(爸爸no.1)我老豆係口靚妹: 阿政no.11

阿政no.11            單車GO!


星期日6:08am,我張子政身處水庫球場,平時冇7:30都唔會起身,
星期日更加唔洗講啦!
點解會咁?咪又係阿嘉囉,5:00就打比我,要我6:00到,遲一分鐘都
打死我,我遲咗8分鐘,咁............

「遲到大王!」
「8分鐘啫!」




「一分鐘一拳!」
「哇、哇、哇、哇、哇、哇、哇、哇!」

「做乜咁早叫我嚟呀?」
「你有夜盲架?睇睇!」

由於11月尾關係,清晨六點天色仍然好黑,不過微弱嘅街燈我都睇
到一架單車!
「單車?」
「冇錯,教你踩單車!」





「咁早上嚟踩單車?」
「點呀?日光日白又驚比人見到,人多你又驚比人笑,依家咪幾好,得我
哋兩個!」

「嗰度都有幾個!」我手指指
「唓!幾個死老嘢有乜作為?就算陣間你點柒佢哋都唔敢出聲啦,仲有,
話唔定一兩年後佢哋死鳩晒,從始以後冇人知道你D柒嘢啦!哈哈哈!」

「喂!唔好咁大聲啦,佢哋聽到架!」




「聽到又點?老at at,夠薑咪過嚟打我囉!」

佢單手叉起條腰,發出冷冷嘅笑聲,雙眼狠狠啤住前面幾條.........長輩!

唉!目空一切,傲視天地萬物(即係睇唔起所有人),只有佢啱,其他人全部
都係錯,佢要做嘅嘢一定要做,你哋唔好阻佢,響佢眼中所有人都睇唔順
眼,只有佢自己最好,佢做乜嘢都啱,只係你哋唔明啫!
你哋個個都要聽佢話.................

冇錯!依個暴君就係我老豆張俊雄,但係依家佢已成為咗蔣泳嘉小姐!
原本以為經過「牛奶2號」事件後,會收歛D,體諒一吓人!不過第二朝

瞓醒,好似完全唔記得晒,極速變回原形!蔣小姐,你冇得救架啦!

「喂!又hand機,諗乜嘢?」




「冇!我諗緊如果你老咗,人哋咁對返你.........」
「砰!」
「嗚~~~」

我條腰呀!雪雪!佢成架單車「扮」落我度呀,嗚嗚~~~

「唔!鋼水幾好,冇變形,唔錯唔錯!」
依條死仆街!

「好!開始教你踩單車,咦?做乜仲跪響度?」
「條腰好痛!」
「打小D飛機啦!」
「..................」

「嗱!睇睇架單車有咩唔同?」




「鋼水靚,唔變形?」
「其一啦!另外後轆踏位可以企人架!」

「有咩用?」
「咁我咪可以企響你後面教你囉!」
「唔洗啦!我自己得.........」

「你自己?一年都未學到啦!你知唔知下星期日我哋約咗踩單車?」
「吓?我真係唔知喎!」
「唔知唔緊要,我已經幫你報咗名啦!」笑笑口

「喂喂!一個禮拜我真係學唔識架,我都係唔去.............」
「你又真係試吓唔去吖!我哋四個到時踩上6A班,睇吓你有乜下場,
一句講晒,生要見人,死要見屍!」





「仲有你唔好諗住用附助轆呀,你夠膽用,我就影晒相比全校睇,到時全
校都知道你條柒轆要用附助轆踩單車,哈哈哈!」

魔鬼!所有父母都想自己仔女好,佢就想個仔仆街,次次都係咁,唔聽你
說話就逼人埋牆角,但今次真係............

「喂!on鳩鳩,快D踩啦!」
「哦哦!」
「你要記住,無論平時我幾咁溫柔體貼,幾咁遷就你,幾可愛幾關心你,但今
日我都會變成魔鬼教練去train你!」

你有撚溫柔體貼過,咪又係嗰個死人look!

「砰!」「呀!」
「叭!」「咚!」




「卜!」「嘭!」
「呀!哇!哎!唷!咳!唔!嘔!」

「你冇嘢吓嘛?五分鐘同我跌廿幾次,其實你身體係咪小咗條DNA呀?
平衡,平衡呀!」
「呀!我好似撞到個頭,我可唔可以..........呀!」

佢打我個頭,我都話撞倒個頭囉,仲打頭!

「阿政!起身再踩過,未跌過邊會學識踩車!」
「哦哦!但係.........」
「阿政你記住,做男人係要面對問題而唔係逃避問題,以後響你面有好多
難關要你去面對,你避得幾次!」

「你細個咪話爸爸唔陪你,唔教你嘅,今日我就陪到你識為止!」
「唔!練到識為止,唔係唔落山!」我
「好,go!」

話就話努力,但應該從乜嘢方向開始呢?
「嗯?」阿嘉企咗上我背後
「放心踩,我幫你平衡!」

當我失去平行,阿嘉就幫我平行單車,漸漸我感覺得到點樣去揾一個平衡點!

「阿嘉你落車,我想自己一個試試!」
「嘩!」
「我踩到三米先跌呀!」
「傻仔!」

3m、5m、8m、15m、20m,慢慢掌握到平衡感,慢慢越踩越順,點解十幾年都
做唔到嘅嘢,今日小小時間就可以掌握?

四歲嘅政仔,得到人生第一架單車(當然有附助轆啦),就喜歡上單車,但五、六、
七歲都係用附助轆,到八歲比人笑之後就冇再踩單車,點解我當時唔拆咗個轆而
係選擇唔踩呢?

「哇!嘭!」
「集中精神!」

「得啦!我已經知道點樣踩,冇問題啦,不過好多人望住我哋!」
「望乜撚嘢呀望!爛返去灑太極啦!」咆哮

「阿政,唔洗理其他人,做自己鍾意做嘅事就得啦!」
「唔!」
「依家幾點?」
「7:45am!」

「只係半小時我就學識,好!操熟D!」
「嘩!衰仔學埋花式!」
「原來踩單車好易,你睇吓!」

「我個仔喎!就算唔係天才都係醒目仔啦!」
「好!今日單車練習最後一個考驗!」

我有一股強烈嘅不安!

「由依度踩返屋企!」
「點踩?」
「踩馬路囉!」

我事先講明,依度係石狹尾水庫運動場,離九龍塘話遠唔遠,3、4公里啦!
但係,但係...........

「劣呀?」
「馬路,危......危險喎!」
「唔炒車咪唔危險囉!」

「你不如話唔死咪長命百歲囉!」
「另外下星期踩單車,應該係單車徑,冇必要.........」
「咁你踩唔踩吖?」

「馬路多車,而且阻塞.........」
「我------叫------你------踩------呀!」

有一股殺氣,唔係,係寒氣?魔氣?妖氣?我都唔知,但係背後的確有股好
恐怖嘅氣勢壓過嚟,要我屈服!
唔得!要堅持,如果唔係就真係萬劫不復!

「唔踩!唔踩!唔踩!」意志堅定
「咦!有人上緊嚟!」阿嘉

清晨7:20有六、七個少年上嚟踢波,當然有望住阿嘉!

「望乜撚嘢呀望!依度係你班柒頭嚟嘅咩?依個場係我條仔架,仲唔同我死
返落去!」
喂.....我幾時加入咗黑社會架?

「仲望?唔順咪隻揪囉,我條仔好撚好打架!」
我幾時話我好打呀?喂!七個呀,仲有兩個金毛..........

「你你你你!最右手面嗰個柒頭,五尺都未夠學乜撚嘢人打波呀?
打飛機都冇力啦,返屋企啦!」大大聲

「喂仲有!你老豆老母食撚咗D乜嘢,點解會生到你成碌鳩咁嘅?咦!嬲呀?
咪過嚟隻揪囉!」

我知你想點,我真係知架,擺我上枱嘛!次次都係唔聽你點就擺我上枱,但今
次真係神枱呀!七條友呀!

「咦?真係行過嚟喎!」
吓!真係過嚟?仲要係七個一齊上,睇嚟馬路應該安全過依度.......

「嘩殺上嚟啦!」阿嘉大叫
「阿嘉!座穩.........唔係,係企穩!」
「哇哇!哇!」

身後傳嚟嘅係自稱死過一次,話唔怕死嘅阿嘉嘅慘叫聲,點解?咪我
手車囉!頭一段幾乎以炒車嘅形式衝落山,就連見慣世面嘅阿嘉都幾
乎嚇到喊出嚟!

不過以我強大嘅求生意志(後面有追兵)我手車終於都穩定返落嚟,但隻
手真係震得好好利害!

「我響後面,唔洗驚!」溫柔嘅聲音
「嗯!」

定下心神,唔洗一陣我哋已經離開水庫,落到歌和老街三條行車線,斜路冇
乜車,好彩!

「我都話啦,星期日仲要係7點鐘,跟本就冇車,踩定D就冇問題啦!」
「唔!」比我想像中安全一D
「唷!」

阿嘉突然大叫及揮手,原來對面線有兩個人正踩單車上山,應該係單車發燒友,
但響佢哋眼中,我哋兩個只係一D唔知死嘅MK仔MK妹,尤其阿嘉佢招搖過市,
路上行人嘅目光都集中響我咃兩人度!

不過又好似幾型...........

「砵.......砵!」
「吓!星期日咁早都有貨櫃車?」嘉
「砵!砵!」

「屌!砵夠未呀?三條線都要啄住我哋,玩嘢呀?」
我諗應該避一避好D!

「阿政,唔好讓佢,踩中間!」
(我以為阿嘉發火先叫我唔好讓,後來阿嘉話我手車太差,如果踩一邊會比貨櫃車
挾死,所以點都唔好讓佢,要踩中間!)

「砵!砵!」
當然我就比佢狂砵啦,但唔到一分鐘,貨櫃車停咗,因為係紅燈,我哋?衝燈囉!
過咗歌和老街,右轉入九龍塘段窩打老道,冇錯,我哋...........

「哇!返到屋企啦!」我哋兩個
「哇.........哇!」

我哋發出凱撒歸來嘅歡呼聲,街上嘅人都當我哋痴線!

「嘩!呀!」
阿嘉high得滯,竟然張開雙手,我立即起身!

「喂!傻咗呀?跌死你呀,艾落我背脊啦!」
「唔!」

阿嘉身體向前傾,應該唔會向後翻,但佢就貼住我背脊,佢個波........好溫暖,
好柔軟.........
喂!我傻撚咗呀?炒車呀,集中精神!

「哇!好舒服,阿政你覺唔覺得我哋好似鐵達尼嘅男女主角呀?」
可能佢張開雙手,所以咁講!

「喂,鐵達尼好似好唔吉利喎!」
「咦!係喎,成船人死撚晒,不過唔怕,女主角冇事咪得囉!」
「咁我呢?」

「我會永遠懷念你!」甜甜笑
「嗱!」

冇錯,我嗱佢!我舉起右手伸出隻中指嗱佢!(所以我得一隻手揸車.)
「砰,磅,乓,嘭!」
「嗚~~~~~嗚!」

究竟係鐵達尼太邪定係做仔唔應該屌老豆呢?我炒車呀,仲係好應嗰隻,
嚴格上嚟講我係仆街,係成個人瞓咗響行人路!

阿嘉?佢緊係冇事啦,第一時間跳車逃生,仲話任何時候都會睇住我,得個吹!

「咔!咔!咔!咔!」
「喂!影夠未?我炒車呀,理吓我啦!」
「咁大個人,炒你唔死嘅,而且我要紀錄事發經過,陣間比佢哋睇!」

「佢哋?」
「唔!連同之前你踩單車嘅錄影,一定好多嘢笑!」
佢竟然偷錄我D瘀嘢..........

「嗱!陣間我約咗佢哋9:00去飲茶,你唔好話唔去呀!」
「飲茶咁老餅?」
「係就老餅,你知唔知飲茶係集收料、篤背脊、埋堆、吹水、放毒、擦鞋於
一身,好似圓桌會議咁無所不談.........」

「不過你條死毒撚搵個人食飯都冇,飲茶依家嘢你唔明架啦!」
我係你個仔呀老豆,幾多年未飲過茶呀我哋?好似唔關你事咁,不過一大班人又
幾熱鬧嘅,只不過比人當玩具囉!

「咁飲完茶去邊呀?」
「我哋去邊你唔洗理,你返屋企溫習!」
「吓?
「吓乜嘢呀?你考生嚟架,而且下星期日你要踩足一日呀,所以今日你要努力D!」

差D忘記咗,考試緊要,我有D忘形啦!
「不過唔洗擔心,我會train住你嘅,只要你聽我命令,以後無論學業、考試、玩樂
與其他練習,我都一一幫你搞掂!」

「以後要乖乖聽我吩咐啦!」
「哦!」
點解好似做咗佢嘅奴隸嘅?

「喂!仲企響度做乜嘢呀?快d返屋企換衫沖涼,跟住去揾位!」
「我?」
「唔通我呀?」笑得好可愛
「快撚d呀!9:00都冇位我就殺咗你,仲行,跑呀,go!go!」

唉!其實依D算唔算係虐兒呢?同埋有冇咩機構可以求助吓?
不過平時嘅假期,都係對住個mon,但今日我學識踩單車,經歷生死,由先前
嘅夜空到依家嘅籃天白雲,都係7:40咋!依家我體內好似仍有好多能量,就算你唔講,我都會一口氣跑返屋企!

希望下星期日一樣係籃天白雲,唔係,一定要好天呀!