晨哥既說話引起極大既反應。 

大家都歡呼示好。 

岩岩先叫做開始玩得興起,大家居然都同意咁快就搞選拔。 

希望唔好太過火。 

我:「晨哥,我唔參加得唔得,唔想玩。 」 





晨哥:「痴線梗係唔得,你反應力咁好我預左你做正選添呀。」 

唉,咁我出去被人秒殺算。 

二十分鐘之後,我個班既男仔都落哂沙灘。 

晨哥又唔知幾時係沙灘到畫左出個場出黎。 

大家都磨拳擦掌咁,好似好興奮。 





師父:「睇我點用寫輪眼砌低你班垃圾啦。 」 

Aaron:「我有上帝之手可以接住個波。 」 

肥豬:「想問打中影分身當唔當out。」 

Jason:「收皮啦,我有天帝之眼可以睇到未來,一定係我贏。 」 

十四:「可唔可以掟頭? 」 





嘩好似會好危險,呢班契弟好似唔記得贏左要係班際出場咁。 

晨哥將我地分成兩組,每邊十個人。 

晨哥:「我會搵若睛記錄低資料架啦,仲有一件事,雖然話就話選拔,但始終今日都係想大家開開心心咁玩。」 

屌,有唔好既預感。 

我:「咩意思呀晨哥?」 

晨哥:「改一改規則啦,大家可以直接打返個波過對面,唔會當foul。」 

仆街,咁樣好大鑊。 

師父走埋黎同我講:「食正你個範啦,你用返黑子個d傳球咪得。  」 





黑子?又勾起少少回憶。

開波前我望望場邊,見到Cherry企係石級上望住我,仲俾左個 我叫我加油。 

咁就要認真少少啦。 

我個邊主要有我,師父,Aaron,十四。 

而對面主要有晨哥,Jason,肥豬同阿偉。 

猜包剪揼決定左係我地呢邊開波,我交左比十四開。 

我見十四佢退後左兩步,儲左下力,一下就扔左出去。 





個波係我身邊經過個陣我甚至聽到有風聲。 

痴撚線洗唔洗玩到咁大。 

個波直接打中契弟A,梗係啦邊個會接到。 

我:「喂十四留下手好喎,話哂係同學。  」 

十四:「唔得!比賽就要出盡力!」 

唉,佢太過投入了。 

輪到對面開波,係阿偉開。 

我都幾肯定佢會好似十四咁打。 





不出我所料,佢一下勁抽,成個波直飛向我。 

我有諗過接住,但球速太快我一定接唔到。 

咁打返過去?都唔得黎唔切。 

我最後選擇避開。 

個波最後打中左係我後面既隊友A。 

個波好似打中左佢條Jer,見佢係咁大叫:「師父好撚痛呀!」。 

成班都顛撚左,如我所料呢場選拔已經變成一場廝殺。 





我好想out但被個波打中一定好撚痛,所以我一直避。 

避波先係閃避球既精髓嘛。 

隨住選拔既進行,好多人都out左去左場外。 

我個邊得番我,師父同Aaron。 

對面仲有晨哥,Jason,肥豬。 

師父:「睇黎我都要用幻術操控賽果了。 」 

我:「屌講咁多,比個波我啦煩。 」 

都唔明點解師父可以咁耐都冇被人打中。 

我成場第一次拎起個波。 

老實講我掟波唔叻,冇乜力,所以我選擇拋高佢,交俾係對面既隊友。 

點知個波係臨到隊友手之前居然俾晨哥截左。 

晨哥:「太天真了,呢D小把戲係呃唔到天帝之眼架。吱吱~ 」 

連你都係咁!?  

我諗佢最後個「吱吱」係想話俾我聽,佢入左「ZONE」掛。  

晨哥呢下搶波引起係旁邊睇波既女女既尖叫,當中仲包括其他學校既女女。 

你話靚仔幾好,公平咩。  

Aaron:「睇波呀on9!」 

仆街!分左心! 

原來晨哥係我望場邊個陣已經掟左個波過黎。 

避唔開了。 

師父:「打返過去啦! 」 

正有此意。 

我打側身,俾自己用右邊膞頭對住對面場,儲定力準備抽返過去。 

計好角度,用手板當網球拍咁用,一下打返個波過去。 

最後個波飛返對面,打中肥豬個肚。 

全場靜左一靜。

可能冇人預計到我會打到個波番過去。 


係就係幾型既,不過隻手好撚痛。  

一片寧靜中,突然響起拍手聲。 

原來係Cherry拍緊手。 

其他人見到咁都跟住拍手。 

人就係咁,好多時見到人做自己都會跟住做。 

好似聽演唱會打拍子咁。 

不過我都好開心。 

師父:「冇生疏到喎,仲用到加速PASS。 」 

我:「咪傻啦,都唔係咩招數,你真係睇黑子睇上腦。」 

晨哥突然大聲叫:「幾好野吖黑子,我要再認真少少啦咁。吱吱~ 」 

唉,頂你班友唔順。 

係三對二情況下,我以為我地可以有優勢,點知最後竟然比晨哥一個反殺哂。 

短短十分鐘既選拔就此過去,可以話係小朋友齊打交。 

只係一旦被打中就痛到死啫。