(爸爸no.1)我老豆係口靚妹: 阿政no.34
阿政no.34 卒業旅行
響我童年生活曾經有幾個要好嘅朋友,但響一次交通意外,除咗嫲嫲離開咗我哋,
我亦失去咗部份記憶,童年生活有一部份成為空白,我記得曾經答應過某人嘅事、
朋友間嘅承諾,都隨住我嗰一次受傷而成為歷史!
中學嘅我好似未曾遇到一個可以互吐心事嘅朋友,無論開心定失落都只得我一個,
除咗嗰隻夜貓!
但依兩個月,我遇到一個女仔,可以隨心所欲將自己嘅心事,開心唔開心,好重要或好無聊都一一同佢講!
而佢亦會將佢心底話同我講,當然我哋唔將大家嘅私事話比其他人聽,所以我哋互相建立咗信任!
而我亦對佢作出承諾,今次一定唔會忘記,我一定會響佢身邊直到60歲!
題外話,響佢身上我彷彿見返童年嘅一個朋友,應該係一個女仔,好相似!
一樣咁關心我、一樣會細心聆聽我每一句說話!
幾特別嘅女仔、一個細心聆聽我說話嘅少女----------趙語聆!
********************************************************************
「唔洗驚!你依家先F.4,仲有兩年時間,我會同你打返好個底!」
「但係.......我好蠢,可能要用你好多時間,而且可能教到你發火!」噹噹
「比d信心自己啦,我依d葵涌仔都可以入到林重恩,仲要去考科大,你唔會唔得嘅!」
「今年我會考入科大比你睇,兩年後我哋會響大學重逢!唔係,兩年後我會同你一齊殺上大學!」我
「嘩!好感動呀,好有大哥哥feel呀!」茵
「你知唔知嗰句殺上大學係我同佢講架?抄我?」嘉
兩個搞事嘅人又嚟啦!
「噹噹對唔住!之前我哋飲大咗講錯嘢,對唔住呀!」兩個
「原來你驚追唔上,唔洗怕啦有政政響度!」茵
「仲有我呢?有我依個天才響度我會帶晒你哋入大學!」嘉
「其實噹噹你一早跪響度求我就唔洗驚啦,我會睇住你嘅!」嘉
「就你你依句說話我到死嗰日都唔會求你!」怒氣
「喂喂喂講笑咋,我把口一嬲都係咁啦,我點會睇住你死喎,嗱嗱嗱我同大家宣佈,
我哋4個人一條心兩年後一齊殺上大學!」
睇見噹噹笑返個人都放心d,如果自己單打獨鬥真係會好孤單,大大班人一齊
努力考試............
係喎!佢哋唔知點呢?
Whatsapp群組:
政: 瞓咗未呀你哋?
傑: 10點幾瞓?雖然係孤獨聖誕都唔洗咁早吓?
汁: 我整緊個場景!
原: 我同緊兩個妹打機呀!
政: 好忙碌吓,又話考mock唔嚟得camp,依家個個都冇望過本書啦?
澤: 走咗去camp嗰個竟然話我哋冇溫書喎!
汁: 佢自己又係!
原: 其實你哋有冇d罪疚感?
4人: 冇!
政: 我都覺得依d節日好多人都會放低本書一、兩日嘅,我哋聽日一齊溫書!
4個: 聽日?我哋好似要嚟大嶼山玩足全日喎!
政: 又大嶼山?玩乜嘢呀你哋?
澤: 你唔係唔知吓?你條女約咗我哋4個,叫我哋聽日嚟大嶼山join你哋吖嘛!
政: 你哋嚟到咩?
汁: 毒撚冇朋友啫,時間大把!
傑: 即日來回OK!
政: 阿澤你唔洗開工咩?
澤: 東主有錢,休息一天!
政: 阿原你唔洗睇住兩個妹咩?
原: 阿媽放假,而且阿美約咗人會玩成日,阿麗我會帶埋佢嚟,佢話好想見到阿茵喎!
汁: 咁聽日11:am響纜車站等啦!
政: 纜車站?
澤: 其實你知唔知自己玩緊乜架?你連聽日去邊都唔知?
政: 乜嘢都係阿嘉搞嘅!
傑: 成頭家都已經交咗比佢打理嗱?
政: 唔好亂講,佢只係今次嘅領隊!
澤: 你位領隊小姐好似仲幫你帶埋書,同你一齊溫習添喎!
傑: 美女培訓?我哋就得一條冷溫書!
政: 其實我都鍾意一個人靜靜哋溫書!
4個: 溫書啦仆街!
汁: 我依家宣佈,全體人員響半小時後溫書,半個鐘後都未攞起本書嘅,今晚比鬼「責」!
政: 喂!我今晚響渡假屋瞓架,講d咁嘢!
4個: 瞓啦柒頭!
雖然我哋五個身處唔同嘅地方,但係我哋都會做同一件事----------溫書!
其實算唔算廢話?全香港考生應該都會做緊依樣嘢,如果連書都唔溫就真係死得!
不過知道佢哋都拎起本書,唔知點解突然間好有動力想溫書,好---------努力!
「喂!政政過嚟啦!」茵
睇住佢哋幾個有講有笑應該冇事啦!
「係啦!原來你一早已經約好晒阿澤佢哋聽日過嚟!」
「哦!知道咗嗱?仲諗住聽朝比個驚喜你添!」嘉
「你應該同佢哋4個講要保守秘密嘛!」噹噹
原來佢哋幾個都知!
「吓!阿原聽日都會嚟?點解我唔知架?」茵
「唔止阿原,你個麗麗都會嚟添,不過你口疏我哋唔話你知之嘛!」噹噹
「你哋咁對我?」眼淚
「點解要咁神秘呀?」我
「因為依個係你嘅卒業旅行,我哋想比d驚喜你囉!」阿嘉叉起兩隻手指
卒業旅行?又係阿澤教佢架啦!
「係呀!因為依次係你中學最後一次旅行,我哋都想比你一個美好嘅回憶,所以
你嗰幾個朋友我哋都叫埋嚟呀!」詩
「我仲以為依次camp係陪你哋..........」
「邊個陪邊個冇所謂啦,最緊要開心嘛!」噹噹
「卒業、卒業!」
以前聽到卒業,只會諗到H-game動漫,但今次卒業旅行嘅主角竟然係我!
以為依次camp係陪佢哋幾個女仔,阿嘉仲死都要扯我嚟,原來一切都係為咗我!
以前嘅學校旅行,話就話幾百人,但講到尾咪又係我哋三幾個人戇居居企響度,
漫無目的等放學等解散,學校旅行對我真係冇乜回憶!
但響中學生涯最後一年,我終於遇到一班真正嘅朋友,聽日連佢哋幾個都會嚟,
冇錯,依個係屬於我嘅旅行!