日子過得好快,聽日就係旅行。 

個日之後,我冇見過林穎欣。 

點名簿上顯示佢有返學,但係我就係冇見過佢。 

可能我潛意識上想避開佢。 

旅行當然就要分組,今次就要八個人一組。 





我個組當然有我,肥豬,師父同Jason四個鐵膽啦。 

另外四個分別係晨哥,十四,阿偉同Aaron。 

順帶一提,肥豬已經開心返哂。 

但我冇同佢提起林穎欣表白既事。 

我再一次,向兄弟講大話。 





罪疚感好重,但真係講唔出口。 

講返旅行先,我地傾緊到底打邊爐好定BBQ好。 

Aaron:「BBQ啦,燒下燒下好過癮。」 

師父:「燒山好野,多謝燒山。」 

晨哥:「唔好啦,要搬咁多野又熱氣,麻煩死。」 





十四:「打邊爐夠方便喎,又可以食海鮮。」 

我:「我支持打邊爐。」 

Jason:「Agree。」 

師父:「我要食鮑魚!」 

大家:「收聲啦on9。」 

所以最後決定左打邊爐。 

Gas爐同煲就阿偉帶,其餘既就一陣買。 

放學之後幾乎全校都走去買野,街市勁多人。 





我:「喂晨哥,好撚多人喎,不如兵分兩路啦。」 

晨哥:「好主意,十四,阿偉,Kenny,肥豬你地四個係度買海鮮,其他人跟我走。」 

Kenny係師父英文名。 

就係咁,我,Jason,Aaron同晨哥就離開左街市,向惠康進發。 

惠康當然都好多人,我地好辛苦先拎到一架車。 

晨哥行頭,我地三個就跟係佢後面推住架購物車。 

晨哥非常隨意,見到有D乜岩就拎兩件。 





好快架車就堆滿一支支大汽水,紙碟紙杯同膠餐具。 

其實應該都買齊,但晨哥好似意猶未盡,係賣洗頭水個行不停咁搵野。 

我係呢個時候收到師父WTS,話佢地已經買齊野食。 

我:「晨哥,十四佢地搞掂啦,你得未?」 

晨哥:「哦?搞掂啦?等多我一陣。」 

最後晨哥係一盒盒Condom面前停低左。

我:「晨哥…你唔係想買呀?」 


晨哥:「聽日可能識到新女女架嘛,安全D好。」 





靚仔的權利。 

Jason, Aaron同我都顯得一臉尷尬。 

佢揀左盒,拋左比我。 

正當我想放落車個陣,Cherry同佢班朋友出現左係我面前。 

我用畢生最大既力量將盒Condom一下塞落車底。 

但係我都幾肯定佢睇到。 

晨哥:「哦?你好啊芷睛,你都黎買野呀?」 





Cherry:「Hi…係啊要買燒烤叉。」 

我唔敢望Cherry。 

晨哥:「咁好啦,魯路修你去揾叉,其他人同我去埋單!」 

唉,放過我啦好嗎。 

但係我都係快快手咁搵左七支燒烤叉,再偷左一支低form既叉,湊齊八支比Cherry。 

我:「八支啦呢到。」 

Cherry:「唔該哂~」 

佢講完就突然走近我耳仔邊,好細聲咁講左句: 

「咸濕仔。」 

之後就拎走我手上既叉返去搵佢班朋友。 

佢真係睇到。 

我連解釋既機會都冇。 

好彩,聽佢既語氣佢只係想玩下我。 

搵完叉之後,我都去join返晨哥。 

大家都係街市門口等緊我。 

晨哥:「返黎啦?」 

晨哥一路拎住盒Condom搖一路講。 

真係幾佩服佢可以大搖大擺咁著住校服拎呢盒野。 

大家分配好D物資之後都準備返屋企,等晨哥俾指示。 

晨哥:「好,搞掂哂仲有錢剩,聽日分返俾大家。」 

「聽日會選拔埋閃避球既成員,大家都要參加。大家早D訓。」 

「魯路修你都要。」 

唉,真麻煩。