(爸爸no.1)我老豆係口靚妹: 爸爸no.8

逗留10分鐘,走咗啦,始終氣氛俾我搞到咁,仲邊坐耐啦!而阿政同姑姐都驚我哋開拖,所以阿GI
走咗5先俾我走.

"對唔住,阿政,搞到咁,連你同媽媽傾計都冇!"

"唔緊要,我知你關心我,不過我印象中你好斯文,溫柔......"

"我依家唔溫柔咩?" 黑黑哋.
"唔......唔係呀."





"可能我意外後失憶啦,我都唔知以前嘅我係咩性格." 笑返.

我一直都係咁,唔啱我就屌,吹呀!

"呀!佢哋!" 手指指.

阿Gi上咗個男人車,個男人大約40到啦(後來我才知道,個男人係律師,阿Gi係空姐.)

最唔想見到嘅嘢俾我見到,個心好唔舒服,好寂寞,好弧獨,終於感受到俾人拋棄嘅滋味啦!





我不期然攬實阿政,攬得好緊,感覺好似有d安全感,咦?我做緊乜呀?成個女人咁!

星期六上山,我係喊得最淒涼嗰個,d人以為我係張俊雄個女添.

冇啦冇啦!化咗灰啦,呢個世界再唔會有張俊雄,我永遠只可以做一個口靚妹!鳴......

阿政都唔好我好多,佢應該冇乜點瞓,再加上連日奔波,都應該要抖抖啦!

吃過解慰酒,同姑姐道別,1點半我哋已返到屋企.





"阿政!呢幾日你攰啦!乜嘢都唔好理,瞓返一覺先......"

"咦?做乜唔講嘢呀?"
"你......塊面黑晒......"
吼~唔~

"阿政!抖氣,抖氣啊!"大叫.
"藥,你d藥呢?"

頂!三四年都冇發作,所以冇藥......
"我記得我仲有一支,頂住頂住呀!"

小學一年級,阿政響學校病發,送咗入院,我到醫院,聽到話乜嘢休克,停止呼吸,我以為會冇呢個仔.

"藥呀,支藥呢?響邊呀......嗚嗚?"




"救命呀~~救~~~~呀!"

"阿政,有啦,吸呀,過晒期,不過應該仲得....."
"嗚.....嗄....." 好d啦!

"可能係你呢幾日太辛苦,加埋個嗰度d煙,嚇死爸爸啦,記住呀,去配藥呀!"
"鳴......" 喊到收唔到聲.

"爸爸?"
"我係你老豆呀衰仔."

得返半條人命嘅阿政瞓咗響牀度,我就講返呢兩星期嘅經歷出嚟,佢梗係唔信啦,所以我就喺阿政出
世,幼稚園,小學,中學嘅事,一一講返出嚟,好似講故事咁,以前細細個嘅阿政,我都會講故事佢聽,不過
係講怪獸,鬼故(其實你想嚇到佢唔聽,然後去睇波),但今次我講嘅係我哋父子嘅故事,由阿政出生到今日嘅故事,
不過呢個故事未完架.





張俊雄雖然死咗,但係爸爸仍然響你身邊,我哋嘅故事會繼續落去.

阿政瞓咗啦,講咗個幾鐘嘅我都有d攰,不如.....

"噗!" 一嘢擒上張牀度.

好舒服,以前阿政細細粒,依家大大舊,應該係我縮咗水,不過算啦,瞓一陣先,goodnight,阿政.

話時話,流血不流淚嘅張俊雄,今日點解會喊咗幾次嘅?係咪我身體出咗咩嘢問題?