[校園][應該純愛][友情]「我想要你，仲有你既世界。」: 年終

聖誕節我送左Cherry返屋企之後，我就冇再出去留係屋企，打住機咁過聖誕。 

之前上網訂左隻銀戒指，都係boxing day果日送左黎。 

不過而家Cherry都未好返，未係時候送俾佢。 

我望住隻戒指，係度幻想緊送俾Cherry既畫面。 

真係諗起都開心。 



「送俾我架？」 

屌。 

我：「你搵次敲門啦好嗎？」 

美星：「妖，又唔係咩唔見光既野，睇過。」 

佢一手搶走放係我眼前既戒指盒。 



美星：「係幾靚既隻戒指…」 

佢望一望就合返個盒，放返低係我床邊，轉身離開。 

我感覺到佢既背景有淡淡既哀傷。 

自從聖誕節之後佢就怪怪地。 

我望一望電話，今日已經係28/12。 



約定Cherry出黎倒數先，到時比佢一定好感動。 

小毒撚又開始幻想。 

就係咁，我WTS左Cherry，一黎問佢好返未，二黎約佢。 

佢過左一陣就覆左我，話已經好返，仲應承左我一齊倒數。 

至於地點，佢話一於係我屋企樓下，佢想上黎煮飯。 

好撚期待31號，好想快D到個日。 

日復一日，31號終於到。 

我八點幾就被門鐘嘈醒左，邊個咁早啊，我仲未訓夠啊… 



一打開門，原來係Cherry。 

Cherry：「早晨啊~ 」 

我：「做乜咁早既 」 

Cherry：「今日我想早D見到你嘛~我買左早餐呀快D食啦！ 」 

我望一望佢隻手，拎住兩袋大家樂，仲有一個紙袋。 

我估個紙袋入面既野應該係送比我既，所以我扮睇唔到幫佢保持神秘感。 

我幫佢拎左袋大家樂，招呼左佢坐低先再拎野食出黎。 



玩下佢先。 

我：「咦，點解有三個餐既 」 

Cherry：「仲有你家姐呢。 」 

我：「咁都應該係兩個餐啫，第三個點黎？」 

Cherry：「衰人咁我唔洗食架？ 」 

我：「嘻嘻玩下啫，快D食啦，我去叫醒美星。」 

等我係Cherry面前威下先。 

我擰開少少道門，再一腳踢開。 



唔，好型。 

但我後悔了，原來佢醒左仲用緊電腦。 

佢冇出聲，只係企起身，鏈住我條頸。 

美星：「好型咁喎細佬。」 

死硬了。 

Cherry：「家姐快D黎食早餐啦，趁熱呀。」 

美星：「咦阿妹上左黎既？有野食正喎~」 



佢一見到Cherry就放開左我，行去餐枱。 

我留心一睇，我份早餐全部正正係我最鐘意既配搭。 

呢個時候我腦海突然閃過林穎欣既一句說話。 

「佢了解你既一切，你鐘意食乜去邊，連你最鐘意既動畫係乜佢都知。」 

我會心微笑，睇黎Cherry真係知道我既一切。 

就係咁，我地三個人一齊渡過左31/12既早晨。