(爸爸no.1)我老豆係口靚妹: 阿政no.10

阿政no.10             牛奶2號(2)


「嗱!就係依度!」
「依度?就係你用貴價罐頭餵嚟餵垃圾貓嘅地方?」
「唔好垃圾前垃圾後,佢哋都好可愛架!」

「可愛?就係可愛你一個月用幾百蚊去餵貓,自己就求求其其,用餵貓
D錢買多件衫啦!同埋D貓都可以自己揾食!」
可能阿嘉太惡,又比較陌生,有隻黑貓走到我身邊,我抱咗佢!





「你睇吓,依隻只得一隻眼,應該好難自己生存!」
「哦!仲有一隻跛嘅?」
「仲掛住牛奶?」

「邊有呀?」
「你睇吓!」
可能貓仔太驚阿嘉,又有一隻響我腳邊,咦?又係黑貓!

「你應該成日同D黑貓玩,係咪仲怪我當日扔咗牛奶?」




「冇呀!」
有又點冇又點,我嗰時跪響度求你,你都冇望過我一眼就帶走牛奶!

「你都知牛奶嗰時好曳,同埋只係一隻貓!」
「咁如果曳嗰個係我,你會唔會都扔咗我?」
「喂!人同貓點同呀?貓只不過係畜牲!」

「對你嚟講係隻貓,但對我嚟講佢係我朋友呀!」
「朋友去學校識嘛!邊有人同隻貓........」
「冇呀!識唔到呀,真係識唔到呀!」





「自從由葵涌轉咗嚟林重恩,冇晒小學D朋友,又識唔到新朋友,
冇人同我玩,比人玩就有!」

「有次我比人打,成班人都響度睇,響度笑,冇一個幫我呀,返到屋企
只可以攬住牛奶喊,你嗰時去咗邊?」

「有次比miss屈我出貓,冇人信我,我只係想講比你知我冇咋,但都
等你唔到,點解你成日都唔響屋企?」

「就連13歲生日你都冇返嚟,媽媽又要飛,我以為自己買咗蛋糕就
可以同你興祝,但我同牛奶等咗你成晚都等唔到你返嚟........」

我傻咗呀?N年前嘅嘢仲講嚟做乜?已經過咗去啦,我已經係大人啦,
以前D嘢...........





「嗚......阿政!」
「喂!做乜呀?好似喊嗰個應該係我喎!」
「我都唔知呀?自從變咗女仔之後就好易喊,不過我真係唔知自己做咗
咁多衰嘢,同埋你細細個咁唔開心,對唔住對唔住!」

佢竟然會同人講對唔住!
「冇嘢啦!已經過咗咁耐,而且你係我爸爸,我都冇嬲過你!」
「真係?真係真係一DD都冇嬲過?」

「係呀!」冇氣啦
「哈!」小孩子
「阿政!以後無論有咩事,千祈唔好收埋,講比我聽,如果真係好唔開心就喊出嚟,
原來喊出嚟會舒服D架!」





「不過以後屋企唔會只係得你一個,有我,我返咗嚟啦,爸爸返咗嚟啦!」
「知啦!不過以後唔好再亂嚟,唔好橫衝直撞,唔好再有事.......唔.....」
死!喊咗出嚟,好樣衰,牛高馬大..........

「知啦知啦!」
我哋兩個攬埋一舊,響旁人眼中,我哋可能係一對鬧分手嘅情侶,不過今日係我哋
兩父子第一次,佢真係第一次聽我講心事咋!

「喊咗出嚟係咪舒服D呀?喊包!」
佢大字形瞓咗響地下,五隻貓響佢身邊走嚟走去,其他人可能當我哋痴線,不過我覺得好平靜,好舒服!

「呀,咁樣!」
「又乜嘢呀?」
「以後1、3、5、我陪你餵貓,8:30啦!」
「2、4、6你就自己餵,我會早D走!」





「星期日呢?」
「食少餐唔會死嘅,星期日我哋要去玩嘛!」
餵貓?又睇吓你有幾多分鐘熱度!

「阿政!你幾號生日話?」
「都話1月27囉!」
「1月27,我會同你搞個生日會,超超巨大生日會,勁到嚇死你!」

「唔洗啦!一個蛋糕.........」
「生日會,生日會!」
依個人,一係唔做,一做就過晒火位,1月27日反而有D驚,不過聽日又可能
唔記得我生日,當冇事發生都可以,依個人!

「仲有阿政!」




「又乜事?」
「以後有乜嘢心事都要同我講,你可以當我係牛奶2號!」

「乜....乜嘢2號話?」
「乜你唔係淨係夠膽同貓講心事嘅咩?呵~~」笑得好賤格
依個仆街.........

「放心喎!你D嘢我唔會爆出嚟喎,講心事時間,只會扮貓叫,喵~~」
「傻咗呀?幾十歲人扮貓叫,條街嚟架!」
「喵~~喵~~」仲大聲D

「喂喂!夠啦!有人望住呀,收聲啦!」
「喵~~喵!」一路跑一路喵
「停!停!」



順帶一提:是夜賽馬,第8場2號----------跑唔出,重鎚阿叔今次真係比阿嘉
累撚死!