「走啦魯路修。」 

美星一句好似呀媽叫阿仔返屋企食飯既説話為我打開左突破口。 

林穎欣聽到有人叫我個名,下意識咁回頭望。 

我冇放過呢個機會,轉身跑。 

抱歉,請容許我逃避。 





我而家真係冇辦法答。 

我留低佢一個係羅馬廣場。 

係返屋企既途中,我同家姐冇講過野。 

我偷瞄左佢一眼,佢毫無表情。 

屌,死撚硬。 





一關埋屋企鐵閘,家姐就開始破口大鬧。 

美星:「你到底係果度做咩?仲搞喊個女仔?」 

我:「佢係我同學,係佢叫我陪佢傾兩句號…」 

美星「哦?傾兩句會搞喊人?你最好同我老實D。」 

「無人可以係我面前講大話,你都唔可以。」 





果然係姊弟啊。 

暪唔到佢架啦。 

我一五一十咁話哂俾佢知,包括Leo件事。 

美星:「估唔到我個毒撚細路咁受歡迎,而家D妹妹咁冇品味既。」 

我:「咪玩啦,俾D意見我啦。」 

美星:「俾咩意見,呢D野自己搞掂佢。」 

「但你要記住,係邊個帶俾你而家既日子。」 

一言驚醒夢中人。 





冇Cherry既話,我可能仍然坐係電腦前打機。 

冇Cherry既話,我可能仍未品嚐到親吻既味道。 

冇Cherry既話,林穎欣可能都唔會同我告白。 

總知呢一切一切都係由Cherry帶俾我。 

試問我又點可以背叛Cherry,背叛一個帶俾我新世界既人呢? 

正確的選擇,已經擺係我眼前。 

好多回憶突然湧上黎。 





以前Cherry講過既野,我而家先記返起。 

「如果你真係認為自己咁差配唔起我,點解你唔試下做D野改變自己?」  

Cherry由始至終都冇覺得我配唔起佢,反而一直鼓勵我,喚出我既自信。 

雖然佢仲有好多野我未知道,但我好肯定我鐘意佢。 

最重要既係,佢並冇利用我。 

至今佢都冇利用我去做任何野。 

我竟然動搖,真係好慚愧。 

決定已有,我要留係Cherry身邊。 





問題係,點面對林穎欣。 

我唔想任何人受傷。