(爸爸no.1)我老豆係口靚妹: 爸爸no.43
爸爸no.43
「咁即係話你14歲之前一直都響英國生活?」政
「唔係我係蔣泳嘉!不過亦解釋得到點解所有人對佢嘅過去都一無所知!」我
「原來條靚妹13歲就響英國名牌大學完成數學系學士課程!」我
「蔣uncle冇同你講過你留學嘅事咩?」政
「冇-----完全冇!佢甚至迴避我過去嘅所有事!」我
「咁奇怪?」
「嗯!唔單止我,連公司上上下下嘅人都唔知蔣泳嘉嘅過去,當然連佢讀大學都唔知啦
,一般嚟講如果自己個女13歲就大學畢業,仲要係英國名牌大學一定打鑼打鼓連掃地
阿嬸都講埋,但佢一句都冇同我哋講!」我
「點解會咁嘅?」政
「應該係蔣泳嘉響英國出咗事,所以蔣震滔先送佢返嚟香港,自始以後佢都冇對任何
人-------包括我講返英國嘅事!」我
「..................」政
「而且蔣泳嘉經常自殺同見到鬼可能都同依件事有關!」我
「佢唔會響英國殺咗人吓?」政
「殺咗人我仲返到嚟?」
「唔係比人殺咗吓?」政
「我仲生勾勾企響度呀!」
「唔係比人咩嘢咗吓?」政
「我仲係處嚟架!」
「唔會係響英國遇到嗰味嘢吓?」政
「..................」我哋兩個
「衰仔!明知我最驚嗰d嘢你仲講,今晚我一個人點瞓呀!」發狂
「等等我講吓笑咋,不如問吓蔣uncle仲好啦!」政
「要講佢一早講咗啦,依家唔好打草驚蛇,知道佢響英國讀邊間大學,搵人查吓收吓料先!」我
「不過話時話,你細細個同蔣泳嘉應該幾熟架,點解你好似乜都唔知咁?」
「我12歲之前嘅事好多都唔記得!」政
「大佬!你話3、4歲d嘢唔記得就話啫,你同我講12歲?」我
「因為12歲嗰年嘅車禍!」政
「車禍?」
「你唔係唔記得吓?嗰年我同嫲嫲搭小巴撞車,嫲嫲死咗我就腦出血,仲昏迷咗四日,嗰陣媽媽
嚇到六神無主,好彩你即刻由廣州返嚟咋,嗱!依度仲開咗個窿減壓添!」阿政指住自己個頭
「真係有個疤..........」我
「唔怪得你柒咗咁多啦原來撞親個頭!」
「咩呀?醫生話只係冇咗小小記憶,唔關智商事架!」好激動
「得得得!聰明仔唔好嬲!」
「但你真係完全唔記得?」政
「完全冇印象,就好似聽緊別人的故事一樣,完全同自己無關!」我
「等等!點解會咁架?你都話我響你身邊但點解我一d印象都冇架?」我
「可以咁解釋,你嘅靈魂就好似OS咁由一隻手指hack 入蔣泳嘉身體(電腦),而且完全控制咗蔣泳嘉
身體,但你依隻手指(靈魂)所擁有記憶好有限,你所有嘅記憶主要響張俊雄個腦度,但張俊雄肉身已經
死咗,所以你好多記憶會成為空白!」政
「相反依個腦係蔣泳嘉嘅,所以我周不時都會閃到蔣泳嘉嘅記憶出嚟,咁我依家到底係蔣泳嘉定張俊雄?」我
「簡單d講,你係混合咗張俊雄同蔣泳嘉嘅新品種!」政
「新品種...................」
「冇錯!就好似變形人魔入面嘅主角,比你依隻小小嘅烏蠅(我係烏蠅?)入侵咗身體後,變成隻半人
半蠅嘅怪物..............」
「啪!你d比喻可唔可以唔好咁核突呀?」
「總之你明就得啦!」政
「不過話時話我真係同蔣泳嘉溶合咗咁,我d maths比以前勁咗好多,而且我連法文都識!」我
「咁勁?」政
「呵呵~~~我越嚟越鍾意依個身體啦,好似仲勁過以前嘅我,遲d揾返張沙紙出嚟我連書都唔洗讀就
直入百滔,我係超越張俊雄同蔣泳嘉嘅新品種............人中之龍!」我
「搶咗人哋個身體仲咁開心,冷血!」政
「乜嘢血都好啦,總之我哋兩個都失咗憶,只有慢慢去查,記住唔好講比其他人知我響英國讀大學
嘅事.............係喎人呢?嗰幾隻嘢又話上嚟溫書嘅?」我
「你依家先發現?佢哋全部話有事唔上嚟啦!」政
「當我講嘅嘢死架?噹噹同阿詩呢佢哋話上嚟睇吓你哋架啵?」阿茵依個禮拜要接佢細佬放學唔
得閒(驚得佢個死樣吖)
「乜嘢人都冇上過嚟呀!」政
「我見完校長都上咗嚟啦,佢哋仲遲過我?係呀噹噹同澄澄..........」
「叮噹!」佢哋嚟啦
「你哋好!」政
「我同你拎書包啦,你隻手...........」詩
「都話唔洗囉!」噹噹
「你隻手點呀?」政
「你真係走咗去同澄澄隻揪呀?」我
「佢隻手比澄澄扭得好犀利!」詩
「摺起衫袖比我睇睇!」政
「痛!好痛呀細力d啦!」噹噹
「你成條根扯傷咗呀!」阿政細細個好活潑成日整到,所以佢對跌打外傷處理都有d認識
「我同你捽d跌打酒,痛就出聲啦!」政
「阿政你真係得嘅,問都唔問就捉住女仔隻手係咁捽!」我
「喂!我完全冇嗰d意思.............」政
「唔洗理佢!又唔係古代捽吓隻手有乜問題?」噹噹
「現代人!下次整親個心口都叫阿政幫你捽啦!」
「喂喂!做乜講講吓講到心口呀?」噹噹
講一句就咁大反應仲面都紅晒,得閒玩多d佢哋先
「你就係放咗學同澄澄打架?阿詩你跟埋去連你都打埋呀!」我
「DaDa 都響度應該冇事嘅!」詩
「嗰個澄澄原來真係咁惡架?再大力d你手都比佢扭斷呀!」政
「係囉!你估仲係F.2嗰陣咩?佢宜家高你成個頭呀,打死你都得呀!」我
「係呀,你唔好再同佢打啦,你細細粒真係好蝕底架!」政
「係咩?聽日返學你哋睇吓邊個傷d?」噹噹
「...................」我同阿政
望住阿詩依個目擊者,從佢面上嘅表情我可以估到當時嘅戰況你幾咁激烈,究竟真正
嘅勝利者係邊個?
不過依個答案要遲兩日至知,因為澄澄請咗兩日病假,真係咁傷?
三日後澄澄返學我終於知道乜事,原來當日噹噹兜嘢打落澄澄隻眼度,變成熊貓嘅佢
梗係死都唔返學啦,就算依家佢都係帶住副超上堂!
我心諗如果噹噹狼死d用鳳眼拳,澄澄已經轉咗去盲人學校就讀,咁就一天都光晒,
不過宜家都好嘅,起碼依十幾日佢由熊貓變返做人之前我哋都有啖安樂茶飯食吓!
*************************************************************************
夜貓: 今日考成點呀?
牛奶: OK啦!
夜貓: 咁即係好唔好呀?
牛奶: 梗係好啦,sure win!
夜貓: 咁有信心?唔似你啵!
牛奶: 因為我有個軍師響身邊,所以我有信心全部科目都會考得好好!
夜貓: 邊個嚟架咁犀利?唔會係女仔吓?
牛奶: 可以係男可以係女!
夜貓: 講乜叉呀?不過你就好啦有高人相助,我就一條冷!
牛奶: 你考成點呀?唔係又第尾吓?
夜貓: 你就第尾!我從來都冇攞過第尾最差都係尾二!
牛奶: 努力d呀讀多年你實比你老豆打到你上天花板!
夜貓: 放心啦!我依度第尾嗰個都可以升班,反而你要小心d呀,唔好又擺烏龍要睇
清楚題目先好答呀,我唔響你身邊要小心d呀!
牛奶: 做乜突然成個師奶咁長氣!
夜貓: 師乜嘢奶呀?考好d呀,你成工入到大學今個暑假我哋去台灣睇星!
牛奶: 台灣?
夜貓: 台灣十五天環島單車遊,踩車、住民宿夜晚睇星yeah!
牛奶: 話個秘密比你知,我個幾月前先學識踩單車,仲要係每一公里炒一次車嗰隻,
你依個壯舉我幫唔到你啦!
夜貓: 用輔助轆咪得囉!
牛奶: 輔助轆台灣環島遊?
夜貓: 得啦!踩單車唔係主菜,最重要係欣賞夜晚嘅星空,勁浪漫!
牛奶: 成條女咁!
夜貓: 咩呀?你以前應承過我架!
牛奶: 幾時有呀冇印象嘅?
夜貓: 老人痴呆,早d瞓啦聽日唔知醒起身就大鑊啦!
牛奶: 唔知邊個次次都十一點幾十二點先上水呢?好啦瞓啦!
連隻衰貓都緊張我嘅成績,今年嘅考試真係多咗好多人響我身邊,我唔可以
令佢哋失望,好---------我要瞓覺!
當連佢哋都考埋試就係暑假來臨,到七月暑假就會同夜貓見面,真係要去台灣環島遊?
唔係嘛?不過好似電波小年咁兩條麻甩佬去台灣流浪又真係幾型,每一個年輕人都想經
歷過、想擁有嘅回憶都會響我依條毒撚身上出現?
不過算啦!有佢響度佢一定唔比我去架啦,豪華旅行團佢就去,睇嚟依個壯舉都係唔屬於
我架啦...............1點啦死啦--------瞓!