(爸爸no.1)我老豆係口靚妹: 阿政no.41

阿政no.41               我會帶你回家


「子政坐啦!」
「哦!」
我依家坐咗響大廳,阿嘉因為飲醉咗所以蔣太同佢去梳洗,大廳就只得我同蔣uncle你眼望我眼,
真係好唔自然!

「阿嘉係咪又闖禍?」
「係咁嘅.................」我都唔係好識講大話,所以一五一十講晒出嚟




「原來係咁,依個女性格已經同幾個月前完全唔同,宜家佢性格率直,任何事都係做咗先諗後果!」蔣uncle

「蔣uncle 你唔好怪阿嘉,其實都係我唔響佢身邊先會搞成咁!」
「乜我似嬲咩?年輕人做事一向都係咁,阿嘉都16歲啦,依個年紀嘅女仔有小小任性先至係正常,不過就辛苦
子政你依個男朋友啦!」蔣uncle

「哦!」真係好開通,比着係我老豆已經打到我入廠
「不過子政以後盡量都唔好比阿嘉同盧碩俊來往,阿嘉之前已經同盧碩俊分手,唔好比盧碩俊再拖拖拉拉!」
蔣uncle 連佢哋兩個分手都知?





「知道!不過阿嘉今次都係想知道自己嘅過去先揾盧碩俊咋!」我
阿澤曾經講過最清楚阿嘉過去嘅一定係蔣uncle,其實最直接嘅方法就係問佢!

「其實阿嘉真係好想知道過去嘅事,但蔣uncle你好似刻意唔比阿嘉知道,所以佢先用自己嘅方法!」
「我隱瞞阿嘉嘅過去?」蔣uncle

「阿嘉話你好似唔想講返以前嘅事,所以佢都唔敢再問你!」我
「其實阿嘉嘅過去冇乜特別,只不過見到佢依家開開心心,有你依個男朋友、4A班嘅一班好同學,我先至冇
將以前嘅不快經歷講返比佢聽!」蔣uncle





「我以前有乜嘢不快經歷?」阿嘉同蔣太到咗大廳
「阿嘉,原來你一直都想知道過去嘅事,但過去嘅事已經唔再重要!」蔣uncle
「重唔重要都係我嘅過去,我都想知過去到底發生乜嘢事!」嘉

「滔!講比佢哋知啦!」蔣太
「唔!你哋坐低!」蔣uncle




「由邊度講起呢?應該話我哋兩夫婦都好喜歡小朋友,但你媽媽有不育症一直都唔能夠生兒育女,醫生
都話依個機會好微,而我哋亦打定輸數我哋會無兒無女,直到醫生建議我哋做人工受孕,雖然成功機會唔大,
但我哋都希望一試!」蔣uncle
「結果就生咗我!」嘉





「唔!當一個注定無兒無女嘅人可以得到一個女兒,依種喜悅你哋年輕人係唔會明白,但對我哋嚟講你(嘉)係上
天賜比我哋嘅最好禮物!」蔣uncle
「自此阿嘉就成為我哋嘅小公主,無論你喜歡乜嘢或想做任何事我都會一一滿足你!」

「千金大小姐果然唔同d,我細細個買件玩具都比人鬧!」阿政又講埋d on鳩嘢啦,分吓場合啦
「可惜當阿嘉5歲,我哋知道佢有120智商情況就有改變!」蔣uncle
「乜原來我IQ有120咁多!」嘉

「120係你5歲嘅智商,12歲你有150!」蔣太
「好勁..........」我
「亦因為咁我哋作出咗人生最錯嘅決定!」蔣太

「阿嘉真係好聰明,5歲已經讀到小四,而且無論任何科目你都能夠好快掌握,但香港跟本冇相關嘅配套,
所以我哋作出一個決定!」蔣uncle
「將我送去英國?」嘉





「唔!8歲嗰年我哋將你送過去英國留學,在此之前由5歲開始我哋為你作好準備,無論係學術、技能、興趣
小提琴鋼琴甚至自衛術你都一一學齊!」蔣uncle
「怪獸父母!」阿政又亂講嘢啦

「你講得啱,當時我哋就好似着咗魔,一個本來連兒女都冇嘅人突然有一個天才女兒,你哋唔會明白嗰種感覺
,嗰一刻我只想阿嘉成為才,成為集團嘅接班人!」蔣uncle
「但我嗰陣都係得幾歲,你乜都要我學嗰陣我冇反抗咩?」嘉

「嗰陣時嘅你性格好內向,所有事都收埋響個心度,無論開心定唔開心都唔會同人講!」
「同埋阿嘉你有一個優點亦都係一個好大嘅缺點,就係太0貼同太為他人設想,你總係模仿身邊嘅人所期望嘅
角色,響我哋身邊會模仿一個完美嘅女兒,我哋一定以為你好喜歡依一種教育方式,原來真正嘅你係好討厭依種
生活,甚至好討厭我哋」蔣uncle

「乜我以前係咁嘅人嚟嘅咩?」嘉




「除咗子政之外所有人你都只會以假面孔去面對！」
「..................」我同阿政你眼望我眼

「結果響你13歲嗰年我哋終於承受返自己種出嚟嘅惡果!」蔣uncle
「13歲.......即係我大學畢業嗰年?」嘉
「就響你畢業典禮嗰晚,你終於精神崩潰.........自殺!」蔣uncle

「...................」
「咁阿嘉有冇事呀?」我
「啪!白痴仔!」兜頭打落嚟

「精神...........你唔係話我痴咗線吓?」嘉
「正確嚟講應該係情緒崩潰,我哋一直都唔知你承受好大壓力,響英嗰幾年好努力讀書只係用咗兩年就完成大學課程,
所有人都對你有好大期望,所有人都以為你好享受依種榮耀,到最後我哋先發覺其實你好討厭英國,努力讀書只不過係
想盡快完成課程返香港!」蔣uncle





「咁我都完成咗啦點解仲會走去自殺?」嘉
「因為我聽從咗教授建議要你繼續響英國讀碩士課程!」蔣uncle
「......................」我真係屌佢個老味
「..................」蔣uncle、蔣太

「真係估唔到蔣泳嘉比佢老豆老母逼到痴鳩咗線!」嘉(細聲)
「講嘢可唔可以唔好咁克薄呀?依家痴鳩咗線嗰個係你呀!」我(細聲)
「衰仔抽我水!」搣

「咳咳!」蔣uncle
「繼續、繼續!」我哋

「後嚟你入住療養院,你主診醫生發現你有嚴重抑鬱同幽暗恐懼症!」蔣uncle
「幽暗恐懼症?」嘉
「恐懼症一種,每個人或多或小都對某一種事物有過度反應,英國嘅天氣加上你長期單獨一人,所以對單獨或黑暗環境
你都有過度恐懼,嚴重甚至會產生幻覺見到鬼魂之類!」蔣uncle

「原來我之前見到嗰d嘢係因為蔣泳嘉個身體,我仲以為執到個可愛青春活潑多水及汁嘅少女身體,點知竟然係山寨嘢!」嘉
「你把口可唔可以唔好咁臭呀?」我

「嗄、嗄!啱啱刷完牙冇晒酒味仲有d清新嘅薄荷味,聞吓!」成個人擒埋嚟
「夠啦唔好玩啦!」
「...................」旁若無人

「咳!雖然我讚成你哋拍拖,不過響長輩面前都希望你哋檢點吓!」蔣uncle
「係係、講到邊?」我哋

「之後我哋將你帶返香港,你主診醫生話響英國咁多年嘅壓力、孤單令你產生抑鬱,只有家庭.........一個溫暖嘅家先可以
令你病情改善!」蔣uncle
「因為咁樣所以間屋得返咁小人?」嘉
「我哋希望能營造一個小家庭,所以除咗姬樂佢哋,其他工人管家我都一一調走,另外為咗比你有自由,你做任何事我哋都盡量唔過問!」

人小就係溫暖家庭?自己個女做乜都唔理就係自由?但蔣uncle同蔣太佢哋又咁忙成日都唔響屋企,蔣泳嘉真係覺得依個家好溫暖?

「就係我一個嘅錯誤幾乎毀咗你一生,我宜家唔需要接班人,唔需要天才女兒,我只想要返我個女...........」
見到蔣uncle有小小激動,我知道佢好想補救,但真正嘅蔣泳嘉已經不在人世,如果佢知道依個事實............

「爸爸已經過咗去啦,我已經冇事,我依家咪健健康康響你身邊!」溫柔
「我知!只要你以後都好似依家咁開開心心我已經好滿足!」蔣uncle
「不過話時話,你又話我有抑鬱,但我又冇食藥又冇睇醫生!」嘉

「自從你墮樓之後性格改變,你主診醫生話你唔需要再食藥!」
「又係主診醫生,但我好似見都未見過佢喎!」嘉
「雖然你見佢唔到,但佢對你病情一清二楚,佢話只要你唔記得自己有病你就真係冇病!」蔣uncle

「咁神秘?」我
「我終於知道點解你乜都唔同我講,因為你唔想我知道自己有抑鬱!」嘉
「你已經好返架啦,唔好再諗返以前嘅事啦!」蔣太

「以後要靠子政你照顧阿嘉!」蔣太
「哦!我知啦!」
「都夜啦,子政都要走架啦!」蔣uncle
「咁我送阿政出門口啦!」嘉





「估唔到蔣泳嘉嘅童年咁慘!」我
「所以大老闆先至比咁多自由我同為我做咁多嘢,阿政!唔可以比大老闆知道蔣泳嘉已經死咗
,如果佢知道一定受唔住!」嘉
「咁我哋之後點呀?」

「暫時我會響大老闆身邊做個乖乖女,老人家已經辛苦咗咁多年唔可以比佢太粗心!」嘉
「唔諗住搶人間公司嗱?」
「講埋d衰嘢!」嘉

「但你一個人得唔得架?如果頂唔順同蔣uncle講啦!」
「已經知道咗所有嘢都係蔣泳嘉個身體作怪,依個世界跟本冇鬼,我宜家又唔係太驚啦!」嘉

「係咩?但我見你響依度硬係有d唔自然,同響我哋屋企好唔同!」我
「冇辦法啦,我宜家先得15歲,起碼都過兩三年等我成年先搬出去住,離開依個鬼地方!」嘉

佢真係好唔鍾意依度,佢跟本就係死頂,蔣uncle講過蔣泳嘉個病係長期壓力做成,我自己亦好清楚,
我由小學去到中學響一個自己唔喜歡嘅環境真係嫻辛苦!

「我有嘢要同蔣uncle講!」
「喂!做乜嘢又走返入去呀?」嘉


「蔣uncle!」
「子政!做乜走返入嚟呀?」蔣uncle
「蔣uncle,其實阿嘉一直都好害怕依間屋,依度太大對佢嚟講冇安全感,佢每晚瞓覺都要開着手機見到我!」
「果然.............咁你想我做d乜嘢?」蔣uncle

「搬過嚟我度住,我照顧阿嘉!」
「嘩衰仔講乜撚嘢呀?難得大老闆咁睇你,你講埋依d嘢佢扔你出街都似呀!」細聲
「你即係話要我將個女送去你屋企,比你哋兩個同居?」蔣uncle

「你唔好亂諗呀!係就係住埋一齊...........但又唔係你諗嗰d囉!」我都唔知自己講乜
「其實我係話我會照顧阿嘉,我哋絕對唔會搞d咩嘢出嚟,我保證!而且我嗰度先至係阿嘉嘅屋企,真正嘅家!」我
「冇啦...........乜都冇啦!」嘉

「終於都聽到子政你講依句說話!」蔣uncle
「終於都等到,果然真係子政!」蔣太
「???」我哋

「當阿嘉病發之後就好似一個洩咗氣嘅氣球,完全冇晒生命力,你嘅主診醫生同我講你想要一個家,一個溫暖嘅家!」蔣uncle
「但我哋無論點做依個家對你嚟講都係冷冰冰,甚至我哋依對父母對你嚟講似上司多過似父母,你都成日響我背後
大老闆大老闆咁叫我啦!」

「竟然比佢聽到?」嘉(細聲)
「都叫你平時講嘢唔好咁大聲啦!」我(細聲)

「只有子政,你響英國嗰時成日都同我講想見子政,子政響你心目中就好似家人、哥哥一樣!」
「所以當返到香港,我將你送去子政所讀嘅學校,希望你哋可以重新認識!」蔣uncle
「你話阿嘉入嚟林重恩讀書係因為我?」

「唔!」蔣uncle笑而不語
「理得佢吖,可以返屋企就得啦!」嘉
「不過子政,你哋兩個都未成年,阿嘉去你屋企住嘅事絕對唔可以同其他人講,同埋你哋絕對唔可以做出越軌行為,就算係
子政我都唔會原諒!」蔣uncle


「放心啦爸爸,阿政就算攬住個女仔響張床度一晚都唔會做到d乜嘢出嚟!」嘉
「你唔出聲冇人話你啞架!」我
「以後阿嘉就要靠你睇住啦!」蔣uncle
「哇!返屋企啦!」阿嘉成個擒上我背脊度


就係咁樣我哋嘅同居生活就開始咗啦,唔係唔係,正確嚟講應該係爸爸搬返嚟住,係父子團聚!
歷時三個月嘅分離終於結束,爸爸終於返屋企啦!



原來就算冇爸爸嘅因素,我同蔣泳嘉都會相遇,命中注定我哋一定會相遇!



                    ( Part 3 end)