聽過林穎欣既說話之後,我開始對佢有所改觀。 

由討厭變成憐憫。 

我並冇問佢鐘意邊個,當係為佢留返少少秘密。 

而且,係邊個我根本唔在乎。 

我聽完就帶左Cherry走,留低佢一個。 





走個陣,我望到佢嘆左一口氣。 

從眼神睇,係一個傷心既嘆氣。 

返到學校,感覺改變左唔少。 

開放日過左,有好多事發生。 

最影響我既,就係令我覺得我要珍惜眼前人。 





畢竟我同Cherry既關係有少少微妙。 

可能終有一日佢會離開我。 

我可以做既,就只有珍惜同佢一齊既每一日。 

同樣,我提醒自己要小心晨哥。 

佢可以睇穿一切。 





至於Leo件事,我冇問,等Cherry自己想講先講。 

學校方面,大家都係度等旅行同放假,所以好hea。 

唯獨肥豬一個悶悶不樂,甚至有種冷酷既感覺。 

連我都唔敢靠近。 

食lunch果陣肥豬都自己走左去。我有少少擔心。 

我同Cherry食lunch果陣都提起呢件事。 

我:「肥豬今日好怪,粒聲唔出,我有少少擔心。」 

Cherry:「唔怪得佢既…準備左咁多都係比Ada拒絕…」 





我:「唉,兩個都傻。」 

明明肥豬咁痴心,只可惜佢已心有所屬。 

不過佢都有為肥豬着想過,份人唔差。 

Cherry:「lulu,想唔想知果個Leo既事?」 

呢次係Cherry第一次叫我花名。 

我應該要開心?但我而家可能要面對一個沉重既真相,我真係笑唔出。 

我決定暫時隱藏自己既情緖,進入無情既狀態。 





我:「好吖,你想講我就聽。」 

Cherry:「Ada提到既Leo,你應該都知道係F.6既人,佢以前係Ada男朋友。」 

我:「我都大概估到,咁同你有乜關係。」 

Cherry:「有一日放學,佢突然走黎搵我,話好鐘意我想同我一齊。」 

唔出奇,大把人想同Cherry一齊。 

我:「當時佢仲同林穎欣一齊?」 

Cherry:「嗯,我果陣就係咁同佢講,佢話可以隨時同Ada分手。」 

我:「賤。」 





Cherry:「我都覺得係咁,加上我對佢冇興趣,所以我拒絕左佢。」 

我:「咁點解林穎欣仲會話你搞到佢冇哂所有野。」 

Cherry:「我都唔知…我只係知過左兩日佢地就散左,但係我真係冇做過咩野…」 

Cherry開始掩住塊臉,情緒有點激動。 

我見到佢咁,摸摸佢個頭安慰佢。 

我:「乖,我知唔關你事。」 

我選擇相信Cherry。 





今次既真相,我選擇唔去追尋,而係完全相信Cherry。 

呢一刻,我feel到有人望住我,仲要係帶有敵意。