(爸爸no.1)我老豆係口靚妹: 阿政no.53
阿政no.53 塘福的晚上(1)
「離家出走?」
「佢媽媽咁講咋!甲午年超級年初三真係名不虛傳,家家户户都炒大鑊!」嘉
「邊關事吖,其實係噹噹屋企發生咗d事!」我
「你好似知道好多嘢咁啵講嚟聽吓啦!」嘉
「其實冇乜嘢...........」
「依家個個都揾緊噹噹,如果知道d乜嘢講出嚟比大家聽吓,可能有幫助呢!」嘉
「其實係咁.............」
「噹噹屋企發生咁大件事?」嘉
「乜你完全唔知咩?」小柔
「唔單止我,係全班都唔知!」嘉
「咁點解噹噹又會同哥哥你講嘅?」小柔
「因為我話會同佢守秘密!」已經爆咗出嚟啦
「個衰妹死要面,依d嘢佢唔會咁易同人講嘅,加上同阿茵講等如同全校宣佈,同阿詩講可能要
安慰返佢轉頭!」嘉
「同你講可能比你踩多腳!」我
「依個時候仲抽我水?雖然有咁嘅可能............」
「依家點呀?」小柔
「嘟......嘟.........」
「真係冇開電話,成晚佢走咗去邊呢?」嘉
「會唔會去咗其他同學屋企?」小柔
「最熟咪我哋幾個,我哋唔知其他同學應該都唔知!」嘉
「會唔會去咗酒店網吧之類?」我
「噹噹不嬲都係要買嘢先帶錢出街,平時最多都係得幾十蚊響身,邊有錢住酒店?」嘉
「一個女仔去得邊呢?」我
「唔洗擔心嘅哥哥,噹噹咁惡又咁好打應該冇事嘅!」小柔
「有幾好打呀?響成年人眼中咪又係靚妹仔一條,夜媽媽唔好彩遇到幾條MK,真係三幾個夾手夾腳
抬埋一邊玩成晚都得呀!」嘉
「你把口可唔可以唔好咁衰呀?」我
「我都係有嗰句講嗰句啫!」嘉
「其實我最擔心係佢會唔會去做傻事,新聞都有講有人壓力爆煲會去跳水塘!」小柔
「唔係嘛?東江水已經唔飲得仲走去污染水塘?」你係唔係人嚟架
「我去揾佢!」
「阿政!唔好自己嚇自己,我識嘅噹噹唔係咁脆弱嘅,佢應該只係想自己一個靜吓!」嘉
「一個人靜吓..........我或者知佢去咗邊!」我
「咁犀利,咁響邊呀?」嘉
「唔肯定,我而家去搵佢!」
「咁我響屋企stand by,我會聯絡其他同學,有乜嘢打比我!」嘉
「知道!」
**********************************************************************
唔響依度,會唔會響嗰度呢?比阿嘉同小柔嚇一嚇依家個心好亂,但點解會有依種感覺?好似唔見咗一樣好重要
嘅嘢,好想好快好快、一定要揾返嘅感覺!
塘福沙灘:
「沙.......沙............」
「揾到你啦,原來你真係走咗入嚟!」
「你.......政仔你點解會響度架?」噹噹碌大對眼望住我
「咁啱經過啫---------信唔信呀?」我
「唔信!」你都答得好可愛
「你媽媽打比我哋話你離家出走,我哋全部搵緊你呀!」
「佢唔係吓?我邊有離家出走啫,我唔返屋企之嘛!」請問依兩句說話有乜嘢分別
「點都好啦見到你安全我都定d!」我
「平安無事?乜我好危險咩?」噹噹
「阿嘉話你睇唔開會做傻事..........」
「又係阿嘉!我個個禮拜都同媽媽鬧交架啦,如果要死死咗好耐啦,就算真係睇唔開我都係去殺人唔係去自殺!」依個我信
「但點解你會知道我入咗嚟嘅?」噹噹
「你講過唔開心就會去睇海,所以我咪入嚟搵你囉!」
「你冇嘢吓?就算真係搵都去九龍城碼頭啦,青衣我夠話過個海好靚囉你又唔去,一嘢走到入嚟塘福!」噹噹
「搵過啦!九龍城碼頭唔見你,青衣我由南橋搵到北橋,所以咪入嚟睇吓囉,如果冇諗住去梅...........」
「你傻架?我講一句咋你諗住搵晒成個香港海灘呀...........」
「唔好喊啦!」我
「呼~~~呼~~~~」
我同噹噹依家坐咗響海邊,正正就係上一次去camp同佢吹水嘅同一位置!
「點解會入到嚟呀?」我
「次次唔開心都係一個人望住個海,係去camp嗰次有個傻仔陪我傾計!」噹噹
「..................」
「下次唔開心call我啦,不過只限九龍城碼頭!」
「如果我又話唔返屋企你會唔會陪我傾天光呀?」噹噹
「天光天黑都好下次一定要開電話,知唔知我哋打鑼咁摷你呀?」我
「冇電吖嘛你估我想嘅咩?」噹噹
「冇電?」
「同媽媽炒完大鑊走咗出嚟先至知冇叉電,又唔可以返屋企叉咪熄咗佢囉!」噹噹
「下次記得叉完電先同人鬧交,係喇咁係琴晚去咗邊度瞓呀?」
「後樓梯!」噹噹
「後樓梯?你阿媽搵咗你成晚原來你響屋企後樓梯?你知唔知琴晚幾多度呀?」我
「係呀琴晚真係凍到我死吓死吓,瞓都瞓唔到呀!」噹噹
「你睇吓你塊面都白晒,隻手又凍冰冰(我好自然咁捉住佢對手),好易病架返屋企啦!」我
「唔返!」
「乖啦!」
「至少比多一日我靜吓真係唔想返去呀,如果政仔你自己一個住就好啦可以上你屋企,但阿嘉又響度.............
.冇嘢啦你走啦!」噹噹
「我點可以一個人走咗去呀?」死啦惡又唔夠佢惡打又唔夠佢打點拖佢返去呢
「借100蚊比我!」噹噹
「嗱!」
「得啦!我依家有錢食飯,你唔洗擔心我喇走啦!」噹噹
「收咗錢就叫我走當我係乜嘢?既然帶唔到你返去我都唔走啦！」我
「吓？」噹噹
「陪你一齊離家出走！」
有陣時有ｄ說話真係唔可以亂講架真係收唔返架，講就好似好型，不過代價係今晚冇得返屋企，今晚去邊度踎呀?
「咁而家點呀?真係響海灘過夜?」噹噹
「驚喇咩?頭先大大聲話一個人瞓沙灘,我未等到車你都凍死咗喇,梗係搵間渡假屋啦!」我
「依度?有冇呀?」噹噹
「上次嚟宿營我有幾張卡片響身,應該冇問題!」我
「上次我哋係響旺角訂房,響依度得唔得架?」噹噹
「你同我定!香港地有錢金字塔都有得你住呀,真係冇嘅咪走返出東涌住酒店囉!」我
「你d口氣越嚟越似嗰隻嘢!」噹噹
「係咩?」近朱者赤啩
「你夠唔夠錢架?我得返110蚊咋!」嗰100蚊係我架
「放心!年初一拜年d利是仲響我個袋度!」我
「吓!年初一d利是仲未拆?」噹噹
「好似話要過咗年初七先可以拆嘛!」我
「你個人真係幾傳統,我哋個個即日響厠所拆晒鬥多添啦!」噹噹
「邊個最多?」
「JJ,八千幾!」噹噹
「真係逗到成萬蚊,你呢?」
「得五千咋!」噹噹
「點解爭咁遠?」我
「JJ見人就搶,我就人哋比先要點同呀?」噹噹
「我都係,我都冇同佢哋一齊去逗利是!」我
「你仲講?你嘅阿嘉開聲叫晒所有人排隊過嚟交利是,全部都係你架!」噹噹
「唔係嘛........搞到好似收片咁!」我
「我同你數吓利是先!」伸手入我個袋攞利是
「依兩封係蔣世伯嘅,一千蚊一封每人有二千...........等等點解咁厚嘅?1、2、3......每封5千兩封成一萬呀!」噹噹
眼都突埋出嚟
「咁多嘅?」我
「睇嚟佢已經當咗你係女婿,仲有其他嗰d都好厚,有埋名有埋部門職位,一定唔小嘢啦!」噹噹
「二萬零五百!」我d利是比佢拆晒
「你唔係依幾日都袋住兩餅嘢四圍走吓好危險架,咁啦我同你袋一半分散風險!」袋咗落袋
「唔洗啦.............」想搶返
「香港好多壞人架,你傻吓傻吓好容易比人搶,我同你袋住先!」噹噹
你講得啱!香港真係好多壞人架,尤其係同我講袋住先嗰個,比返d利是我!
「嘩!租到房唔洗瞓街!」噹噹
「我哋而家去攞房!」我
「唔洗咁急,我哋又冇行李兩手空空食咗嘢先啦!」噹噹
「六點咁早.........其實你係咪冇食過嘢?」我
「琴晚到依家食咗兩個麵包咋,有小小頭暈!」噹噹
「我想話如果我冇響塘福搵到你,你會唔會真係死響度呢?」
「可唔可以食咗嘢先講呀你好長氣呀!」噹噹
我: 係呀,佢死都唔肯走咁我咪同佢一齊囉,麻煩你同佢媽媽講冇事喇!
嘉: 我會同佢媽媽講佢響我依度過夜,始終一男一女響外面佢仲擔心!
我: 我唔係嗰d人嚟,你唔洗擔心喎!
嘉: 你條死毒撚就算有條女除晒衫褲你都唔敢上啦,我反而擔心噹噹唔知搞乜嘢
出嚟,你知佢癲架啦,如果佢搞你打電話比我呀!
我: 點解掉返轉好似我要人保護咁?
嘉: 如果聽朝佢都唔肯走你打比我,我踩入嚟的佢走!
我: 好喇唔講啦!
「雪~~~雪~~~」噹噹顧住食嘢,連阿嘉打嚟都唔理
「你今日大食過阿嘉!」
「我三餐夾埋一餐呀,不過你咪鍾意大食嘅女仔?我覺得你一路望住我食嘢!」噹噹
「我當睇緊d貓貓狗狗食嘢之嘛!」我
「砰!」有氣有力就打人啦
「啤酒!」
「又飲酒?」我
「唔開心諗住啤啤佢,你會陪我個可?兩支!」噹噹
算啦今日佢大晒,不過我唔係好飲得架咋,唔好隊我!
*********************************************************************
海灘:
「仲唔肯返渡假屋呀?」我
「7點幾咋咁早返去瞓咩?咁難得入到嚟梗係行吓沙灘啦,上次一大班人想叫佢哋一齊行又冇人啋我,
今次要行返夠本,浪漫...............」
浪漫依句說話竟然會出自佢把口,不過見佢跳吓跳吓,哼吓歌玩吓沙,十足十一個可愛小妹妹,但點解個個都
當佢係男仔咁睇?可能係粗魯加短頭髮啩?不過依家佢頭髮長咗,性格我又覺得佢越嚟越女仔............
「呼~~~呼~~~」
「哇!」
「你點呀?你啱啱飲完酒d衫又單薄好易病架!」我
「嗄........點解突然間咁凍架?」噹噹
「好似話今日有個乜嘢萬年一鑊嘅世紀寒流襲港,好似話10度以下!」我
「咁勁?search吓依家幾多度!」噹噹
「昂平6度!唔怪得咁凍啦!」
「傻仔!昂平山頂嚟架依度係平地,加返幾度啦!」噹噹
「乜你以為我哋響海邊食風會好得過昂平咩?返去啦!」
「嘩!好暖!」噹噹成個人攬實我
「唔怪得阿嘉一凍就攬到你實一實,你依個移動暖爐果然名不虛傳,得啦繼續行!」噹噹
你依個沙灘狂人夠名不虛傳啦,幾凍都要行落去!
等等!聽講依個係出晒名有成幾公里長嘅長沙沙灘!噹噹..............