾
「過到嚟先講依d說話!」茵
「黑心旅遊!」詩
「喂喂喂,洗唔洗咁呀?」嘉
「哈~~~玩你咋!」三個
「不過今晚我哋響渡假屋有乜嘢玩呀?」噹噹
「一切包響我身上,我會plan好!」嘉
「好啦,夠鐘攞房啦!」嘉
「我想響度睇多陣海!」噹噹
「好!咁我哋去攞房!」嘉
「阿政睇住噹噹唔好比佢亂走!」嘉
「各位團友跟我過嚟!」嘉
「啊!好舒服,真係一望無際,所有唔開心嘅嘢都唔記得晒!」噹噹
「你爸爸媽媽依家點呀?」
「下個月分居期滿,正式簽紙離婚!」噹噹
「........................」
噹噹父母響三年前感情出現問題,應該話噹噹爸爸出面有個女人,雖然依家已經
分手,但夫妻關係已經完全決裂,所以佢哋兩年前已經分居,加上噹噹爸爸長註
大陸工作,所以佢依一年已經好小見到爸爸!而依一個秘密只係得我一個人知!
「咁你會跟邊一個生活!」我
「媽媽囉!」噹噹
「爸爸響大陸做嘢,而且全部親戚都當咗佢係衰人,佢唔會爭乜嘢撫養權架啦!」噹噹
「仲掛住爸爸?」我
「...................」
「可唔可以唔好講依d嘢呀?去camp講d開心嘢啦!」
「好吖!到你想講嗰陣隨時揾我,24小時stand by!」
「今晚3點響度吹水!」噹噹
「3點依度?6度都唔知有冇?」
「得把聲!驚呀?」噹噹
「4點!大你!」我
「5點!再大你!」噹噹
「6點!大大你!」我
「天光啦仲大!睇唔出你咁蠱惑吓,大到11點好唔好?」噹噹
「你又知我瞓到11點先起身?」我
「砰!死仔!」
「點半啦,走啦!」噹噹
「佢哋全部行李都冇攞!」我
「班八婆當咗我哋係水魚!」噹噹
「算啦,幫佢哋拎啦!」
「喂!一個人攞咁多扭親你呀,一人一半啦!」噹噹
「你係女仔............」我
「我分分鐘大力過你呀男仔,一人一半!」噹噹
「嘩!好靚呀!」我哋兩個
「做乜嘢今日d人講嚟講去都係依幾句?」嘉
「不過真係好靚,好似酒店咁,原全唔似渡假屋!」噹噹
「幾耐未嚟過camp呀?依家d渡假屋比得起錢分分鐘豪過酒店,依度只係大廳,
上面先係睡房!」嘉
「上面?你租咗幾大呀?」噹噹
「十幾人嘅大型渡假屋!」嘉
「我哋每人夾咗二百蚊夠唔夠呀?」
「小妹妹一晚都唔夠呀!不過唔洗驚,我包底玩得開心d!」嘉
「又係你?搞到我哋好似黐飲黐食咁!」噹噹
「係friend 就唔好講埋依d說話,咁啦陣間嗰餐你嘅!」嘉
「好!咁你哋想食乜?」噹噹
「放題!」茵
「聖誕大餐!」詩
「意大利嘢!」嘉
「嘩!我邊有咁多錢呀?你哋不如食咗我啦!」噹噹伸咗隻手出嚟
「嘩死婆真係咬落嚟..............」
到最後我哋只係響對面餐廳食咗個公仔麵,不過一大班人有講有笑,我覺得比
一個人食聖誕大餐仲好味好多!
「好啦各位!休息一陣我哋就出發去梅窩!」嘉
「梅窩有d乜嘢玩呀?」噹噹
「咪又係嗰d!」嘉
「又係邊d呀?」噹噹
「地水火風.............」
「啪!」
「哇..................」
「嘩!原來二樓可以望到海架!」詩
「夜晚響度望住個海隊酒吹水真係一流!」噹噹
「今晚有大把節目啦,你哋高興我陪你哋玩到天光又點話!」嘉
「最唔捱得眼瞓嗰個話玩到天光喎!」茵
「睇吓點!」嘉
「襯住依家仲有時間,我哋玩鋪牌先去梅窩囉!」嘉
阿嘉右手攞住副牌,左手揸住一疊卡,從佢嘅眼神我可以估到佢又唔知有乜嘢
陰謀啦!
響依三日兩夜我將要同四個性格各異,應該話係古古怪怪嘅女仔(阿詩都係貓怪)
一同生活!
依三日一定唔會平安咁度過架啦!只係希望唔好發生恐怖事件...............求求你哋!