中學每年最期待既活動除左sing con,就一定係旅行。 

可以有日唔洗着校服,又可以大玩特玩,你都咪話唔爽。 

我地呢班人未到石澳已經high到爆炸,係旅遊巴上唱哂歌又猜枚。 

「十二隻恐龍去野餐~」 

雖然係好嘈,但都唔差。 





大家既笑容都好真摯,冇一分既虛假。 

一首歌接一首歌咁唱,不經不覺我地已經到左石澳。 

一落車就受到海風既熱情歡迎,不過個歡迎係凍既。 

無人想企定定係度食海風,所以大家一落哂車就直奔燒烤場。 

燒烤場好少人,可能因為時間尚早,所有爐都冇人用。 





晨哥見到咁即刻叫人分開兩批霸爐,幫B班霸埋。 

而我,就去開始SET打邊爐既野。 

石澳燒烤場既爐都好新,但d枱就細左少少,所以我地決定將個gas爐放上去個燒烤爐上面。 

打邊爐就係有個好處,唔洗透爐。 

見其他人出哂力咁透爐,而我地已經set好哂等水滾,個種優越感真係無得頂。 





等水滾途中,Cherry佢地個班終於黎到,但燒烤場已經冇乜位剩。 

梗係啦,一半被我個班霸左喎。 

晨哥:「魯路修,我忙緊,你去帶佢地搵爐啦。 」 

佢所講既忙緊,係同其他學校既女仔吹緊水。 

唉,次次都搞着我。 

我拍拍屁股上既灰塵,行去B班個邊。 

一陣wow聲既歡迎就當然小不了,畢竟今朝先同Cherry挽過手。 

我:「早晨各位,你地都幾早吓。 」 





得仔:「咪玩啦魯路修,我地班冇爐用呀諗諗佢啦。 」 

我:「係咩?咁你地唯有企係度睇我地食囉~ 」 

我擺出一副WHO FUCKING CARE既樣,但發現Cherry對住我搖頭,示意我唔好再玩。 

YES YOUR MAJESTY。 

我:「講吓笑啫,跟我黎啦,一早幫你地霸哂位啦。」 

成班人都係度歡呼仲係咁多謝我。 

其實唔關我事,係晨哥叫既,佢應該一早估到會咁。 





我好似酒樓知客咁帶位,將B班既人安置好,同時趕返走我個班堆契弟。 

我好巧妙咁將Cherry個組放係最近我既爐,呢D野係基本啦。 

同時,我都見到林穎欣,佢今次唔係同Cherry一組,跟左另一班女。 

佢冇望過我。 

安頓好之後,大家都開始食野。當然,仲有人透緊爐。 

我地個爐都水滾了,開始狂放野食落鍋。 

我就專攻丸類,芝士腸同肥牛,因為海鮮唔係好岩我。 

咬粒芝士丸咬到一半,我收到個Whatsapp。 





「快D幫下我地透爐呀! 」
我擰轉頭望望Cherry,原來佢個邊仲透緊爐,哈哈。 

我就唔識透爐既,但係我知十四識,仲好勁。 

我: 「喂十四,帶你去威俾班女睇,跟我黎。」 

十四:「咪又係叫我去透爐,幫邊個先呀? 」 

我:「醒目喎老闆,梗係Cherry先啦。 」 

我就係咁帶左十四去Cherry個邊個爐。 

我:「靚女食唔食肥牛呀? 」 





我都未講完,佢已經拎左我對筷子夾起肥牛放入口。 

佢應該真係好肚餓。 

Cherry:「食得好開心咁喎,我以為你唔記得左我添。」 

弊,佢好似嬲嬲地。 

好似冇見過佢嬲,估唔到第一次見佢嬲係因為肚餓。  

我:「我去左搵個專家黎幫你嘛,十四SHOW THEM SOMETHING。」 

我露出苦笑。 

十四:「睇我表演啦。」 

十四佢只係用左兩粒炭精,撥左兩三下炭,個爐已經起左。 

十四驚人既起爐能力令成堆女女無一不驚訝。 

張楚珊:「好犀利啊!」 

吳天恩:「厲害…」 

Cherry:「好野有得燒了!」 

一有得食就咁開心。 

十四:「碎料啦呢D。 」 

其他人見到十四透爐咁勁都紛紛向十四求援,我眼見十四仲食左幾個波餅。  

B班堆仔都廢既,透過爐都唔掂,抵佢地溝唔到女。 

益左你啦,十四。 

至於我?可以全身而退返去食野了。 

正當我想走個陣,Cherry又叫停左我。 

Cherry:「喂傻佬。」 

我:「仲有咩吩咐?」 

我擰轉身,Cherry就塞左粒棉花糖入我口。 

Cherry:「請你食。 」 

Cherry:「記得留D海鮮比我啊。 」 

佢講完就轉身返去個爐度。 

而我就受到師父一行人大刑伺候,理由係:僞毒可恥。 

我係被師父佢地圍毆個陣,望左一下周圍。 

有人選擇食野,有人選擇去沙灘玩, 

而十四佢仲透緊爐。  

最緊要既,大家都好開心。 

開心,就夠了。 

係大家狂歡既時候,晨哥唔知係邊度拎左個大聲公出黎。 

痴撚線去旅行帶大聲公,神果然係難以理解。 

「全世界注意,二十分鐘後進行選拔,要食野既就同我快D食。 」 

我有預感,係呢個氣氛下搞閃避球選拔會導致一場腥風血雨既廝殺。