(爸爸no.1)我老豆係口靚妹: 阿政no.33
阿政no.33 我會一直在你身邊
9:30Pm
「嘩!終於返到嚟啦,好!特備節目開始!」嘉
「操啤!」
「又係啤牌?到底你攞咗幾多副過嚟?」噹噹
「又係嗰d野球乜乜我唔玩啦!」詩
「我都唔想玩天光!」茵
「唔係野球dee,純粹操啤,21點!1毫子一隻都殺,玩啦玩啦!」賭引發作
「我唔同你癲,我出去行吓!」噹噹
「砰!」出咗去
「噹噹!我出去睇睇佢!」我
「都好嘅,始終一個女仔有D危險,阿政你同我睇實佢唔好比佢四圍走!」嘉
「我哋繼續!」
「噹噹!」
「你都出咗嚟?未夠3點喎!」噹噹
「幾多點都可以吹水啫!」
「好舒服!坐響沙灘吹吓風睇吓星完全忘記晒屋企D嘢!」
「唔鍾意就唔好諗啦!」我
「政仔!如果你唔開心你會做D咩嘢架?」
「響屋企大被兜過頭瞓覺!」
「真係好健康好文靜吓!」
「我啱啱相反,我會有咁遠走咁遠,最好唔洗返屋企,就好似依家咁唔洗煩!」噹噹
「但嗰個始終係你屋企!」
「發吓牢騷啫,唔返屋企去得邊吖,唔通有人會收留我咩?」
「我................」口快快
「係喎!你好似一個人住可?如果有一日我離家出走可唔可以江湖救急?」
「離家出走唔好亂講,你爸爸媽媽會...........」
「冇義氣!我話如果啫咁快封咗後路!」噹噹
「擔心你咋!如果真係有需要隨時上嚟,包埋三餐!」我
「我冇錢交租嗰喎!」
「煮飯洗衫執屋買餸..............」
「你都用得我幾盡吓!不過你肯你個阿嘉都唔肯啦,講笑咋!」噹噹
「政仔,你係咪凍呀?縮埋一舊嘅?」
「寒冷天氣警告呀,不過冇所謂,話咗陪你坐天光都ok!」我
「得把聲,比條頸巾你啦暖好多架!」噹噹
「咁咪又到你凍!」
「咁........一人一半!」
就係咁,我哋一條頸巾兩份用,好彩佢條頸巾幾長吓,不過我哋兩個頭貼住咁坐囉!
兩個人一粒聲都冇出響度望海睇星,如果比着第二個女仔,氣氛一定好尷尬,不過依
一刻我只有寧靜同放鬆!
除咗阿嘉(佢係我老豆唔計),噹噹係我第一個可以好自在、好放鬆去面對嘅女仔,
其他女仔可能要揾話題,驚講錯嘢比人笑,總之一個字講晒--------拘謹!
但噹噹唔同,雖然初初覺得佢好惡,動不動就打人,但打完鬧完又冇事,即使講錯說話都唔會放響個心度!
所以我都好自然咁將自己嘅事,開心唔開心都同佢分享,當然佢亦會講好多佢嘅事
比我聽啦!
兩個人經常互發牢騷、有講有笑,其實依d算唔算係知己呢?
佢依家靜靜地望住個海,其實佢唔惡個look真係好cute好可愛,再加上佢細細粒嬌滴滴,就咁睇真係
一個要人保護嘅小妹妹,唔知溫柔嘅噹噹係點嘅呢?
「做乜望住我?」噹噹
「吓........冇.........」
「等等!你隻手好凍呀!」噹噹捉實我隻手
「你塊面都凍冰冰架!」佢雙手摸我塊面
「傻仔!你凍要出聲吖嘛,凍死你啦!」
「我手凍唔代表我全身凍架,唔好當我細路仔得唔得?」我
「係啦大哥哥!我知你關心我啦,你氣管唔好,凍親就手尾長啦,學人死頂走啦!」
又拖住我隻手,始終都係女仔,太親密嘅接觸搞到我個心都有D奇怪感覺!
其實係佢冇當我係男仔定冇當自己係女仔呢?不過佢性格不嬲都係不拘小節,亦
係依種性格我哋先會咁投契,但響佢心目中我係咪成個細路咁呢?
我真係要成熟小小!
「阿詩又輸,飲!」嘉
「我唔飲啦,真係會死架!」
「飲、飲、飲!」茵、嘉
「癲夠未呀,你哋想隊死阿詩呀?」噹噹
「咩呀?我哋輸咗就飲酒,阿詩輸咗飲汽水之嘛!」兩個
「嗰支2公升汽水好似清晒!」噹噹
「.......................」你眼望我眼
「我出咗去半粒鐘你哋灌阿詩飲2公升汽水?」發火
「願賭服輸嘛!」2個
「仲講!啪!」
「哇!」2個
「你又係嘅,就算輸咗飲唔到就唔好飲嘛!」噹噹
「你哋唔響度佢哋就蝦我,佢哋仲聯手整死我!」詩
「哈、噗!」兩個仲笑
「啪!」
「哇!」
「玩還玩都要有分寸先得架,你哋自己都飲到成隻貓咁!」我
「如果比文頒知道佢鬧死我都似!」噹噹
「文頒?」
「阿詩嘅哥哥,我話咗睇住阿詩佢先比我帶佢嚟咋!」噹噹
「原來你識阿詩哥哥!」我
「我都識!」茵
「反而我未見過喎!」嘉
「你F.3先轉入嚟梗係未見過啦,阿詩哥哥上年上咗大學已經唔響屋企
住啦!」噹噹
「咁你哋幾時識佢架?」嘉
「F.1!嗰時開學冇幾耐阿詩得罪咗澄澄,比佢打到手都瘀埋!」噹噹
「結果阿詩哥哥知道咗,直頭踩上嚟學校揾澄澄,連校長都驚動埋,嗰次真係搞到好大件事!」茵
「揾還揾吖,條傻佬竟然當咗我係澄澄,仲鬧到我狗血淋頭!」噹噹
「我話係全班最惡嗰個蝦我吖嘛,嗰時你哋兩個都係短頭髮!」詩
「乜澄澄F.1嗰時係短頭髮嘅咩?」嘉
「兩個F.1時都係一樣樣,男人婆!」茵
「砰!」
「哇!」茵
「乜嗰個澄澄好惡嘅咩?」我
「啱啱相反,外表好斯文,長黑直、樣貌甜美、身材高挑、舉止優雅、連把聲都甜到漏!」嘉
「而且成績好好,每年例牌全班三甲!」茵
「之不過佢係.............」詩
「心理變態!」四個
「心腸惡毒、記仇、小心眼、毒舌、 手段兇殘!」嘉
「邊個得罪佢一定冇好下場,不過佢又唔會即刻報仇,佢會慢慢等機會,等到你冇
防備嗰時先出手,都係嗰句,唔好得罪依個人!」茵
「佢以前真係好惡架,不過依家溫柔咗好多,朋友都多返!」詩
「傻妹!佢扮嘢架咋,佢始終係女仔,都會顧吓儀態都想有人讚,都想比人叫索女,
你估好似嗰個咩,爛身爛世!」嘉
「邊個爛身爛世話?」噹噹
「又真係女大十八變,F.1嗰時真係成個男人咁,依家真係唔同晒,但另外嗰個仍然係一個男人!」茵
「澄澄宜家171cm,但嗰個仍然維持F.1 158cm嘅高度!」嘉
「佢報大數架咋,佢得156cm!」茵
「一個年年頭三名,另一個年年第尾!」詩
「你哋覺唔覺得佢無論身高、外貌、行為、智商都仍然響F.2,完全冇長大過!」嘉
「哈哈~~~哈~~~」
「好囉喎!做乜今日吓吓啄住我?仲要次次都響政仔面前數我?」噹噹
「依d唔係數,係講事實啫,人係分好多個等級,只不過你係屬於最低級嗰隻啫,唔好太在意!」嘉
「點解你今日講嘢咁直接嘅啫?」茵
「喂!你哋唔好再講...........」詩
「衰人!全部都係衰人!」噹噹走咗去
「噹噹好似喊呀!」詩
「佢都會喊?我哋係咪玩大咗?」嘉
「係飲大咗!」茵
「你哋講嘢可唔可以理吓人哋感受架?我去睇吓噹噹!」我
「嗄.........嗄......」
「噹噹......你冇事吖嘛?」
「冇事呀!不過政仔依度係厠所,下次入嚟記得敲門!」
「吓......對唔住呀,我冇留意我淨係擔心你冇留意到.........」我
「收到啦!我知你關心我,我嗰班雖然有好多朋友,但我知佢哋個個都睇少我,
當我傻瓜!」噹噹
「你唔好咁諗啦,其實佢哋飲大咗先亂講嘢,佢哋冇心架!」
「佢哋講事實啫,自己知自己事,其實我同佢哋唔同,佢哋兩個都係乜乜女神,
我就成個男人婆、矮冬瓜!」噹噹
「佢哋個個屋企有錢,又有兄弟姊妹,我就得自己一個,遲d爸爸媽媽離婚,我只可以靠自己,
但我真係跟唔上,我跟本唔係讀書嘅材料...........」
「唔好話大學,就算兩年後DSE我都會科科紅,如無意外兩年後我就要出嚟做嘢,但我d成績
只可以做sale妹,唔係.......我d性格連sale妹都做唔掂,其實我同政你一樣都唔應該入嚟林重恩!」
原來噹噹一直都對將來感到徬徨!
其實我哋兩個都好相似,一樣都係比其他人睇低,一樣都係獨生子女,一樣父母離異,一樣感到孤獨無助!
「邊個話你讀唔到大學架?邊個話一定要做sale妹架?邊個話你冇人冇人冇物架?
我講過我會陪你一齊溫書,你有乜嘢事我一定幫手!」
「但你考完mock你都唔會返學校啦!」噹噹
「唔返學校啫,但我仍然住響旺角架嘛,無論我上唔上到大學或者讀邊一間大學我都會住返響屋企!」我
「唔洗擔心,我會一直留響你身邊!」