[校園][應該純愛][友情]「我想要你，仲有你既世界。」: 交換

食過早餐之後，我地都留係屋企睇電視就算。 

一黎，我唔想出去凍親Cherry又整病佢。 

二黎，咁樣係梳化睇電視好有夫妻feel，我好鐘意。 

至於家姐話夜d要出街，而家想訓多陣。 

客廳得番我同Cherry兩個。 



坐下坐下又就快十二點，Cherry突然拎左兩張戲飛出黎。 

Cherry：「去睇戲咯？」 

我：「你幾時買架？咩戲黎架。」 

我接過佢手上既戲飛，一睇，火影忍者 ROAD TO NINJA。 

呢套戲我原本已經諗住約肥豬去睇，但估唔到係Cherry約我先。 



我：「點解買呢套既？」 

Cherry：「我知你想睇嘛~」 

頂唔順，點解呢個女仔咁了解我。 

我：「好啦我而家去換衫，你坐陣先。 」 

我關上房門，忍唔住笑左出黎。 



同時盒戒指都係正我面前。 

只有佢，可以戴上呢隻戒指。 

我好快咁換過衫，著定件大䄛怕Cherry去到戲院會凍。 

我地準時去到戲院，我仲買左個中size爆谷慢慢食。 

套戲其實唔錯，有D感動位，尤其係睇到鳴門著起四代火影袍個下。 

Cherry都睇到好入神，唔通佢都係fans？ 

我又知多樣佢既野。 

睇完戲之後，我就陪佢去買餸。 



佢買左豆腐，茄子，豆角仲有牛肉。 

原本佢仲想話買野煲湯，我唔想佢咁辛苦，所以話想飲金寶忌廉湯，佢先冇煲湯。 

再一次返到屋企個陣，已經係五點幾。

佢一返到我屋企就好似打仗咁拎哂D餸入廚房，仲叫我唔準入去阻住佢。 

我只好坐係梳化，偷偷咁注視住佢。 

佢笨手笨腳咁，好努力咁煮。 

睇睇下我訓著左都唔知。 



當佢叫醒我個陣，已經係八點。 

Cherry：「食得啦。」 

我：「噢，訓著左添。」 

Cherry：「洗手先啦，我去叫家姐。」 

我：「佢未出去咩？」 

Cherry：「佢岩岩起過身，話食埋飯先出去喎。」 

痴飲痴食正仆街。 

我望望餐枱，Cherry整左三碟餸，麻婆豆腐，魚香茄子仲有豆角炒牛肉。 



看似簡單既菜式，卻令我䁔在心窩。 

今日之內已經係有四次我覺得感動。 

可能因為我好少食住家飯啦，我覺得好好食。 

Cherry既廚藝好岩我胃口。 

食完飯執好碗之後家姐就出左去，成間屋再次得番我同Cherry。 

仲未係時間落街，所以我決定搵D野傾下。 

我：「話咁快又一日囉可？」 



Cherry：「係囉時間真係過得好快。」 

我：「原來再過多年我地就考DSE。」 

Cherry：「係吖，我地已經冇乜時間剩。」 

我：「有你係我身邊就夠。」 

Cherry：「你都要俾多D心機讀書呀！明明有天份又唔努力！ 」 

好似啊媽教仔咁。 

佢講完之後就係佢今朝帶黎個紙袋度抽出一條頸巾。 

一條深藍色頸巾。 
Cherry：「嗱，織好左啦，成個1月都要同我戴住佢呀！ 」 

我：「多謝你喎，又會咁快手既。 」 

Cherry：「我旅行果日已經開始織架啦，日日都織。 」 

我個一刻真係有衝動直接拎隻戒指出黎送比佢，但我抑制住自己。 

依家未係一個好時候。 

我戴上頸巾，再抱Cherry入我懷內，等頸巾都包住佢。 

Cherry；「呢條頸巾唔夠上次我個條披肩長架…唔好整爛啊… 」 

我：「咁我地再Close D咪得囉。」 

就係咁，我地兩個攬住咁一齊坐係梳化傾計傾左兩個鐘。 

到十一點半左右，我地落樓，手拖手咁行去羅馬廣場。 

當然，我冇唔記得帶埋隻戒指。 

去到羅馬廣場，都幾多人下，我地搵左個位坐低。 

Cherry：「嘩呢度都好多人下喎。 」 

我：「係囉我都估唔到。 」 

Cherry：「今次我一定要倒數到！ 」 

我苦笑左一下，睇黎佢仲因為上次聖誕倒數fail而唔開心。 

好快就開始左倒數。 

「十！」 
「九！」 
「八！」 
「七！」 
「六！」 
「五！」 

我開始將隻戒指放係我右手。 

「四！」 
「三！」 
「二！」 
「一！」 
「HAPPY NEW YEAR！」 

「新年快樂，芷睛。」 

「傻佬你都係啊..？」 

佢擰轉面講，發現左我右手上既戒指。 

我：「送比你架，當係交換禮物啦。 」 

Cherry已經開始喊。 

我幫佢戴上戒指，再錫左佢一啖。 

我：「我地要永遠係埋一齊，好唔好。」 

佢冇答我，只係不停咁點頭。 

我冇諗過簡單既一句說話，係日後竟然會變成一道枷鎖。