Cherry總係咁直接。 

但係呢一刻,或者已無需轉彎抹角。 

直接問可能對大家都好。 

所以我靜靜咁等待林穎欣既答案。 

佢飲左一啖野,然後就講: 



「我貪錢囉。」 

雖然我好想呢個答案係真,但我見到佢眼神有所閃縮,一定係大話。 

我忍唔住出聲。 

我:「唔好講大話啦,你呃唔到我。」 

一講完呢句我又諗起晨哥對我講既野。 



我始終本性難移。 

對話因為我靜左一陣,大家都只係飲野。 

我冇咁多耐性,等左兩分鐘我已經忍唔住起身準備走。 

就係呢一刻,林穎欣先再開口。 

「哈,講大話有乜問題?」 



我:「吓?」 

林:「點解要對你地班人下下講真話?你地又唔係我邊個。」 

佢講得好岩。 

人其實冇必要對其他人講真話。 

每個人都會想為自己留一兩個秘密去保護自己。 

當其他人試圖去探索呢D秘密既時候,人就會用大話去掩飾。 

我都會咁做,而且係經常咁做。 

因為我想留既秘密,實在太多了。 



聽到佢咁講,Cherry即刻捉住佢隻手。 

Cherry:「你唔好咁啦,我地都係想幫你啫。」 

一聽到「幫」呢個字,林穎欣突然好大反應。 

林:「幫我?你?明明就係因為你,我先冇哂所有野!」 

佢up乜9? 

Cherry面有難色,睇黎又係我唔知既野。 

Cherry:「我講過好多次唔係你諗咁…」 



Cherry咁難堪既樣我都係第一次見。 

林:「你講我就要信?事實係Leo見完你就唔要我!」 

Leo?好似係F.6架喎。 

而家諗落,有人話佢以前好似係同個高Form一齊。 

我:「咁同你去做援交有乜關係。」 

我忍唔住插嘴,因為佢地而家離哂題。 

林穎欣突然變得一臉失落。 

林:「援交冇乜唔好吖,可以搵錢又可以當拍拖。」 



「最重要既係,唔會怕被人飛…」 

原來如此。 

我:「咁點解你唔同肥豬一齊。」 

林:「我根本唔鐘意佢,只係當佢朋友。」 

我:「試下冇壞啫。」 

林:「咪傻,咁做對大家都唔好,而且…」 

「我心入面一早有一個人。」 



佢雙眼冇一絲既猶豫,佢講既係真。