結束了,應該係掛。 

估唔到一個小小既舉動,會引起咁多事。 

不過有人鐘意,心入面都係幾開心既。 

要返去啦,Cherry等緊我。 

我企係屋企門口,拍拍自己塊臉。 





提起精神,唔可以要人擔心。 

我打開鐵閘,聽到美星既笑聲。 

一入到去,就見到美星含住啖意粉係度喪笑。 

而Cherry就一臉尷尬咁坐係佢旁邊。 

我:「搞乜啊你。」 





美星:「哇唔得太好笑,你同啊妹既故仔太好笑。」 

我:「痴線,我返黎啦。」 

美星:「我知啊我睇到。」 

Cherry:「歡迎你返黎。」 

Cherry把聲聽落好平靜,好似平時咁溫柔動人。 





同頭先見到既哀愁樣好大分別。 

睇黎美星有幫我開解佢。 

我拎左張櫈,放係Cherry旁邊。 

但我冇坐落去。 

我選擇抱住坐係度既Cherry,緊緊咁抱住。 

我希望用一個擁抱,可以解釋所有野。 

我放開佢之後,大家都冇講過野。 

佢默默咁轉身,係廚房拎出一碟卡邦尼意粉比我。 





我有點錯愕,因為美星只煮拿破崙意粉。 

美星:「阿妹煮架,你有福啦。」 

呢次係我第一次食Cherry煮既野。 

我食左一啖,好好食,忌廉味好香。 

Cherry:「點啊?好唔好食?」 

佢好緊張咁問我。 

我:「十分!」 





不出五分鐘,我就食哂成碟意粉。 

而Cherry就一直坐係我旁邊睇我食。 

Cherry:「多謝你。」 

我:「我多謝你就真啦,D意粉好好食。」 

Cherry:「我唔係指呢樣,我想講好多謝你揀左我。」 

我放低手上既叉。 

我:「講呢D,我一開始就已經係你架啦,而且係你揀我先。」 

我抹一抹嘴,捉起Cherry既右手,錫左落去。 





我覺得呢下好浪漫。 

美星:「其實我仲係度…夜啦,冇車返去啦,你地打算點。」 

係喎,唔經唔覺已經成一點。 

我:「你想坐的士返去,定係係度訓一晚?」 

「係度訓啦,我屋企都冇人,返去都係自己一個。」 

Cherry幾乎冇諗過就答我。 

所以我就執好剩低間房,比自己用。 





美星話個間房太多塵,唔適合比Cherry用。 

佢叫Cherry訓佢間房,而佢自己就訓我間房。 

我細細聲咁問點解,佢笑笑口咁答我: 

「你想你女朋友知道哂你D口味?」 

仆街,係喎,C Drive有好多我珍藏。 

家姐真細心。 

咦?佢點知架? 

我訓上客房既床。 

今日發生左好多野。 

一日內太多衝擊。 

而家諗起當日啊媽講既野別有一番體會。 

開心幸福,難過失落我一日內都體會哂。 

多得呢D衝擊,我先可以認清自己既心。

我鐘意Cherry。 


同時我向自己發誓,唔可以再動搖。 

仆街有野咬既?出廳訓算。 

一打開道門,就見Cherry由家姐房行出黎。 

我:「未訓?」 

Cherry:「嗯,訓唔着。」 

又難怪佢既,有人向自己男朋友示愛喎。 

以前上網睇過,人既額頭係存放靈魂既地方。 

於是我鍚左Cherry既額頭一下。 

Cherry:「你做乜啊?」 

我:「有人話額頭係存放靈魂既地方,我而家鍚左你額頭一下,代表你既靈魂已經被我佔有,好唔好?」 

Cherry:「你鐘意既話,我既一切都可以係你既。」 

我:「咁又唔得。」 

Cherry:「吓?」 

我:「因為我既一切已經屬於你,已經冇辦法接收你。」 

無錯,我想要既唔多,我只想要Cherry既靈魂係我身邊。 

Cherry:「傻佬。」 

Cherry講完就抱住我。 

用一個擁抱,結束多事既一日,都唔差。